 |
|
           |
AMBROSE BIERCE
|
 |
 Caro Maurizio Costanzo Show,
Ci su’ cìnici vigitariani ca rifúutanu puru lu gorgonzola, materia senza vita propria e pi cchiù fitusa, pi addintari gulusi li tèniri picciriddi dî caroti cruri, appena strappati dâ culla di l’humus. Sulu pirchì li ricchi umani nostri nun sèntinu li vagiti di duluri dî carotini ca puru li strumenti tècnici registranu senza dubbiu, nuiautri participamu impassibbili a veri e propri olocausti vigètali. Li cuntadini ricèvinu addirittura sovvinzioni dû statu pi allistiri li sò campi di cuncintramentu di virduri votati ô futuru sterminiu. Mentri li animalisti inurridìscinu davanti a ’na nica macilleria di quartieri o a n’alimintarista cu salúmi, percòrrinu ’mmeci indifferenti, anzi eccitati, li mercati generali, veri e propri obituori unni su’ esposti li sarmi di frutta e virdura, ca ràntulanu senza essiri sintuti pirdennu li últimi gocci di linfa.
Abiezioni e crudiltà! E chiddu ca è cchiù gravi, versu lu cchiù diversu dî diversi di nuiautri, cúspidi di efferata discriminazioni razziali, la chianta!
Ma la catina di l’orruri nun si ferma ccà!
Cchiù li cadàviri vigètali su’ morti di pocu, cchiù su’ apprezzati e custusi.
Ci su’ strumenti di tortura comu la centrìfuga ca càcianu sangu di chianta pi Dracula vigitariani ca s’agghiòttinu tuttu e rèstanu impuniti.
Li picciriddi vèninu addistrati a nun aviri rispettu pû munnu verdi, cundiziunannuli cu l’offerta di gilatu â fravula o ô pistacchiu, ma mai ô cunigghiu o ô crapettu. È ’na ’ngiustizia di pazzi, fatta cu l’acquiescenza di cu’ s’erggi a sula difisa dâ parti animali dâ natura. Li ’nnamurati nun òffrinu ê zziti mazzi di zampi di cignu, pirchì li picciotti inurridissiru, ma li duci occhi luccìanu di gioia â vista di muntuna di corpi di ciuri, tagghiati cî cisoi, e macabramenti attaccati ’nsemi cu giri di spachi durati, nastri e stagnola.
Li granni eroi e patrioti vigètali, comu Amanita, lu fungu vilinusu e la sò cumpagna Cicuta, ca hannu vindicatu miliuni di chianti suppressi accidennu sulu quarchi omu ccà e ddà, vèninu dî omini pirsiguitati e sterminati pû sulu gustu di accidiri, senza mancu addurri pritesti gastronòmici. È nu veru e propriu delittu pulìticu. Chi fa Amnesty? Taci? Sulu pirchì oltri li diritti di l’Omu nun esistinu li diritti dû Fungu?
Taliati l’animalista vigitarianu ca s’impietusìsci davanti a nu piattu di cicinieddi e s’iscagghia contra li stragi dû nuvillami ítticu, ma po’ s’agghiutti giuvanissimi cucciuli di lattuca, doppu aviri sparzu supra li sò firiti sali ògghiu acitu, limuni e pipi.
Ed iddu ancora rifúuta li mummii di porcu comu prisuttu e salami, ma po’ esìta sulu n’àttimu, e pi suli dubbi organolèttici, davanti ê mummii vigètali comu la mustarda e la frutta secca o cannita.
Pirchì lu ovu no e la nuci sì?
E, nun sulu ntê cantini, lu latti no e lu vinu sì?
E chiddi ca màncianu girmogghi di soia e nun pucini vivi cunnuti?
Puru la terminulugìa è di manciamorti: si mastìcanu cori di parma e di cacocciula, gammi di àppiu, testi d'aglio e recchiteddi pugghisi cî cime di rapa.
Già privista, e accussì scuntata, è la reazioni dî animalisti vigitariani, davanti a sti capi d’imputazioni, e accussì nun la nnuminamu mancu. Puvireddi, lassamuli cruggiulari ntê sò mali ammucciati sensi di curpa.
Nun si po’ barari cu l’inconsciu pirsunali, nè suprattuttu cu chiddu cullittivu.
Lu Tempu, a sò tempu, s’incaricirà di vindicari tanti delitti a sensu únicu, e lu farà adupirannu l’ampia patulugìa di chiddi malatii ca vànnu a divastari la già tristi terza età di chiddi ca si su’ ’ncapuniti ’n ’na assurda alimintazioni sbilanciata, puru sapennu di pussèdiri n’’ntestinu cu longhizza e dotazioni glandulari di onnívuru.
Lu Tempu, gran ideòlogu dû muvimentu filovigètali: fa vìviri millenni li sequoie e nu jornu sulu li parpàgghiuni effímiri.
Cu stu Funnaturi e Prisidenti Onorariu, lu MOVIMENTO FILOVEGETALE chiama a raccolta li filovigètali di tuttu lu munnu pi annunciari: "Filovigètali di tuttu lu munnu, unìtivi pi cummattiri uniti a favuri dâ causa cumuni!"
Pi ora tanti nun ni capìscinu e tant’àutri su’ addirittura su’ contra di nuiautri.
Ma â fini, lu Tempu ni darà ragghiuni.
Gigi Picetti
L’òpira "Caro Maurizio Costanzo Show...", sana sana o ’n parti, pò essiri liggiuta, scarcata supra ô computer, stampata e cupiata senza lìmiti, sulu pi usu pirsunali. Tutti li testi e li illustrazioni su’ pruprità di Roberto Quaglia e nun pònnu essiri adupirati sani sani o ’n parti senza autorizzazioni. Lu prugettu gràficu e li cumpunenti gràfichi di sti pàggini su’ pruprità riservata di Roberto Quaglia. L’òpira "Caro Maurizio Costanzo Show...", sana sana o ’n parti, nun pò essiri missa ’n vènnita a nuddu tìtulu senza privia autorizzazioni. 
|
