vün di mit modern che la Television la ne porta l'è l'umorismo. On alter di mit che incàlzen l'è el lenguagg volgar. Mit de adess che el sta cressend l'è anca la farneticazion, ciar sìmbol positiv (e in part, se capiss, contrastaa) de la non-conformità. Perché me rivolgi a tì, Maurizio Costanzo Show, sìmbol ideal de la Società Televisiva Italiana, e rivolgèndom a tì e per mezz de tì mì adess virtualment parli a l'Italia intrega, l'è ütil a mì e al letor-utent che mì lassi minga de part sti trii mit che spónten, e inscì con coerenza mesedi, de quand in quand, in questa o in di letter che vègnen o che hinn passaa, la mia prosa de semantem modern e allegher, se poeu sproloquiand. Insomma, che mì ficchi in mezz ai righ quaic element de turpiloqui, intars de delirni a tema, quaic bela fredüra e, pussee rar, quaic fina batüda. Inscì, tant per començà, l'è ora che la finissi de parlà in mœud intorciaa, e che i mè fras diventen pussee sempi e ciar, e anca i concett pussee ciar, pussee banai, pussee democràtich, pussee visin a la gent. Perché sti mè letter che mì te mandi, a la fin, diventen forsi on liber che quaicedun, legend sti righ, forsi el sta giamò legend dopo che el se l'ha compraa o faa imprestà de on amis o avüü in regal per Natal de la nonna atirada del titol che el fa gola, voraría mai che poeu pensàssen che voeuri fà l'intelletüal come tanti alberoni e che el liber l'è ona menada de matt e che in pràtica ghe hoo fregaa i danee del prezz del liber, perché de fatt el liber el costava ona cifra come oramai tütt i liber, e poeu in del liber, ovèro chì dent (quand sta lettera la sarà part de on liber), se capiss minga ona fava de quell che disi e l'era mej compràll minga, inscì voraría mai che a la fin se pàssen la parola e el liber se el compra nissün. Ecco, l'era mej se favi ona fras pussee cürta, l'è che quand començi a parlà me lassi portà de l'entusiasmo e soratutt di parol, in del sens che ne scrivi ona cifra tütt de fila e a la fin me trœuvi con certi fras inscì longh come quela de primma e comunque anca questa chì la schèrza minga.
Disevi che sta lettera l'è ona lettera, perché denver mì sto adess scrivend ona lettera e gh'hoo giamò pronta anca la busta, eppür l'è anca on tòcch de on liber, perché te giüri che ne foo on liber, e chi el gh'ha giamò in man el sa. Quaic voeulta disi robb seri, perché on alter di mit matt che la Television la ne ha imparaa l'è che l'è important dì robb seri. Sto mit a nün la ne l'ha imparaa la Television, ma se tratta de on mit antichissim. Quand la Gesa la gh'aveva l'hobby de l'Inquisizion, l'aveva portaa a l'estrem l'art de ciapà tütt sül seri, e de fatt se spassava nissün. Adess per fortüna, con l'aiüt de la Television, gh'è on mit per tütt i fadigh umann che te pœudet imaginà, come per esempi johnholmes, el mort porno attor che el gh'aveva lóngh 35 cm, a chi elioelestorietese el gh'ha dedicaa ona canzon. johnholmes l'è on mit modern, mentre la serietà l'è on mit antich col saor ver, come la vecchiaromagna (no, l'era el montenegro). Inscì, per vess minga acusaa de discriminazion mitològica, saroo spess seri, in sti letter, e spess el saroo minga. Saroo spess spess (che l'è el contrari de sotil, come el dott. Amato), ovèro spess in di contegnüü, e saroo spess sotil (ma minga come el dott. Amato), sotil in di contegnüü, qualunque roba sta sconsolada agetivazion la voeur dì, in la ment de chi el sta legend.
Chi el gh'avess esaminaa, primma de questa, i doe letter de primma scrivüü de mì - che l'esaminador el sia on funzionari del Maurizio Costanzo Show, che el sia inveci el letor del liber de cui sta lettera la füss part - el gh'avarà de sicür notaa gross diferenz de stil e de tema tra i letter de primma e questa. El podeva vess parüü, legend i prim doe, che mì gh'avevi in ànim de fà quaic sorta de sagg sora i fantasios roeul simbòlich che la Television la tegnaría in del cœur de la nostra società. Sbagliaa. Sont minga assee savi per scriv on sagg ver, e a la par sont assee savi per mèttem minga a scriv on sagg. I mè studi hinn staa tropp scars per dàm i titoi che el saría ben che el se meta on aspirant saggista, e quest mì el soo benissim, e inscì cadi minga in la trapola de vorè confezionà on sagg. De on alter cant, e anca inscì, mì denver esisti, minga domà perché cogitoergosum, ma anca perché l'anàgraf el certìfica con gran convinzion, e chiunque, fin a quand mì sostegni de vess viv, el pö fàss ona bela fila a l'anàgraf per controllà, trovàndonn conferma. E anca, ogni voeulta che me vardi a la specera me revedi, e oramai ghe credi propri che quell là sont mì, ovèro quaicedun che denver esist ver ver. Esistend, m'è capitaa anca de pensà, e l'invenzion di strüment mecànich de scritüra (come el computer) me aiüten minga a evità de mett negher sü el bianch el frütt del camin del mè pensà. Ecco inscì sti letter e - a on alter livell - sto liber. Sti sequenz de letter, parol, fras, pagin sempliciament scatürissen de quell gran casin de proton, neutron e eletron che miss in órdin a on cert mœud fann el cosidett "mì", el cosidett Roberto Quaglia. Scatürissen de Roberto Quaglia dirett in mezz a tì, el totem, el Maurizio Costanzo Show, el pèrno e cœur de quela che mì ciami la Società Televisiva Italiana. Tì òmm italian che te leget sti righ e in la ment de chi quii sónen, lassand l'eco del lor significaa, sàppel che minga a tì hinn staa de mì indirizzaa primma de tütt, ma al noster pont de riferiment comün che se pö minga fànn a men: el Maurizio Costanzo Show. Quand a fà la mediazion de la comunicazion tra i òmm l'era la religion, i concett entràven mej in l'interlocutor se mesedaa con rinforzativ sacr come la espression "sediovuole", Incoeu el rinforzativ pussee sacr e inscì pussee efficient l'è el nominà el Maurizio Costanzo Show. Se domandass, chiunque el sta legend sti righ: i staría lü (o lee) legend se mì i avess minga primma ditt denanz e a gran vos la parolina màsica "Maurizio Costanzo Show"?

Roberto Quaglia