unu de sos mitos modernos chi sa Televisione nos giughet est s'umorismu. Un'àteru de sos mitos chi incàltzant est su limbàgiu bulgare. Mitu de immoe chi est intzullende est fintzas sa farneticatzione, craru sìmbulu positivu (e in parte, si cumprendet, contrastadu) de sa no-cunformidade. Proite mi bòrgio a tie, Maurizio Costanzo Show, sìmbulu ideale de sa Sotziedade Televisiva Italiana, e borghèndemi a tie e in mesu de tie deo immoe virtualmente faeddo a s'Itàlia intrea, est ùtile a mie e a su letore-utente chi deo no lasse a banda custos tres mitos chi ispuntant, e gasi cun coerèntzia pertoco, de cando in cando, in custa o in sas lìteras chi benint o chi sunt coladas, sa prosa mia de semantemas modernos e allegros, mancari isprolochende. Insomma, chi deo fringa in mesu a sas rigas carchi elementu de turpilòchiu, intàrsios de delìrios a tema, carchi bella freddura e, prus raru, carchi fine batuda. Gasi, tantu pro cumintzare, est ora chi l'agabbo de faeddare a modu intortu, e chi sas frases mìas devenint prus simples e craras, e fintzas sos cuntzetos prus craros, prus banales, prus democràticos, prus a curtzu a sa gente. Proite custas lìteras mìas chi deo ti imbio, a sa fine, devenint fortzis unu libru chi calicunu, leghende custas rigas, fortzis giai est leghende a pustis chi si l'at acatadu o fatu imprestare dae unu amigu o tentu unu regalu pro Nadale dae sa mama manna atirada dae su tìtulu chi faghet gana, no dia chèrrere mai chi posca pensarent chi cherjo fàghere s'intelletuale comente medas alberoni e chi su libru est una macchìghine de macos e chi in pràtica lis apo futidu su dinari de su prètziu de su libru, proite de fatu su libru costaiat una tzifra comente oramai totu sos libros, e posca in su libru, o mègius inoghe intro (cando custa lìtera at a èssere parte de unu libru), no bi si cumprendet una faa de su chi naro e fiat mègius no lu acatare, gasi no dia chèrrere mai chi a sa fine si passant sa paràula e su libru no si l'acatat nemos. Eccu, fiat mègius si aia fatu una frase prus curtza, est chi cando cumintzo a faeddare mi lasso giughere dae s'entusiasmu e mescamente dae sas paràulas, in su sentidu chi nde iscrio una tzifra totu in fila e a sa fine m'agato cun tzertas frases gasi longas comente cussa de prima e comunque fintzas custa inoghe no brullat.
Naraia chi custa lìtera est una lìtera, proite a beru deo so immoe iscriende una lìtera e tèngio giai pronta fintzas sa busta, e tanti est fintzas unu petzu de unu libru, proite ti giuro chi nde fatzo unu libru, e chie lu tenet giai in manu lu ischit. Carchi borta naro cosas serias, proite un'àteru de sos mitos de macos chi nos at imparadu sa Televisione est chi est importante a nàrrere cosas serias. Custu mitu a nois nos l'at imparadu sa Televisione, ma si tratat de unu mitu antighìssimu. Cando sa Crèsia teniat s'hobby de s'Inchisitzione, aiat giutu a s'estremu s'arte de leare totu a seriu, e de fatu no s'ispassiaiat nemos. Immoe pro fortuna, cun s'agiudu de sa Televisione, b'est unu mitu pro totu sas fadigas umanas chi ti podes imaginare, comente pro esempru johnholmes, su mortu porno atore chi lu teniat longu 35 cm, a chie elioelestorietese at dedicadu una cantzone. johnholmes est unu mitu modernu, mentras sa seriedade est unu mitu antigu cun su sabore beru, comente sa vecchiaromagna (nono, fiat su montenegro). Gasi, pro no èssere acusadu de discriminatzione mitològica, apo a èssere a s'ispissu seriu, in custas lìteras, e a s'ispissu no l'apo a èssere. Apo a èssere a s'ispissu grussu (chi est su contràriu de sutile, comente su dot. Amato), o mègius grussu in sos cuntenutos, e apo a èssere a s'ispissu sutile (ma no comente su dot. Amato), sutile in sos cuntenutos, cale si siat cosa custa iscunsolada agetivatzione podet chèrrere nàrrere, in sa mente de chie est leghende.
Chie aeret esaminadu, primu de custa, sas duas lìteras de prima iscritas dae me - chi s'esaminadore siat unu funtzionàriu de su Maurizio Costanzo Show, chi siat imbetzes su letore de su libru de su cale custa lìtera esseret parte - at a àere de seguru notadu mannas diferèntzias de istile e de tema tra sas lìteras de prima e custa. Diat poder èssere pàrfidu, leghende sas primas duas, chi deo teniat in ànimu de fàghere carchi sorta de saggiu subra sos fantasiosos rolos simbòlicos chi sa Televisione diat tènnere in su coro de sa sotziedade nostra. Faddidu. No so bastante sàbiu pro iscrìere unu saggiu beru, e a paris so bastante sàbiu pro no mi pònnere a iscrìere unu saggiu. Sos istùdios mìos sunt istados tropu iscarsos pro mi dare sos tìtulos chi diat èssere bonu chi si pertocaret unu aspirante saggista, e custu deo l'isco benìssimu, e gasi no ruo in sa trampa de chèrrere cunfetzionare unu saggiu. Dae un'àteru cantu, e fintzas gasi, deo a beru esisto, no isceti proite cogitoergosum, ma fintzas proite s'anàgrafe lu tzertìficat cun gran cunvintzione, e chie si siat, fintzas a cando deo mantèngio de èssere biu, podet si fàghere una bella fila a s'anàgrafe pro controllare, agatèndende cunfirma. E fintzas, ogni borta chi m'abbàido a s'ispigru mi torro a bìdere, e oramai bi creo propiu chi cussu incue so deo, o mègius calicunu chi a beru esistit beru beru. Esistende, m'est capitadu fintzas de pensare, e s'imbentu de sos istrumentos metzànicos de iscritura (comente su computer) no m'agiudant a evitare de pònnere nieddu subra biancu su frutu de su caminu de su pensare meu. Eccu gasi custas lìteras e - a un'àteru livellu - custu libru. Custas sequèntzias de lìteras, paràulas, frases, pàginas semplicemente iscàturint dae cussu gran casinu de protones, neutrones e eletrones chi postos in òrdine a unu tzertu modu faghent su gasi naradu "me", su gasi naradu Roberto Quaglia. Iscàturint dae Roberto Quaglia deretu in mesu a tie, su totem, su Maurizio Costanzo Show, su pèrnu e coro de cussa chi deo tzèrrio sa Sotziedade Televisiva Italiana. Tue òmine italianu chi leghes custas rigas e in sa mente de chie cussas sonant, lassende s'eco de su significadu issoro, iscias chi no a tie sunt istadas dae me indiritzadas primu de totu, ma a su nostru puntu de riferimentu comune chi no si nde podet fàghere a mancu: su Maurizio Costanzo Show. Cando a fàghere sa mediatzione de sa comunicatzione tra sos òmines fiat sa religione, sos cuntzetos intraiant mègius in s'interlocutore si pertocados cun rinfortzativos sacros comente s'espressione "sediovuole", Oe su rinfortzativu prus sacru e gasi prus efitziente est su numenare su Maurizio Costanzo Show. Si preguntaret, chie si siat est leghende custas rigas: las diat èssere issu (o issa) leghende si deo no las aeret primu naradu ainnantis e a gran boghe sa paràuledda màsica "Maurizio Costanzo Show"?

Roberto Quaglia