unu dî miti muderni ca la Tilivisioni ni porta è l’umurismu. N’àutru dî miti ’ncalzanti è lu linguaggiu vulgari. Recenti mitu muntanti è puru la farniticazioni, evidenti sìmbulu pusitivu (e ’n parti, ovviamenti, cuntrastatu) dâ nun-cunfurmità. Pirchì mi rivolgiu a tia, Maurizio Costanzo Show, sìmbulu ideali dâ Sociità Tilivisiva Taliana, e rivulgennumi a tia e pi menzu di tia ju ora virtualmenti parru a l’Italia sana, è útili a mia e ô litturi-utenti ca ju nun lassu di parti sti tri miti emergenti, e accussì cu coerenza addobbu, di quannu ’n quannu, ’n chista o ntê lettiri futuri o passati, la mia prosa di semantemi muderni e ìlari, possibbilmenti sproluquiannu. ’N àutri paroli, ca ju ficcu tra li righi sporàdici elimenti di cuntinutu turpiluquiu, ’ntarsi di deliri a tema, quarchi bedda friddura e, cchiù raramenti, quarchi fina battuta. Accussì, tantu pi accuminzari, è ora ca la finìsciu di parrari ’n modu cuntortu, e ca li mei frasi addivèntinu cchiù sèmplici e chiari, e puru li cuncetti cchiù chiari, cchiù banali, cchiù dimucràtici, cchiù vicini â genti. Pirchì sti mei lettiri ca ju ti mannu, â fini, addivèntanu fòrsi nu libbru ca quarchidunu, liggennu sti righi, fòrsi già sta liggennu doppu ca s’u ha accattatu o fattu ’mprestari di n’amicu o avutu ’n rigalu pi Natali dâ nanna attirata dû tìtulu ca fa gula, nun vurrìa mai ca po’ pinsassiru ca vogghiu fari l’intillittuali comu li tanti alberoni e ca lu libbru è ’na minata di pazzi e ca ’n pràtica ci aju futtutu li dinari dû prezzu dû libbru, pirchì defatti lu libbru custava ’na cifra comu ormai tutti li libbra, e po’ dintra ô libbru, cioè ccà dintra (quannu sta lettera sarà parti di nu libbru), nun ci si capisci ’na fava di chiddu ca dicu e era megghiu nun l’accattari, accussì nun vurrìa mai ca â fini si pàssanu la parola e lu libbru nun s’u accatta nuddu. Ecco, era megghiu si facia ’na frasi cchiù curta, è ca quannu accumìnciu a parrari mi lassu purtari di l’intusiasmu e suprattuttu di li paroli, ntô sensu ca ni scrivu ’na cifra tutti di fila e â fini mi trovu cu certi frasi accussì longhi comu chidda di prima e comunqui puru chista ccà nun scèrza.
Dicia ca sta lettera è ’na lettera, pirchì ’n effetti ju staju ora scrivennu ’na lettera e aju già pronta puru la busta, eppuru è puru nu pezzu di nu libbru, pirchì ti giuru ca ni fazzu nu libbru, e cu’ l’havi già ’n manu lu sapi. Certi voti dicu cosi serii, pirchì n’àutru dî miti di pazzi ca ni ha ’nsignatu la Tilivisioni è ca è impurtanti a diri cosi serii. Stu mitu a nuiautri ni l’ha ’nsignatu la Tilivisioni, ma si tratta di nu mitu antichissimu. Quannu la Chiesa avia l’hobby di l’Inquisizioni, avia purtatu a l’estremu l’arti di pigghiari tuttu sû seriu, e defatti nun si divirtiva nuddu. Ora pi furtuna, cu l’aiutu dâ Tilivisioni, c’è nu mitu pi tutti li attività umani immaginabbili, comu pi esempiu johnholmes, lu defuntu pornu atturi ca l’avia longu 35 cm, ô quali elioelestorietese ha didicatu ’na canzuni. johnholmes è nu mitu muderni, mentri la sirietà è nu mitu anticu dû sapuri veru, comu la vecchiaromagna (no, era lu montenegro). Accussì, pi nun essiri accusatu di discriminazioni mitulògica, sarò spissu seriu, ’n sti lettiri, e spissu nun lu sarò. Sarò spissu spissu (ca è lu cuntrariu di suttili, comu lu dott. Amato), cioè spissu ntê cuntinuti, e sarò spissu suttili (ma nun comu lu dott. Amato), suttili ntê cuntinuti, qualsiasi cosa sta incunsulta aggittivazioni possa vuliri diri, ntâ menti di cu’ sta liggennu.
Cu’ avissi esaminatu, prima di chista, li dui pricèdinti lettiri di mia scritti - ca l’esaminaturi sia nu funziunariu dû Maurizio Costanzo Show, ca sia ’mmeci lu litturi dû libbru di cui sta lettera fussi parti - avrà certamenti nutatu ’ntensi diffirenzi stilìstichi e temàtichi tra li pricèdinti lettiri e chista. Putissi essiri parutu, liggennu li primi dui, ca ju avissi ’n animu di pruduciri quarchi sorta di saggiu supra li fantumàtici ruoli simbòlici ca la Tilivisioni rivistirìa ntô senu dâ nostra sociità. Sbagghiatu. Nun sugnu abbastanza saggiu pi scriviri nu veru saggiu, e a paru sugnu abbastanza saggiu pi nun mi mèttiri a scriviri nu saggiu. Li mei studii su’ stati troppu scarsi pi mi dari li tìtuli di cui sarrìa bonu si addubbassi n’aspiranti saggista, e chistu ju lu sacciu benissimu, e accussì nun caju ntâ trappula di vuliri cunfizziunari nu saggiu. Di n’àutru cantu, e puru accussì, ju effettivamenti esistu, nun sulu pirchì cogitoergosum, ma puru pirchì l’anàgrafi lu certifica cu granni cunvinzioni, e cu’ sia, fina a quannu ju sustirò di essiri vivu, po’ s’affari ’na bedda cuda a l’anàgrafi pi cuntrullari, truvannunì cunferma. ’N cchiù, ogni vota ca mi taliu â specchia mi riviju, e ormai ci cridu propriu ca chiddu ddà sugnu ju, cioè quarchidunu ca effettivamenti esisti daveru. Esistennu, incidentalmenti m’è successu di pinsari, e l’invinzioni dî strumenti meccànici di scrittura (comu lu computer) nun m’aiutanu a evitari di mèttiri niru supra jancu lu fruttu dû caminu dû miu pinsari. Ecco accussì sti lettiri e - a n’àutru livellu - stu libbru. Sti sequenzi di lettiri, paroli, frasi, pàggini semplicimenti scàturanu di ddu gran casinu di prutuni, neutruni e elettruni ca misi ’n ordini a nu certu modu custituiscinu lu accussì dittu "me", lu accussì dittu Roberto Quaglia. Scàturanu di Roberto Quaglia dirittamenti versu di tia, lu totem, lu Maurizio Costanzo Show, lu pèrnu e cori di chidda ca ju chiamu la Sociità Tilivisiva Taliana. Tu umanu talianu ca leggi sti righi e ntâ cui menti chiddi sònanu, lassannu l’eco dû sò significatu, sappi ca nun a tia su’ stati di mia diretti ’n prima istanza, ma ô nostru punto di rifirimentu cumuni ca nun si po’ fari a menu: lu Maurizio Costanzo Show. Quannu a mediari la comunicazioni tra li omini era la riligioni, li cuncetti pinitràvanu megghiu ntâ interlocuturi si addubbati cu raffurzativi sacri comu la sprissioni "sediovuole", Oggi lu raffurzativu cchiù sacru e accussì cchiù efficienti è lu nnuminari lu Maurizio Costanzo Show. Si dumannassi, cu’ sia sta liggennu sti righi: li starrìa iddu (o idda) liggennu si ju nun ci avissi prima ricitatu davanti e a gran vuci la parulidda màgica "Maurizio Costanzo Show"?

Roberto Quaglia