ti che ti ga senpre dito bełe parołe contra l'usansa che regna de un bon 1% de la popolasion zóvane italiana de infilsarse la carne co na siringa par inpìrse el sangue de eroina, ti me scoltarè de sicuro deso che me meto a confidarte la sénplise spiegasion su le cause de sto fenòmeno che mi go dà a mi steso.
Caro Maurizio Costanzo Show, ti sì na Divinità Bona, ti disi cose bone contra la cultura de la droga e queła de la mafia, par meso Tuo e atraverso de Ti se specia i punti de vista contrari e se forgia el mutèvole telaro de sìmboli su'l qual giorno dopo giorno se costruise e se trasforma la società italiana... e podaria continuar con stronsade sìmili par ore e invese paso sùbito al dunque.
In parołe povare: Parché i zóvani i se droga? Parché no se droga anca i veceti? Opur soło i veceti? O i mèdeghi, che se i vol la droga i ghe l'ha anca a portà de man? E parché no tuti i zóvani i se droga? Parché no'l se ga mai dà el caso de un balonaro de serie A che'l diventa eroinòmane? Insoma, parché in serte categorie de persone se se droga e in altre no?
Sì sì l'emarginasion la mancansa de valori e quełe cose là... ghe ne gavemo sentìo parlar mijara de volte, ma continuemo a dir a noaltri e ai altri che in fondo in fondo proprio no capimo come uno el pol decìder de scominsiar a inpuntarse l'ago, concludemo che chi se buca el sbalia e basta, e cussì vol dir che no gavemo capìo gnente. Provémoghe a modo mio, con un aprocio un poco diverso da la sòlita rècita de quei do o tre concèti triti e ritriti.
Rendémose prima de tuto conto che l'èser uman el xe un organismo social. A'l contrario de na piera, che se ti la cavi da la spiagia, da la conpagnia de altre piere, e ti la meti soła inte'l spasio vodo in òrbita atorno a la tera, là la se ne sta bona sensa lamentarse né sofrir anca par sinque miliardi de ani (e dopo el sole - a dir dei doti - el se spandarà ingiotìndo e diserìndo la tera e anca la nostra piera), l'èser uman, se ti lo ciapi e ti lo meti un poco soło el scomìnsia quasi sùbito a sofrir. A'l contrario de la piera, l'èser uman el ga na vita social. Cosa vol dir? El vol questo dir che a l'èser uman ghe piaze andar a le feste inte l'alta società? O anca in queła media? Anca.
In realtà el vol dir asè de pì.
El fato che l'Omo (e la Fémena no la xe de manco) el ga na vita social el vol dir che sensa vita social no'l pol viver. Cosa xe alora la vita social?
Esensialmente, la vita social la xe el fato de far qualcosa insenbre con i altri. Se vardemo pì atentamente, vedemo che'l concèto de vita social el implica el fato de far qualcosa par i altri. Atension: no sto sercando de contrabandar nissun ideal pseudo-pio. Par i altri el àgise la crocerosina come par i altri el àgise el bòia. Sénplisemente, no i sta servendo i stesi "altri". Robin Hood el roba ai richi, ma el dà ai povareti. El tìpico polìtico el roba ai povareti, ma el dà ai richi. Che l'èser uman el sia un animal social el vol dir che chiunque el ga da èser ùtile a qualcun altro. L'asasin no'l xe serto ùtile a la so vìtima, ma lo xe a'l mandante. El polisioto no'l xe serto ùtile a'l ladro, ma lo xe a'l sitadin. Quando i polisioti, i polìtici e i giùdici no i xe ùtili a'l sitadin el vol dir che i xe coroti, e alora i xe ùtili ai corutori. Qualche volta el carnéfese el xe adiritura ùtile a la so vìtima, come inte i raporti sado-masochìstici (e'l film "Portiere di notte" de Liliana Cavani el xe de sto caso un sublime esenpio). Ogni èser uman de la tera, par sentirse legitimà a esìster, el ga da èser ùtile a qualcun altro. Anca l'eremita, par so decision lontan da tuti i èseri umani el ga speso legami con qualche animal, che ghe inpenise el bisogno de sentirse ùtile a qualcun.
Quando un èser uman el pensa de no èser (pì) ùtile a nissun, el sente che la so vita no la ga nissun senso e speso el se copa lu steso.
Ma, spesialmente quando se xe zóvani, prima de coparse se prova tute. Quando se xe zóvani l'imperativo el xe queło de inserirse inte la società, trovar una o pì funsion da incarnar, e su quełe forgiar la so identità ancora inesistente de indivìduo adulto, insenbre a'l posto de la identità no pì vàlida de creatura o adolesente. Se prova tute partendo da sora, da le funsion pì alte che par a la so portà. Se serca bone amicisie, un bon lavoro, un bon raporto sentimental. Se no se trova gnente e nissun che'l mostra de gaver bisogno de noaltri, se basa le pretese. Se anca basando le pretese se resta soli e inùtili, se serca ancora pì in baso, se descende e se descende e se descende, fin a quando in fondo a la scala social, quando ormai, par via de i tanti insucesi, l'amaresa e la rabia le regna sovrane, eco finalmente na microsocietà de altri rabiosi e traditi che finalmente i te aceta, che finalmente i ga bisogno de ti. Eco i tòsici e eco, soratuto, i spaciatori e i invisìbili narcotraficanti lontani. I spaciatori i ga bisogno de ti, de ti che ti sì sensa funsion e identità e ti sta sercando tut'e do. I ga bisogno de ti e ti, che ti sì sensa identità adulta, che no ti trovi nissun altro che'l te dà na identità adulta gavendo bisogno de ti, che no ti trovi altri che i se val de la to esistensa, ti, sensa altra selta, ti sièli l'ùnica selta che ti ga.
No la xe serto queła che go fato na anàlisi conpleta del fenòmeno droga. Varie altre aproci i xe anca vàlidi. Ma li ga za fati altri e no me xe parsa questa la sede par ripéterli. El mio el xe soło uno dei posìbili modi de védar queło che sucede. Lo go qua esposto, umilmente, davanti a la pì potente de le divinità moderne. Che ognun el gionta el mio punto de vista ai soi, parché el xe soło ricojendo drento de sé el pì gran nùmaro de punti de vista che ognun el se pol avisinar senpre pì a la sfuzente e infinitamente lontana perfeta conprension de le cose.

Roberto Quaglia