ón di mît modêren che la Televiṡiån la s pårta l'é l'umoréṡum. Un èter di mît incalzànt l'é al lenguâg̈ vulghèr. Recänt mît montànt l'é anc la farneticaziån, evidänt sémbol poṡitîv (e in pèrt, oviamänt, contrastè) dla non-conformitè. Parché a m volż a té, Maurizio Costanzo Show, sémbol ideèl dla Societè Televiṡîva Itagliàna, e volżändum a té e atravêrs ed té mé adès virtualmänt a dscårr a l'Itâglia tótta, l'é ûtil a mé e al letåur-utänt ch'mé an prescénda brîṡa da sti trî mît emergänt, e dånca coerentemänt a adòbba, ògni tant, in quassta o/e int äli lêtri futûri o pasè, la mî pråṡa ed semantêmi modêren e ilèr, possibilmänt sproloquiänd. In ètri parål, ch'mé a ficca tra äli réghi sporâdich elemänt ed cuntgnó turpilåqui, intèrsi ed delîri a tèma, quèlch bèla fardûra e, pió raramänt, quèlch fén batûda. Dånca, tant par tachèr, l'é åura ch'a la fénnessa ed parlèr in môd contôrt, e ch'äli mî frèṡ äli dvänten pió sänzi e cièri, e anc i concèt pió cièr, pió banèl, pió democrâtich, pió vṡén ala zänt. Parché sti mî lêtri ch'mé a t mand, ala fén, äli dvantaràn fårsi un lîber che quelcdón, lżänd sti réghi, magâri l'é bèle drî a lèzer dåp avairsel cumprè o fâtel imprestèr da un amîgh o avairel ricevó in regâl par Nadèl dala nôna atirè dal titol aletànt, an vrévv mâi che dåp i penséssen ch'a vói fèr l'inteletuèl cme i vâri alberoni e che al lîber l'é una menè pazèsca e ch'in prâtica a i ò ciurlè i såld dal prêzi dal lîber, parché difâti al lîber al custèva un caṡén cme uramâi tótt i lébber, e dåp dänter al lîber, ważvàira qué dänter (quand sta lêtra la srà pèrt d'un lîber), an s capéss un câvol ed quall ch'a dâg e l'êra méi an cumprèrel brîṡa, dånca an vrévv mâi ch'ala fén i s pâsen la parôla e al lîber an s al cumpra inción. Ecco, l'êra méi s'a faṡêva una frèṡ pió curta, l'é che quand a tâc a parlèr a m lâs traspurtèr dal'entuṡiâṡum e såver tótt däli parål, int al säns ch'a i n scrîv un caṡén tótti ed fîla e ala fén a m artråv con däli frèṡ acsé lónghi cme cla ed prémma e comónqued anc quassta qué la n schêrza brîṡa.
A diṡêva che sta lêtra l'é una lêtra, parché in efèt mé a stâg adès a scrîver una lêtra e a i ò bèle prånta anc la bósta, epûr l'é anc un tòch d'un lîber, parché a t żûr ch'a i n farò un lîber, e chi al gh à bèle in man al al sa. Quèlch vôlt a dirò däli cås sêri, parché un èter di mît pazèsch ch'la s à insgnè la Televiṡiån l'é ch'l'é impurtànt dîr cås sêri. St'mît a nuèter a s l'à insgnè la Televiṡiån, mo as trâta d'un mît antichéssum. Quand la Cîṡa la gh avêva l'hobby dl'Inquiṡiziån, l'avêva cundótt a l'estrêm l'ârt ed ciapèr tótt in vatta al sêri, e difâti an s divertêva inción. Adès par furtóna, con l'aiût dla Televiṡiån, ai é un mît par tótti äli ativitè umèni imaginâbil, cme par eṡénpi johnholmes, al defónt porno atåur ch'al gh l'avêva lóng 35 cm, al quèl elioelestorietese l'à dedichè una canzåna. johnholmes l'é un mît modêren, mäntr la serietè l'é un mît antîgh dal savåur vaira, cme la vecchiaromagna (nå, l'êra al montenegro). Dånca, par an èser brîṡa taciè ed discriminaziån mitolågica, a srò spass sêri, in sti lêtri, e spass an al srò brîṡa. A srò spass gròs (ch'l'é al contrèri ed sutîl, cme al dutåur Amato), ważvàira gròs int i cuntgnó, e a srò spass sutîl (mo brîṡa cme al dutåur Amato), sutîl int i cuntgnó, qualsîasi cåsa sta inconsólta agetivaziån la påsa vlair dîr, int la mänt ed chi ch'l'é drî a lèzer.
Chi avéss eṡaminè, prémma ed quassta, äli då precedänt lêtri da mé redâti - sî l'eṡaminatåur un funzionèri dal Maurizio Costanzo Show, sî ló invêzi al letåur dal lîber ed cui sta lêtra la fóss pèrt - al avrà certamänt notè inténsi diferänz stiléstichi e temâtichi tra äli precedänt lêtri e quassta. Al psrévv èser paró, lżänd äli prémmi då, ch'mé a avéss in ânim ed produṡ quèlch sôrta ed sâg̈ in vatta ai fantomâtich rål simbålich che la Televiṡiån la rivestirévv in sén ala nostra societè. Sbaglè. An sån brîṡa abastanza sâvi par scrîver un vaira sâg̈, e parlelamänt a sån abastanza sâvi par an méttrum brîṡa a scrîver un sâg̈. I mî stûdi i én stè tröp scèrs par dèrum i titol ed cui al srévv bän ch'as adobéss un aspirànt sag̈ésta, e quasst mé a al sò benéssum, e dånca an câsc brîṡa int la trâpola ed vlair confezionèr un sâg̈. D'èter cânt, nunchè purtótavî, mé a eṡést efetivamänt, brîṡa såul parché cogitoergosum, mo anc parché l'anâgrafe la al certîfica con granda convinziån, e chiónqued, infén ch'mé a sustgnarò d'èser vîv, al på fères una bèla cåda a l'anâgrafe par cuntrolèr, truvànden confêrma. In pió, ògni vôlta ch'a m guèrd al spêć a m arvadd, e uramâi a i crädd pròpri che quall lé a sån mé, ważvàira quelcdón ch'efetivamänt al eṡésta par dabån. Eṡiständ, incidentalmänt m'é capitè ed pinsèr, e l'invenziån di strumänt mecânich ed scritûra (cme al computer) an m aiûten brîṡa a evitèr ed métter naigher in vatta al biânch al frót dl'itinerèri dal mî pinsèr. Ecco dånca sti lêtri e - a un èter livèl - st'lîber. Sti sequänz ed lêtri, parål, frèṡ, pâgini sänplizemänt äli gnånen fòra da chal gran caṡén ed protån, neutrån e eletrón che ordinè in un zêrt môd i costituéssen al acsé détt "me", al acsé détt Roberto Quaglia. I gnånen fòra da Roberto Quaglia direttamänt vêrs ed té, al totem, al Maurizio Costanzo Show, al fólcher e côr ed cla ch'mé a ciâm la Societè Televiṡîva Itagliàna. Té umàn itagliàn ch't lêż sti réghi e int la cui mänt äli risånen, lasänd l'êco dal så significhè, sâpi ch'an én brîṡa stè da mé dirèti a té in prémma istanza, mo al nåster imprescindébbil, inevitâbil pónt ed riferimänt comón: al Maurizio Costanzo Show. Quand a medièr la comunicaziån tra i òmen l'êra la religiån, i concèt i penetrèven méi int l'interlocutåur s'adobè con raforzatîv sècher cme l'espresiån "sediovuole", Incû al raforzatîv pió sècher e dånca pió efiziänt l'é la menziån dal Maurizio Costanzo Show. As dmanda, chiónqued al séppa drî a lèzer sti réghi: äli srévv ló (o äla) lżänd s'mé an i avéss previamänt recitè dnanz e a gran våuṡ la parulén'na mâgica "Maurizio Costanzo Show"?

Roberto Quaglia