 |
|
           |
AMBROSE BIERCE
|
 |
 Caro Maurizio Costanzo Show,
Ce stanno cìnece vegetariane ca rifiùtano pure 'o gorgonzola, materia senza vita propia e pe 'e cchiù puzzolente, pe addentà gulùse 'e tènnere piccerille d''e carote crure, appena strappate d''a culla 'e ll'humus. Sulo pecché 'e recchie umane noste nun sèntono 'e vagiti 'e dulore d''e carotelle ca pure 'e strumiente tècnece registrano senza dubbio, nuje participammo impassìbbele a vere e propie olocauste vegetale. 'E cuntadine ricévono addirittura sovvenzione d''o stato pe allestì 'e campe 'e cuncentramento lloro 'e verdure votate ô futuro sterminio. Mèntre ll'animaliste inorridìscono annanze a 'na piccola macelleria 'e quartiere o a 'n alimentarista cu sauzicce, percorrono 'mméce indifferente, anze eccitate, 'e mercate generale, vere e propie obitorie addó stanno esposte 'e sàrme 'e frutta e verdura, ca ràntolano senza essere sentute perdenno ll'ùrteme gocce 'e linfa.
Abiezione e crudeltà! E chello ca è cchiù grave, verzo 'o cchiù diverso d''e diverse 'a nuje, cùspide 'e efferata discriminazione razziale, 'a chianta!
Ma 'a catena 'e ll'orrore nun se ferma ccà!
Cchiù 'e muorte vegetale sò muorte 'a poco, cchiù sò apprezzate e custuse.
Ce stanno strumiente 'e tortura comme 'a centrìfuga ca càcciano sango 'e chianta pe Dracula vegetariane ca s'agliòttono tutto e rèstano impunite.
'E criature vènono addestrate a nun avé rispetto p''o munno verde, cundizionànnole cu ll'offerta 'e gelato â fravola o ô pistacchio, ma maje ô cuniglio o ô crapetto. È 'na 'ngiustizia pazzesca, fatta cu ll'acquiescenza 'e chi s'àrza a sola difesa d''a parte animale d''a natura. ll'innammurate nun òffrono a 'e zite mazze 'e zampe 'e cigno, pecché 'e figliole inorridarrìano, ma 'e duce uocchie lùccecano 'e gioia â vista 'e muntune 'e cuorpe 'e ciure, tagliate cu 'e cesoie, e macabramente attaccate 'nzieme cu gire 'e spave dorate, nastre e stagnola.
'E gran eroe e patrioti vegetale, comme Amanita, 'o fungo velenuso e 'a cumpagna soja Cicuta, ca hanno vendicato miliune 'e chiante suppresse accidenno sulo quacche ommo ccà e llà, vènono d''e uommene perseguitate e sterminate p''o sulo gusto 'e accìdere, senza manco addurre pretiste gastronòmece. È 'nu vero e propio delitto polìteco. Che fa Amnesty? Tace? Sulo pecché 'a là d''e deritte 'e ll'Ommo nun esìstono 'e deritte d''o Fungo?
Guardate ll'animalista vegetariano ca s'impietosisce annanze a 'nu piatto 'e cecenielle e se scaglia cuntra 'e stragge d''o novellame ìtteco, ma po' s'agliotte giuvanìsseme cucciule 'e latuca, doppo avé sparzo ncopp'a 'e ferite lloro sale uoglio acìto, limone e pepe.
E isso ancora rifiuta 'e mummie 'e puorco comme presutto e salame, ma po' esita sulo 'n àtteme, e pe sule dubbie organolèttece, annanze a 'e mummie vegetale comme 'a mostarda e 'a frutta secca o cannita.
Pecché ll'uovo no e 'a noce sì?
E, nun sulo dint'a 'e cantine, 'o latte no e 'o vino sì?
E chille ca màgnano germoglie 'e soia e nun pucine vive cunnite?
Pure 'a terminologgia è 'a magnamuorte: se mastìcano core 'e palma e 'e carciòffola, gamme 'e sèllaro, cape d'aglio e recchietelle pugliese cu 'e cime 'e rapa.
Già prevista, e accussì scuntata, è 'a reazione 'e ll'animaliste vegetariane, annanze a sti cape d'imputazione, e accussì nun 'a nnummenammo manco. Puverielle, lassàmmole crogiolà dint'a 'e male nascuoste siense 'e corpa lloro.
Nun se po' barà cu ll'inconscio personale, né suprattutto cu chillo collettivo.
'O Tiempo, a tiempo suo, s'incaricarrà 'e vendicà tante delitte a senzo ùneco, e 'o farrà aduperanno ll'ampia patologgia 'e chelle malatie ca vanno a devastà 'a già triste terza età 'e chille ca se sò 'ncapunute dint'a 'na assurda alimentazione sbilanciata, pure sapenno 'e tené 'n 'ntestino cu longhezza e dotazione glandolare 'a onnìvoro.
'O Tiempo, gran ideòlogo d''o muvimento filovegetale: fa vìvere millenne 'e sequoie e 'nu juorno sulo 'e palommelle effìmere.
Cu stu Funnatore e Presidente Onorario, 'o MOVIMENTO FILOVEGETALE chiamma a raccolta 'e filovegetale 'e tutto 'o munno pe annuncià: "Filovegetale 'e tutto 'o munno, unìteve pe cumbàttere unite a favore d''a causa cummune!"
Pe mò tante nun ce capìscono e tant'ate sò addirittura sò cuntra 'e nuje.
Ma â fine, 'o Tiempo ce darrà ragione.
Gigi Picetti
'A òpera "Caro Maurizio Costanzo Show...", sana sana o 'n parte, po' essere liggiuta, scarcata ncopp'ô computer, stampata e cupiata senza lìmmete, sulo pe uso personale. Tutte 'e tèste e 'e illustrazione sò pruprietà 'e Roberto Quaglia e nun pòzzono essere aduperate sane sane o 'n parte senza permesso. 'O prugetto gràfeco e 'e cumpunente gràfeche 'e sti pàggine sò pruprietà riservata 'e Roberto Quaglia. 'A òpera "Caro Maurizio Costanzo Show...", sana sana o 'n parte, nun po' essere messa 'n vénnita a nisciun tìtulo senza permesso primma. 
|
