mé a m volż a té, con un ategiamänt cumpâgn a chi - in èter tänp o in èter låghi - as volż ala divinitè, o a chi - in èter tänp o in èter låghi - as volż al confesåur o al psichanalésta o al rà o al preṡidänt o al câpotribó o al partî o a Satanâs. A m volż a té parché, de là däli definiziån pió åvi, té t pû èser cunziderè al miåur emblêma d'un'entitè uramâi imprescindébbil int la societè itagliàna: la Televiṡiån.
A m volż dånca a té dàndet l'identitè ch'am fa pió câmed dèret. A dialogarò con té fingänd con mé istàss ch't am scólt, e al savair ch'an é brîṡa acsé an am disturbarà brîṡa, parché in realtè a sò benéssum che té t an î brîṡa quall che par praticitè mé a fénż con mé istàss ch't séppa.
Chèr Maurizio Costanzo Show, csa t î, alåra? Parché t î impurtànt? Mo... t î impurtànt? Beh, in Itâglia tótt i dscårren spass ed té, e anc s'la semântica l'é un'opiniån, an consêgua ch't î impurtànt. Csa t î alåra? T î un progrâma televiṡîv? Indóbbiamänt sé. Al srévv ardimentåuṡ negèrel. Mo t î dabån såul un progrâma televiṡîv? Se té t fóss dabån såul un progrâma televiṡîv, in Itâglia an s dscurrévv acsé tant ed té, e té t an srévv brîṡa acsé impurtànt. Dåp tótt, la Televiṡiån itagliàna (con äli så centinèra ed progrâma locèl o nazionèl) l'é par al 99% zéppa ed progrâma televiṡîv che an én brîṡa al Maurizio Costanzo Show, la vétta reèl ed ognón ed nuèter l'é teoricamänt costitué par pió dal 99% da evänt ch'an én brîṡa televiṡîv, e ciò nonostànt té t ocupa un påst ed rilîv int la mänt dla magioranza di citadén itagliàn, e t dvänt adiritûra un'entitè imprescindébbil quand as päns e as descût a propôṡit ed tanti argomänt. Csa t î, dånca? L'é quall ch'a zercarò ed scuvrîr in sta mî lêtra, e såver tótt in cäli ch'i gnaràn drî int i dé e int i mîṡ futûr, ossî int äli ètri pâgini ed st'contenitåur.
Cme t vadd, chèr Maurizio Costanzo Show, mé a t ò aciapè cme sémbol par dialoghèr con mé istàss, almänc infén a quand quelcdón al m scoltarà. A srévv psó dṡrudlèr sti parål dåp l'intestaziån "Caro Diario..." o con la previa recitaziån d'un mantra religiåuṡ ch'am avréss avêrt a un'esperiänza méstica o dåp avair convgnó con un psichanalésta al prêzi dla så prestaziån ed stèr a scoltèr al svolgimänt di mî pinsîr.
Invêzi a i ò zêlt té.
An é brîṡa un câṡ. L'é un'inevitâbil deciṡiån, gnó fòra dala comprensiån dla tå modernitè rispèt ali ètri categorî simbålichi (Pèdertêren ecc.), dal riconoscimänt dl'iresistébbil valänza simbålica ch't è ràpidamänt aciapè in sén ala societè itagliàna.
Chèr Maurizio Costanzo Show, té t an î brîṡa una persåna, t an î brîṡa Maurizio Costanzo (l'umàn ch't à creè e batzè), t an î brîṡa l'impieghè o al funzionèri ch'al lêż sti lêtri al Maurizio Costanzo Show con al duvair ed zêrner, filtrèr, cestinèr. T î la Divinitè Modêrna, al Totem dal Vilâg̈, al Saçerdòt dal Reèl.
An vålen brîṡa quassti - äli mî - èser såul parolån gråsi ch'i fâghen efèt. Int äli lêtri ch'i gnaràn, a indagarò a fånd int i significhè ch'äli sarêghen. Mo an al farò brîṡa con la pomposité accadêmica ed chi à i titol e äli cattèdre ch'ai ränden lécita e duveråuṡa l'ostentaziån ed pomposité accadêmica. An sò ancåura cme al farò, mo a al farò a môd mî, qualsîasi cåsa sta frèṡ la våla dîr. Drî ali mî parål ai é un individui sänza titol accadêmich, sänza stûdi sistemâtich, sänza qualsîasi inserimänt (par an parlèr d'integraziån) int la societè dal savair, sänza una mentalitè ridondànt ed certèzz nozionéstichi, ed dòmm religiåuṡ o scientéfich. A scâp dala confortànt prâtica ed ripercårrer sänper e såul i stàss sentîr mentèl, ed inamurères däli opiniån, sî äli ed chi èter sî äli så. Con äli opiniån am pièṡ såul flirtèr, abandunàndli quand ai mî ûć äli pèren vîci, nudränd difâti l'opiniån (pròpri acsé) ch'äli opiniån raramänt äli séppen quèl ed sicûr autêntich, senò äli gnarévnen ciamè "dâti ed fât" e brîṡa opiniån, e i umàn an lotarévnen brîṡa int i spass patêtich tentatîv ed fèr prevalair äli óni (ed sòlit äli så) rispèt ali ètri (ed sòlit cäli ed chi èter).
Csa a sån mé alåra?
A sån, prémma ed tótt, äli parål ch'äli risånen int la mänt ed chi ch'l'é drî a lèzer o a sintîr lèzer sti réghi. A sån, in secånd lågh, l'imâgin che taló ed chi ch'i én drî a lèzer sti réghi i s én fât o i s én drî a fèr ed mé. A sån, in têrz lågh, la såmma ed imâgini e ricôrd e metâfor con la quèl mé istàss a comónich såul a mé istàss quall che mé a sån, a sån stè int al pasè e am piaṡrévv èser int al futûr.
Tröp complichè? An t am ingâna brîṡa, chèr Maurizio Costanzo Show, té t trascänd la semplizitè ed cui pûr t at adòbb, e an ai é gnínt d'atinänt ali ativitè umèni ch'té t an påsa cuntgnair e ch'té t an cuntgnarè brîṡa. Al tå rål, centrèl e imäns, l'é al tå destén.
Int al mumänt in cui mé a m volż a té, té t am cuntén bèle, chèr Maurizio Costanzo Show, t am cuntén anc an avänd ancåura dè a quasst pública espresiån, mandänd la mî imâgin e äli mî parål in tótti äli cà itagliàni. T am cuntén parché mé a sån entrè in té con sta lêtra, cme al religiåuṡ al s alâza al så Dío con la preghîra.
Adès che al nèss l'é stabilé, chèr Maurizio Costanzo Show, a volż al têrmin sta prémma lêtra. Tanti ètri äli gnaràn drî, con cadänza ed ògni dé (reèl o aparänt), infén che tótt i argomänt ch'am piaṡrà eṡprémmer an saràn stè eṡternè. La såmma däli lêtri la costituirà un lîber. Dé dåp dé a t mandarò tótti äli lêtri, e ala fén a t spedirò anc al lîber. Par vî reèl e par vî virtuèl. Par pòsta e par Internet. Un câregh ed significhè indirizè a té e, par cgnusänza, a l'umanitè.

Roberto Quaglia