tu ca hai sempri dittu beddi paroli contra l’usanza ca regna di nu bonu 1% dâ pupulazioni giuvanili taliana di s’infilzari li carni cu ’na siringa pi si jènchiri lu sangu di eroina, m’ascutirài di certu ora ca mi mettu a ti cunfidari la sèmplici spiegazioni supra li causi di stu fenòminu ca ju aju datu a mia stissu.
Caro Maurizio Costanzo Show, si’ ’na Divinità Bona, dici cosi boni contra la cultura dâ droga e chidda dâ mafia, pi menzu Tuo e pi menzu di Tia si specchianu li punti di vista cuntrari e si forgia lu mutèvoli telaru di sìmbuli supra lu quali jornu doppu jornu si custruisci e si trasforma la sociità taliana... e putissi cuntinuari cu strunzati simìli pi uri e ’mmeci passu sùbbitu ô dunqui.
’N paroli pòviri: Pirchì li giuvani si dròganu? Pirchì nun si dròganu puru li vicchiareddi? Oppuru sulu li vicchiareddi? O li mìdici, ca si vògghinu la droga ci l’hannu puru â manu? E pirchì nun tutti li giuvani si dròganu? Pirchì nun s’è mai datu lu casu di nu pallunaru di serii A ca addiventa eroinòmani? ’Nzumma, pirchì ’n certi categurii di pirsuni ci si droga e ’n àutri no?
Sì sì l’emarginazioni la mancanza di valuri e chiddi cosi ddà... nn’avemu ’ntisu parrari migghiara di voti, ma cuntinuamu a diri a nuiautri e ê àutri ca ’n funnu ’n funnu propriu nun capemu comu unu possa dicidiri di accuminzari a si bucari, cuncludemu ca cu’ si buca sbagghia e basta, e accussì voli diri ca nun avemu capitu nenti. Pruvamunì a modu miu, cu n’approcciu liggermenti diversu dâ sòlita recita di ddi dui o tri cuncetti triti e ritriti.
Rindemunì prima di tuttu cuntu ca l’essiri umanu è n’organismu suciali. Ô cuntrariu di ’na petra, ca si la levi dâ spiaggia, dâ cumpagnia di li àutri petri, e la metti sula ntô spaziu vàcuu ’n òrbita attornu â terra, ddà si ni sta bona senza si lagnari nè suffriri puru pi cincu miliardi di anni (e doppu lu suli - a diri dî dotti - si spannirà agghiuttennu e addigirennu la terra e puru la petra nostra), l’essiri umanu, si lu pigghi e lu metti nu pocu sulu accumincia quasi sùbbitu a suffriri. Ô cuntrariu dâ petra, l’essiri umanu havi ’na vita suciali. Chi significa? Voli chistu diri ca a l’essiri umanu ci piaci a jiri ê festi ntâ auta sociità? O puru ’n chidda media? Puru.
’N realtà voli diri assai di cchiù.
Lu fattu ca l’Omu (e la Fimmina nun è di menu) havi ’na vita suciali significa ca senza vita suciali nun po’ vìviri. Chi è allura la vita suciali?
Essenzialmenti, la vita suciali è lu fattu di fari quarchi cosa ’nsemi cî àutri. Si taliamu cchiù attentamenti, videmu ca lu cuncettu di vita suciali implica lu fattu di fari quarchi cosa pi li àutri. Attinzioni: nun staju circannu di cuntrabbandari nudda ideali pseudo-piu. Pi li àutri agisci la crocerossina comu pi li àutri agisci lu boia. Semplicimenti, nun stannu servennu li stissi "àutri". Robin Hood arrobba ê ricchi, ma runa ê pòviri. Lu tìpicu pulìticu arrobba ê pòviri, ma runa ê ricchi. Ca l’essiri umanu sia n’animali suciali significa ca cu’ sia havi a essiri útili a quarchidunu àutru. L’assassinu nun è certu útili â sò vìttima, ma lu è ô mandanti. Lu pulizziottu nun è certu útili ô mariolu, ma lu è ô cittadinu. Quannu li pulizziotti, li pulìtici e li jùdici nun su’ útili ô cittadinu voli diri ca su’ currutti, e allura su’ útili ê currutturi. Quarchi vota lu carnefici è addirittura útili â sò vìttima, comu ntê rapporti sado-masuchìstici (e lu film "Portiere di notte" di Liliana Cavani è di stu casu nu sublimi esempiu). Ogni essiri umanu dâ terra, pi si sentiri liggittimatu a esistiri, havi a essiri útili a quarchidunu àutru. Puru l’eremita, pi sò decisioni luntanu di tutti li essiri umani havi spissu ligami cu quarchi animali, ca ci jènchi lu bisognu di si sentiri útili a quarchidunu.
Quannu n’essiri umanu pensa di nun essiri (cchiù) útili a nuddu, senti ca la sò vita nun havi nuddu sensu e spissu s’accidi iddu stissu.
Ma, spicialmenti quannu unu è giuvani, prima di s’accidiri s’i prova tutti. Quannu unu è giuvani l’impirativu è chiddu di s’inseriri ntâ sociità, truvari una o cchiù funzioni di ’ncarnari, e supra chiddi furgiari la propria ancora inesistenti identità di individuu adultu, ’nsemi ô postu dâ identità nun cchiù vàlida di picciriddu o adolescenti. S’i prova tutti partennu di l’àutu, dî funzioni cchiù elevati ca pàrinu â propria purtata. Si cìrcanu boni amicizii, nu bonu travagghiu, nu bonu rapportu sintimintali. Si nun si trova nenti e nuddu ca mostri di aviri bisognu di nuiautri, s’abbàssanu li pritisi. Si puru abbassannu li pritisi unu resta sulu e inútili, si cerca ancora cchiù ’n bassu, si scinni e si scinni e si scinni, fina a quannu ’n funnu â scala suciali, quannu ormai, pi via dî tanti ’nsuccessi, l’amarizza e la raggia règnanu suvrani, ecco finalmenti ’na microsociità di àutri arraggiati e traduti ca finalmenti t’accèttanu, ca finalmenti hannu bisognu di tia. Ecco li tòssici e ecco, suprattuttu, li spacciaturi e li ’nvisìbbili narcutrafficanti luntani. Li spacciaturi hannu bisognu di tia, di tia ca si’ senza funzioni e identità e stai circannu tutti e dui. Hannu bisognu di tia e tu, ca si’ senza identità adulta, ca nun trovi nuddu àutru ca ti runa ’na identità adulta avennu bisognu di tia, ca nun trovi àutri ca si vàlganu dâ tò esistenza, tu, senza àutra scelta, sceggi l’única scelta ca hai.
Nun è certu chidda ca aju fattu ’na anàlisi cumpleta dû fenòminu droga. Vari àutri approcci su’ lu stissu vàlidi. Ma l’hannu già fatti àutri e nun m’è parsa chista la sedi pi l’arripetiri. Lu miu è sulu unu dî possibìli modi di vidiri chiddu ca succedi. L’aju ccà espostu, umilmenti, davanti â cchiù putenti dî divinità muderni. Ca ognunu agghiunci lu miu puntu di vista ê propri, pirchì è sulamenti arricugghiennu di dintra sé lu cchiù numuru di punti di vista ca ognunu si po’ avvicinari sempri cchiù â sfuggenti e infinitamenti luntana perfetta comprinsioni dî cosi.

Roberto Quaglia