scusa se dago el tìtolo a la létera come el ga fato umbertoeco col so libro, ma tanto queł tìtolo no'l ghe intrava gnente col so libro cussì come el steso no'l ghe intra gnente co la me létera. Elo inte la so sapiensa e mi inte la me ignoransa gavemo fato la stessa cosa.
Ogni tanto che me casca l'ocio sora tante de quełe me létere tute piene de parołe che no capisso e frasi che capisso anca manco de le parołe, penso che ghe vol propio che qualche volta te scriva anca qualchedun come mi, pì sénplice e anca sincero, almanco credo. Mi lo so che i me dize che son propio la stessa persona che scrive anca tute quełe létere cussì intrigà, e me dispiaze anca se son contento. E se vede benìssimo che lo so parché za al scomensamento digo che me casca l'ocio sora le me létere, cussì se capisse che mi so che le xe me, o comunque lo capisso mi e questo me basta.
Go leto na volta su la carta de un ciocolatin che noaltri tuti quanti (le persone) semo anca parece identità tute in na volta o pì presto a turno. El ga qualcosa da far co la psicanàlisi, queła siensa inventà da Froid. Par mèrito de Froid mi alora so che qualche volta scrivo robe tute intrigà, con anca le parołe difìsili e le frasi ancora de pì, e le altre volte come ancuo no rivo a capir na aca de queło che me ricordo che anca go scrito mi. El xe bufo, vero, caro Maurizio Costanzo Show?
Go visto inte la television un bel film che'l se ciamava "I due mondi di Charlie", che'l parlava de un semo che i ghe fa na cura par diventar la persona pì inteligente del mondo e elo la diventa davero, ma a la fine el torna semo, e quando el torna semo el se ricorda però che'l gèra stà inteligente, e anca se no'l capisse gnente de quełe parołe e frasi che'l ga scrito da inteligente el fato de èser stà inteligente ne piaze isteso anca deso da semo. Mi go visto el film, ma me ricordo che la persona che son da inteligente (tuto questo el xe strano, vero?) la gaveva anca leto el libro, che'l se ciamava e forsi el se ciama ancora "Fiori per Algernon". Se par caso ghe xe qualchedun inteligente che leze ghe consijo de lèzer el libro, par tuti i altri come mi el xe mèjo vardar el film che tanto la storia la xe la stessa e la va anca a finir del steso modo. L'autor del libro el se ciama Daniel Keyes, lo digo parché al to show se usa dir i nomi de queli che scrive i bełi libri, e anca se mi no li go leti i libri che ti dizi senpre che i xe bełi mi ghe credo davero che i xe tuti asè bełi parché me lo ga dito el me portier che'l se ne intende.
La me vita la xe beła, caro Maurizio Costanzo Show. Son contento de èser la persona che son, e son contento de èser anca queła che no son. Spero che no sto fasendo confusion. Vojo dir che me piaze anca che qualche volta son inteligente (credo che i inteligenti i xe queli che parla co le parołe tute difìsili e le frasi ancora de pì), parché son convinto che èser inteligente el ga da èser na cosa bona. Ghe xe però na cosa che me dà un fià de fastidio, in sto fato de èser inteligente a turno. Mi me sento mi steso, naturalmente, e so che questo el xe justo parché se uno no'l se sente elo steso in pràtica el xe malà, credo che anca qua ghe xe la manéta de Froid. Visto che son inteligente a turno, e deso no lo son, mi me domando cosa che sucede con mi quando no son mi? La carta del ciocolatin la dize che semo tuti quanti asè persone, questo lo go capìo. E alora, quando mi no son mi steso parché son qualchedun altro (par esenpio l'inteligente), indove vago a finir mi? (ovaro queło che son deso?) Sta cosa go da dir che la me dà un fià de fastidio. Spero che no pensè che son inteligente contra la me volontà.
Qualche volta forsi son anca pì sénplice de ancuo, ma no lo so. Chi sa se quando son inteligente me ricordo che mi son anca cussì come deso, ovaro asè mèjo (a parlar umanamente), ma pì sénplice.
Quando son come son deso me domando anca cosa che'l vol dir èser inteligente, esatamente. E se uno el se studia a mente tute le parołe difìsili e anca le frasi che se ga da saver par èser inteligente, dopo vol dir che cussì se xe diventà inteligente? Me domando se me domando ste domande anca quando son inteligente, e se naturalmente me riva la risposta visto che alora son inteligente. E me domando se quando son inteligente me domando se quando son come deso me domando la stessa domanda che me son domandà. Son asè seméto, vero?
Mi ghe penso cussì asè che oramai ne son sicuro che i gavaria da dar un sertificato par èser inteligente. Ovaro in pràtica che se va a l'anàgrafe e come se domanda par saver la data de nàsita propia e la residensa e se uno el xe sposà e quełe robe là, se domanda anca se ghe xe la inteligensa propia o no. I me ga dito che in America i lo fa, ma là i xe avanti su tute le robe. El saria còmodo par tuti saver se uno el xe inteligente o no o forsi (el xe vero: pol èser che uno el pol èser "forsi" inteligente, come anca le persone sensa casa fissa no se sa indove i àbita, epuro da qualche parte i àbita anca lori). Na persona che la va a l'anàgrafe ghe domanda un sertificato de inteligensa e cussì po' la sa esatamente se la xe inteligente de sicuro, se la lo xe forsi o se no la lo xe. El saria un bel progreso sivil. I podaria scrìverlo anca su la carta de identità. Tuti i pol véder sùbito che go i oci e i cavéi maroni, anca sensa lèzer su la carta de identità "oci: maroni", "cavéi: maroni". El saria pì còmodo se invese de ste fessarie ghe gavaria da star scrito "inteligente: sì/no/forsi" (naturalmente no tuti tre insieme se no semo al punto de partensa).
Ma alora a mi cosa che i gavaria da scrìver su la carta de identità? Mi so che no son inteligente, parché no son semo, son soło sénplice. Ma so anca che in altri zorni invese lo son, senpre par colpa de Froid e de le so teorie. Alora cosa che i ga da scrìver su sta carta? "Inteligente: un fià sì e un fià no"? Ma no saria vero. Mi no son un fià inteligente e un fià no. El xe che son asè persone, o almanco pì de una, come Froid el inpara. Na persona che son so che la xe inteligente, n'altra persona che son (tra l'altro propio in sto momento) so che no lo son (inteligente). Alora questo vol dir che forsi go bisogno de pì de una carta de identità? Ma no xe proibìo gaver pì de una carta de identità? No xe obligatorio èser soło na persona? Credo propio de sì e alora son fora de la leze, ma no lo fasso aposta. E se i me ciapa intanto che fasso sto reato, cosa che i me fa? E se i ciapa la persona che mi son quando son inteligente? Mi penso che'l xe tuta colpa de la persona che mi son quando son inteligente. El gaveva da pensarghe elo a desligar sto guaio, visto che'l xe propio inteligente. Che colpa ghe go mi, soratuto a paragon de elo? Forsi, però, el xe propio parché el xe inteligente che'l ga da senpre pensar a qualcos'altro. Se elo el pensa queło che penso mi, vol dir che no'l xe tanto inteligente. E alora chi ne salva? No ghe capisso pì gnente. Qualchedun el me pol aiutar?

Roberto Quaglia