scüsa se doo el titol a la lettera come el gh'ha faa umbertoeco col sò liber, ma tant quell titol el gh'entrava nagott col sò liber inscì come istess el gh'entra nagott con la mia lettera. Lü in la soa sapienza e mì in la mia ignoranza emm faa la stessa roba.
Ogni tant che me càsca l'œucc sü tanti de quii mè letter tütt piena de parol che capissi minga e fras che capissi anca men di parol, pensi che ghe voeur propri che quaic voeulta te scriva anca quaicedun come mì, pussee sempi e anca sincer, almen credi. Mì el soo che me disen che sont propri la stessa persòna che la scriv anca tütt quii letter inscì imbroiaa, e me dispias anca se sont content. E se vede benissim che el soo perché giamò al començament disi che me càsca l'œucc sü i meje letter, inscì se capiss che mì soo che hinn mè, o comunque el capissi mì e quest el me basta.
Hoo legiüü ona voeulta sü la carta de on ciocolatin che nün tütt quant (i persònn) semm anca paricc identità tütt in ona voeulta o pussee prest a turno. El gh'ha quaicoss a che fà con la pissicanàlisi, quela scienza inventada de Froid. Per merit de Froid mì alora soo che quaic voeulta scrivi robb tütt imbroiaa, con anca i parol dificil e i fras ancamò de pü, e i alter voeult come incoeu rivi minga a capì on'acca de quell che me regordi che anca hoo scrivüü mì. L'è bufo, ver, car Maurizio Costanzo Show?
Hoo vist in la television on bell film che el se ciamava "I due mondi di Charlie", che el parlava de on scem che ghe fann ona cüra per diventà la persòna pussee inteligent del mond e lü el la diventa denver, ma a la fin el torna scem, e quand el torna scem el se regorda però che l'era staa inteligent, e anca se el capiss nagott de quii parol e fras che el gh'ha scrivüü de inteligent el fatt de vess staa inteligent ghe pias istess anca adess de scem. Mì hoo vist el film, ma me regordi che la persòna che sont de inteligent (tütt quest l'è stran, ver?) l'aveva anca legiüü el liber, che el se ciamava e forsi el se ciama ancamò "Fiori per Algernon". Se per cas gh'è quaicedun inteligent che el leng ghe consili de leng el liber, per tütt i alter come mì l'è mej vardà el film che tant la storia l'è la stessa e la va anca a finì del stess mœud. L'autor del liber el se ciama Daniel Keyes, el disi perché al tò show se üsa a dì i nòm de quii che scriven i bej liber, e anca se mì i hoo minga legiüü i liber che tì te diset semper che hinn bej mì ghe credi denver che hinn tütt assee bej perché el m'ha ditt el mè portinar che el se ne intend.
La mia vita l'è bela, car Maurizio Costanzo Show. Sont content de vess la persòna che sont, e sont content de vess anca quela che sont minga. Speri che sto minga fasend confusion. Voeuri dì che me pias anca che quaic voeulta sont inteligent (credi che i inteligent hinn quii che parlen con i parol tütt dificil e i fras ancamò de pü), perché sont convint che vess inteligent el gh'ha de vess ona roba bona. Gh'è però ona roba che la me dà on poo de fastidi, in sto fatt de vess inteligent a turno. Mì me senti mì istess, naturalment, e soo che quest l'è giüst perché se vün el se sent minga lü istess in pràtica l'è malaa, credi che anca chì gh'è la manina de Froid. Vist che sont inteligent a turno, e adess el sont minga, mì me domandi coss el sücced con mì quand sont minga mì? La carta del ciocolatin la dis che semm tütt quant assee persònn, quest l'hoo capii. E alora, quand mì sont minga mì istess perché sont quaicedun alter (per esempi l'inteligent), indove voo a finì mì? (ovèro quell che sont adess?) Sta roba gh'hoo de dì che la me dà on poo de fastidi. Speri che pensee minga che sont inteligent contra la mia volontà.
Quaic voeulta forsi sont anca pussee sempi de incoeu, ma el soo minga. Chi sa se quand sont inteligent me regordi che mì sont anca inscì come adess, ovèro assee mej (a parlà ümanament), ma pussee sempi.
Quand sont come sont adess me domandi anca coss el voeur dì vess inteligent, esatament. E se vün el se stüdia a ment tütt i parol dificil e anca i fras che se gh'ha de savè per vess inteligent, dopo el voeur dì che inscì se è diventaa inteligent? Me domandi se me domandi sti domand anca quand sont inteligent, e se naturalment m'arriva la risposta vist che alora sont inteligent. E me domandi se quand sont inteligent me domandi se quand sont come adess me domandi la stessa domanda che me sont domandaa. Sont assee scemet, ver?
Mì ghe pensi inscì assee che oramai ne sont sicür che gh'avaríen de dà on certificaa per vess inteligent. Ovèro in pràtica che se va a l'anàgraf e come se domanda per savè la data de nàscita propria e la residenza e se vün l'è sposaa e quii robb là, se domanda anca se ghe l'inteligenza propria o no. M'hann ditt che in America el fann, ma là stann innanz sü tütt i robb. El saría còmod per tücc savè se vün l'è inteligent o no o forsi (l'è ver: el pö vess che vün el pö vess "forsi" inteligent, come anca i persònn senza cà fissa se sa minga indove àbiten, eppür in quaic part àbiten anca lor). Ona persòna che la va a l'anàgraf la ghe domanda on certificaa de inteligenza e inscì la pö savè esatament se l'è inteligent de sicür, se el l'è forsi o se el l'è minga. El saría on bell progress civil. Podaríen scrìvel anca sü la carta de identità. Tücc poden vedè sübit che gh'hoo i œucc e i cavij maron, anca senza leng sü la carta de identità "œucc: marrune", "cavij: marrune". El saría pussee còmod se inveci de sti fessarie ghe gh'avaría de stà scrivüü "inteligent: sì/no/forsi" (naturalment minga tütt e trii insema se semm minga al pont e a cap).
Ma alora a mì coss el gh'avaríen de scriv sü la carta de identità? Mì soo che sont minga inteligent, perché sont minga scem, sont domà sempi. Ma soo anca che in alter dì inveci el sont, semper per colpa de Froid e di sò teorie. Alora coss el gh'hann de scriv sü sta carta? "Inteligent: on poo sì e on poo no"? Ma el saría minga ver. Mì sont minga on poo inteligent e on poo no. L'è che sont assee persònn, o almen pussee de vüna, come Froid el impara. Ona persòna che sont soo che l'è inteligenta, on'altra persòna che sont (tra l'alter propri in sto moment) soo che el sont minga (inteligent). Alora quest el voeur dì che forsi gh'hoo bisogn de pussee de ona carta de identità? Ma l'è minga proibii avègh pussee de ona carta de identità? L'è minga obbligatori vess domà ona persòna? Credi propri de sì e alora sont foeura de la legg, ma el foo minga aposta. E se me ciàppen intant che foo sto reaa, coss el me fann? E se ciàppen la persòna che mì sont quand sont inteligent? Mì pensi che l'è tüta colpa de la persòna che mì sont quand sont inteligent. El gh'aveva de pensàgh lü a desligà sto guaio, vist che l'è propri inteligent. Che colpa ne gh'hoo mì, soratutt a paragon de lü? Forsi, però, l'è propri perché l'è inteligent che el gh'ha de semper pensà a quaicoss'alter. Se lü el pensa quell che pensi mì, el voeur dì che l'è minga tant inteligent. E alora chi ne salva? Ghe capissi pü nagott. Quaicedun el me pö aiütà?

Roberto Quaglia