 |
|
           |
AMBROSE BIERCE
|
 |
 Câo Maurizio Costanzo Show,
Ghe són cìnichi vegetariàn che refûan finn'a-o gorgonzòla, matêria sénsa vìtta pròpia e pe de ciù ciûsänte, pe adentâ avîdi i tênoi pìccoli de-e carötte cruîe, apénn-a strapæ da-a cûna de l'humus. Sôlo perché e nòstre umànn-e orégge no percepìscian i vaî de dolôre de-e carotìnn-e che pûre i struménti tècnichi registràn inequivocabilménte, niâtri partecipémmo inpascìbili a vêi e pròpri olocàusti vegetâli. I contadìn riçéivan adiritûa sovençioìn da-o stâto pe alestî i seu cànpi de concentraménto de verdûe votæ a-o futûro stèrminio. Méntre i animalìsti inoridìscian davànti a 'na pìccola maxelarîa de quartê ò a 'n alimentarìsta con salùmmi, percórran inveçe indiferénti, ànsi eccitæ, i mercæ generâli, vêi e pròpri obitòri dôve són espòste e sàlme de frûta e verdûa, ch'e rantôlan inudîe perdéndo e ùrtime gùtte de lìnfa.
Abieçión e crudeltæ! E quéllo ch'o l'é ciù grâve, vèrso o ciù despægio di despæghi da niâtri, cùspide de eferâ discriminaçión raçiâle, a ciànta!
Ma a caténa de l'orôre a no se férma chì!
Ciù i cadàveri vegetâli són mòrti da pöco, ciù són aprezæ e costôxi.
Ghe són struménti de tortûa cómme a centrìfuga ch'e càvan sàngoe de ciànta pe trangugiànti Dracula vegetariàn inpunîi.
I figeu vêgnan adestræ a no avéi rispètto pe-o móndo vèrde, condiçionàndoli co-l'offèrta de gelâto a-a frôla ò a-o pistàcio, ma mâi a-o cunìggio ò a-o cravétto. A l'é 'na ingiustìçia matòlla, perpetrâ co-l'acquiescénsa de chi o s'érge a sôla diféiza da pàrte animâle da natûa. I inamoæ no òfran a-e zóvie màssi de sàppe de çìgno, perché e figétte inoridiéivan, ma i dôçi éuggi luxéntan de gòia a-a vìsta de mùggi de còrpi de flô, tranciæ co-e foixétte, e macabraménte avìnti tra de lô con gîri de spâghi doræ, nàstri e stagnêua.
I gréndi eròi e patriòtti vegetâli, cómme Amanita, o fùngo velenôzo e a seu conpàgna Cicuta, ch'àn vendicòu milioìn de ciànte sopprésse massàndo sôlo quàrche òmmo chì e là, vêgnan da-i òmmi perseguitæ e sterminæ pe-o sôlo gùsto de massâ, sénsa manco adûe prétesti gastronòmichi. O l'é 'n vêo e pròpio delìtto polìtico. Cöse o fâ Amnesty? O tâxe? Sôlo perché a-o de là di drîti de l'Òmmo no existan i drîti do Fùngo?
Goardæ l'animalìsta vegetariàn ch'o s'inpietozìsce davànti a 'n piàtto de gianchétti e o se scàglia cóntra e stràggi do novelàmme ìttico, ma dòppo o ingùrgita zovaníscimi cucciöli latughìn, dòppo avéi cospàrso e seu ferîe con sâ êuio axâ, limón e péive.
E lê ancón o refûa e mùmmie de pòrco cómme prosciûto e salàmme, ma dòppo o estîta sôlo 'n àtimo, e pe sôli dùbbi organolèttichi, davànti a-e mùmmie vegetâli cómme a mostàrda e a frûta sécca ò candîa.
Perché l'êuvo no e a nôxe sci?
E, no sôlo inte oserîe, o làtte no e o vìn sci?
E quélli che màngian germógli de sòia e no póregin vîvi condîi?
Ascì a terminologîa a l'é da mangiacadàveri: se mastêgan cheu de pàrma e de articiòcca, gàmbe de séleo, tèste d'àggio e orecchiétte pugléixi co-e çìmme de râva.
Za prevìsta, e coscì scontâ, a l'é a reaçión di animalìsti vegetariàn, davànti a sti câ d'inputaçión, e coscì no â nominémmo manco. Pôvi, lasciémmoli croziolâ inti seu mâ dissimulæ sénsci de córpa.
No se pêu barâ co-l'inconscio personâle, né sorviatùtto con quéllo coletîvo.
O Ténpo, a seu ténpo, o s'incaricherâ de vendicâ tànti delìtti a sénso ùnico, e o ô faiâ adêuviàndo l'àmpia patologîa de quélle maotîe vòrte a devastâ a za trìste tèrsa etæ de quélli che s'én incaponîi inte 'n'assùrda alimentaçión sbilanciâ, pûre savéndo de posséde 'n intestìn con longuéssa e dotaçión glandolâre da onìvoro.
O Ténpo, grànde ideòlogo do moviménto filovegetâle: o fâ vîve milénni e sequòie e 'n giórno sôlo e parpàgge efìmere.
Con tâle Fondatô e Prezidénte Onorârio, o MOVIMÉNTO FILOVEGETÂLE o ciàmma a racôlta i filovegetâli de tûtto o móndo pe anonçiâ: "Filovegetâli de tûtto o móndo, unîve pe conbàtte unîi a favô da câuza comùne!"
Pe òua tànti no ne capìscian e tànti âtri són adiritûa cóntra de niâtri.
Ma a-a fìn, o Ténpo o ne daiâ raxón.
Gigi Picetti
L'ôpera "Câo Maurizio Costanzo Show...", inta seu interézza ò in pàrte, a pêu èse lézûa, descaregâ in sciô computer, stanpâ e copiâ sénsa lìmiti, sôlo pe ûzo personâle. Tûtti i tèsti e e ilustraçioìn són propietæ de Roberto Quaglia e no pêuan èse adêuviæ inteaménte ò in pàrte sénsa autorizaçión. O progètto gràfico e e componénti gràfiche de ste pàgine són propietæ reservâ de Roberto Quaglia. L'ôpera "Câo Maurizio Costanzo Show...", inta seu interézza ò in pàrte, a no pêu èse missa in véndita a nisciùn tîtolo sénsa preçedénte autorizaçión. 
|
