ancuo no suporto i animalisti. No ghe l'ho co i animali, sia ben inteso, che anzi me piaze védar e reconóser intorno a mi inte la pì varia gama che se pol. Chi no suporto, parché tanto asurdi inte la so osesion, i xe i animalisti convinti, i estremisti animalisti. Ma ancora pì fastidio i me dà i animalisti moderati, che podaresimo ciamar i animalisti qualunquisti, che messi soto a qualunque anàlisi lògica i mostra de èser ancora pì asurdi, inte la so posision confusa, dei animalisti estremisti. Tanto par scominsiar, distinguemo: Chi xe i animalisti estremisti, e chi xe i animalisti qualunquisti?
I perfeti animalisti estremisti i se imedèsima da inte le vìsare con tuti i animali, dal vison al gato, da la foca mònaca a la sìnsala, da l'orso grizzly al tòtano. Cosa vol dir che i se imedèsima con lori? Vol dir che i dà a tuti i animali i so sentimenti. No me piaze èser copà, dise l'animalista estremista, cussì no'l piaze gnanca a l'animal. L'animalista estremista no'l se ciba mai de animali morti (né vivi), no'l copa la sìnsala che la sta par pónzarlo, ma el se lìmita a cassarla via (se invese la copa, el xe un animalista estremista inperfeto). No se beve el late de vaca, parché cussì fasendo lo levaria al vedeło, no'l magna vovi, ovaro futuri pulisini (quando po' el vovo, come speso sucede, el xe za fecondà, el xe a tuti i efeti - tècnici e morali - un aborto de galina), no'l se mete visoni, montoni, giache scamosà, scarpe de coridòn, portafòji de pele. L'animalista estremista el se imedèsima con tute le forme de vita animal, ma no con quełe vegetali, che'l se ne ciba sensa rimorsi. Qualche volta no'l se imedèsima gnanca con l'èser uman, sofrendo par la morte de un animal asè pì che par queła de un indivìduo uman.
L'animalista qualunquista, invese, el se imedèsima da inte le vìsare con tuti i animali che i ga un aspeto conforme ai archetipi drento de eło. Insoma: el se imedèsima inte un gato, un vison, un conejo, un can, ma no inte un pantegana, na mosca, un serpente, un vermenon. El se imedèsima inte quełe poche bestie che'l caso e la selesion natural i ga volù morbide e con un aspeto beło par l'ocio uman, ma no inte tuti i altri animali. L'animalista qualunquista el xe forse una de le pì grose espresion de ipocrisia che se pol descrìver, e del tuto deliranti e contradditòrie le xe tute le so argomentasion. Una de le pì tìpiche manifestasion el xe el fato che'l ghe l'ha a morte con chi se mete pelice de vison. "Animali i vien copà" rècita el pio animalista "par pòderse méter la pelice! (Orore!)", e'l dise questo co'l patètico fervor de chi el ga apena descoverto che l'aqua calda la xe calda.
Se volì castigar un animalista qualunquista che'l ga apena dito sto spropòsito, sercate su de eło (o eła) i tochi de morto d'animal che quasi de sicuro el sta portando sensa gnanca pensarghe. Fèghe notar come eło (o eła) cìnicamente e sensa vergogna el pesta co i so pie (che spusa?) el coridòn de le so scarpe, che'l xe la pełasa de un animal che'l xe stà mazà parché eło (o eła), deso lo doparasse par caminar soto la piova, inzenparse su i marciapìe e pestar le cache de can. Fèghe notar quala che xe stà l'identità del portafòjo o borseta de pele soa, pele che la xe stà de un animal, copà parché eło (o eła) el metesse i so schei drento un invòlucro de prestìgio che'l ga odor de pele invese che de plàstica. Domandèghe parché no'l se rabia e no'l se scandalisa co la stesa foga come con chi se mete un giubòto de pele, un "ciodo", un monton rivoltà. Domandèghe se eło (o eła) el ga sti vestiti inte'l so guardaroba, e se'l ghe li ga, se de questo no'l se ne vergogna. E se no'l se vergogna, parché gavaria da vergognarse chi el ga na pelice de vison? El ga de sicuro da vergognarse chi el ga na pelice de leopardo, parché el leopardo el se sta estinguendo, e la cussì dita "biodiversità" la xe na richesa del mondo che no se pol negar e che gavaresimo da salvaguardar invese de destrùser, come stemo invese fasendo. Ma el vison no'l risega de estìnguerse, el vien alevà par farghe pelice, el vien alevà come i bo, i montoni, le galine le vien alevà par magnàrsele e farghe de tuto. Messo streto streto, l'animalista qualunquista, par no amétar la so ipocrisia, el ve dirà: "Ma se i animali i vien alevà par magnàrseli, no'l xe imoral..." Semo inte la farneticasion totale. A parte el fato che i vegetariani i dimostra che sensa carne se pol benìsimo viver, e che cussì chi magna carne el lo fa parché ghe piaze, e no parché el ghe ne ga bisogno (proprio come chi compra un vison el lo fa parché ghe piaze, e no parché el ghe ne ga bisogno), no la xe queła de magnàrseli, invese de na atenuante, invese na agravante? Spesialmente se se considera che magnar carne el xe tut'altro che obligatòrio, esendo l'èser uman onìvoro? No'l xe màcabro mazar un animal a sangue caldo, un animal che'l ga un sarvèło, na vita sesual, par el scopo de sibarse dei so cojoni, de la so lengua, del so sarvèło, del so cor, del so fìgà, dei so rognoni, del so intestin, dei so mùscoli, mastegàndoli a longo in boca par godérse el saor che queł morto el ne dà? No'l xe questo anca pì màcabro de chi de l'animal morto el ama méter l'invòlucro, ovaro la pelice? No nego che méter la pele de mamìfero morto el pol èser un gesto de mal gusto, par un spìrito nòbile. Ma védar sì lussuriosamente le budełe no'l pol èserlo de manco.
Par demolir alora par senpre l'incàuto animalista qualunquista che de la so ipocrisia el ga apena sercà de farghe un vanto ai vostri oci e soratuto ai soi, trafizìlo con na nosion banalìsima che pochi i sa, parché a pochi ghe interesa:
Dai denòci dei bo (morti e sensa osi) el vien cavà na sostansa che la vien doparà par far l'emulsion de le pelìcole fotogràfiche.
El capio de la lògica el xe ormai streto al coło de l'animalista. Quante volte el ga fotografà, quante volte el ga consumà osi de bo mazà anca par permétar a eło (o a eła) de far le fotografie? Quante fotografie el ga sprecà, sbajando la mesa a fogo? Quanti denòci de bo sacrifegà par gnente, par el diletantesco dileto da gnente suo?
El par ridìcolo. E lo xe, de fato. El xe ridìcolo come el xe ridìcolo che qualcun el se scandalisa parché na tosa la se inbelise e la se scalda con na pelice. Se el vostro interlocutor animalista el xe intelisente, dopo queło che ghe gavì fato notar el se incorzarà de quanto el xe ridìcolo, e su questo el meditarà. Se no'l xe intelisente, el farfujarà incoerenti giaculatorie animaliste, che ve convinsarà, se voaltri sì intelisenti, de lassarlo pì in presa a'l vodo autoconforto dei so preconceti.
Capisi, caro Maurizio Costanzo Show, qual xe el nòsoło del problema de l'animalismo? El nòsoło el xe che l'animalismo el se fonda su la discriminasion rasista. I animalisti i se alsa a difesa de le rase "elete" tra le spece viventi, secondo criteri che i someja asè al credo rasista che'l xe stà dei nazisti.
Una de le discriminasion: NO TUTE LE SPECE VIVENTI LE MERITA EL STESO RISPETO. I animalisti estremisti i "elese" le spece viventi che le partien soło al mondo animal. Le Vegetali le vaga a farse frìzer, come de fato el sucede inte la cusina cinese. Soło parché i animali i xe pì sìmili a noaltri dei vegetali, i va salvaguardà a dispeto dei secondi. A tuti i animalisti estremisti digo soło na cosa: tra 50 o 100 ani su la tera no esistarà che qualche àrbol sparso, no pì giungle, no pì boschi. El sarà invese senpre pì pien de bo, visoni, galine e montoni. Soło se mai i vietase, in tuto el mondo, la pelice de vison, el vison, no pì alevà, el se estinguaria in quatro e quatroto. Pensate al genosidio dei àrboli, ogni volta che strasè un fojo de carta, ogni volta che butè desine de chili de giornali apena vardà. Ma mi lo so che me ilùdo. No ghe pensarì, parché sì animalisti.
Un'altra discriminasion: NO TUTI I ANIMALI I VA PRESERVÀ: I inseti, par esenpio, se i morise tuti no'l saria po mal. Nissuna emosion copando na mosca. Grosa pena par el gato che'l fioło de strada ghe tira la coda. La discriminasion rasista la xe spietà. I animali i xe "eleti" e i merita de viver se par esenpio par caso i presenta el pì gran nùmaro de le seguenti caraterìstiche: Oci grosi, testa grosa a paragon del corpo, fronte tonda, morbida pelùria, ganbe curte, naso pìcolo e a l'insù, masete piene, rece grose, vose alta.
Parché?
Parché ste caraterìstiche, se ghe pensè, le xe quełe pròprie de ogni creatura umana. Ne piaze i animali che drento de lori istintivamente reconosemo i caràteri tìpici de le creature pìcole, che drento de lori retrovemo tute quełe caraterìstiche che ne fa piaser le creature pìcole.
E quali xe i animali che i ga el pì gran nùmaro de ste caraterìstiche? El gato, el can, l'orsachioto, el panda, ma anca el canarin e tanti osełeti. No el vermenon, no el serpente, no el pese. In piena analogia ai criteri nazisti, i animalisti i aprova o i tolera la morte dei animali consideri de rasa inferior, e i elese a rasa superior e cussì degni de viver i animali che i risponde a serti requisiti estètici.
Qualcun el obieta che se vol tutelar i animali con pì intelisensa, cussì pì in grado de capir la morte che a lori se ghe dà? Ipòcriti! Uno dei pì intelisenti tra tuti i mamìferi el xe la pantegana, e cosa ga fato l'animalista che par le mie parołe el se indigna, contra i umani stèrmini de pantegane? Qual animalista el ga sercà pari diriti par pantegane e visoni? Tra l'altro la pantegana la presenta tute quełe caraterìstiche estètiche che le ne gavaria da far un cucioło de tuti. Se dise che la xe grosa, ma la xe pì pìcola de un gato. Se dise che la xe agresiva, ma la xe na busìa. I felini i xe carnìvori, agresivi e crudeli, intanto che sorzeti e pantegane i xe onìvori e pacìfici. Serto i pol mòrder se qualcun el serca de coparli, ma come se pol biasimarli? La pantegana la ga tute le caraterìstiche par piaser, tant'è vero che cartoni animà e fumeti i xe pieni de eroi positivi a forma de sorzeti. Parché alora la pantegana no la piaze?
No la piaze parché no la fa fin in fondo el roło del "cuciolo da basar", parché no la se sotomete al domìnio de l'Omo. Tuti i animali che no i xe de casa i xe animali che no i xe boni de sotométerse al domìnio de l'Omo, e par questo l'Omo el li stèrmina e el li estingue. La pantegana la xe particolarmente odià parché no la se sotomete e a'l steso tenpo no la se lasa sterminar e estìnguer.
Chi el se xe mai comoso par la morte de na formìgoła? I formigari i xe struture misteriose e organizatìsime, come podarìa parer le nostre sità a un gigantesco estraterestre che'l ne vardase da sora. I siensiati i xe d'acordo che le società de le formìgołe e de le àve le xe organismi che i fonsiona a modo intelisente, ma i xe cussì diversi da noaltri che no ghe capimo gnente. E no i someja a na pìcola creatura umana, e cussì no ne comove la so morte.
Caro Maurizio Costanzo Show, la vita la xe na manifestasion de la matèria che ne par afasinantìsima, parché ghe fasemo parte, e al liveło pì alto, secondo quełe che xe le nostre conosense de deso. Ma tuti i valori che asegnemo i xe proiesion dei nostri archetipi, dei nostri preconceti, del nostro pensar par categorie. E tuti i lìmiti de la cosiensa che gavemo de queło che esiste e de queło che vive, i xe proporsionali a'l spasio mental che gavemo. I valori asoluti i xe chimere, e chi li profesa el inbroja a se steso e ai altri.
L'asion de proietar i so valori umani su queło che del mondo uman no'l xe, la ga un nome preciso: Antropomorfismo.
I animalisti i xe i perfeti guerieri de l'antropomorfismo. No i xe i soli, purtropo. Ancuo gavemo parlà de lori. Chisà se i se xe incasà.

Roberto Quaglia