mì me rivolgi a tì, con on ategiament simil a chi - in alter temp o in alter loeugh - el se rivolg a la divinità, o a chi - in alter temp o in alter loeugh - el se rivolg al confessor o al psicanalista o al re o al president o al capotribü o al partii o a Satanass. Me rivolgi a tì perché, foeura di definizion pussee ciar, tì te pœudet vess vist come el mej emblema de on'entità che oramai se pö minga fànn a men in la società italiana: la Television.
Me rivolgi inscì a tì dand a tì l'identità che pussee me convègn de dàt. Parlaroo con tì fasend finta con mì istess che tì te me scoltet, e el savè che l'è minga inscì el me darà minga fastidi, perché la verità soo benissim che tì te seet minga quell che per comodità mì foo finta con mì istess che tì te seet.
Car Maurizio Costanzo Show, coss te seet, alora? Perché te seet important? Ma... te seet important? Beh, in Italia tütt quant parlen spess de tì, e anca se la semàntica l'è on'opinion, ne vègn che tì te seet important. Coss te seet alora? Te seet on programa televisiv? Senza dübbi sì. El saría coragios negàll. Ma te seet denver domà on programa televisiv? Se tì te füsset denver domà on programa televisiv, in Italia se parlaría minga inscì assee de tì, e tì te sarìsset minga inscì important. Dopo tütt, la Television italiana (con i cent sò programa locai o nazionai) l'è per el 99% piena de programa televisiv che hinn minga el Maurizio Costanzo Show, la vita vera de ognidun de nün l'è teoricament fada per pussee del 99% de fatt che hinn minga televisiv, e anca inscì tì te gh'heet on post de riliev in la ment de la magior part di citadin italian, e te diventet perfin on'entità che se pö minga fànn a men quand se pensa e se discüt sora tanti e tanti argoment. Coss te seet, donca? L'è quell che cercaroo de descovrì in sta mia lettera, e soratutt in quii che vegnaràn in di dì e in di mes che vègnen, ovèro in di alter pagin de sto contenidor.
Come te vedet, car Maurizio Costanzo Show, mì t'hoo ciapaa come sìmbol per parlà con mì istess, almen fin a quand quaicedun el me scoltarà. Podevi sderoià sti parol dopo la intestazion "Car Diari..." o dopo avè ditt on mantra religios che el me dervess a on'esperienza màstica o dopo avè miss d'acordi con on psicanalista el prezz de la soa prestazion de stà a scoltà el sderoi di mè pensér.
Inveci hoo scernii tì.
L'è minga ona casualità. L'è ona decision che se pö minga evità, sortida del capì la toa modernità a paragon di alter categorie simbòlich (Pataern ecc.), del riconoss la forza simbòlica a cui se resist minga che tì te gh'heet ciapaa in pressa in del cœur de la società italiana.
Car Maurizio Costanzo Show, tì te seet minga ona persòna, te seet minga Maurizio Costanzo (l'òmm che el t'ha creaa e batezaa), te seet minga l'impiegaa o el funzionari che el leng sti letter al Maurizio Costanzo Show col dover de scernì, filtrà, butà a la scoaza. Te seet la Divinità Moderna, el Totem del Casaa, el Sacerdot del Real.
Voeulen minga questi - i mè - vess domà parolon gross che fann efett. In di letter che vegnaràn, andaroo a fond in di significaa che quii tègnen sarraa. Ma el faroo minga con la pompa acadèmica de chi el gh'ha i titoi e i càtedr che ghe fann lecita e dovüda la mostra de pompa acadèmica. Soo minga ancamò come el faroo, ma el faroo a mè mœud, qualunque roba sta fras la voeur dì. Adree ai mè parol gh'è on individü senza titoi acadèmich, senza studi sistemàtich, senza nissüna intrada (per minga parlà de integrazion) in la società del savè, senza ona mentalità piena de certezz nozionìstich, de dogm religios o scientìfich. Scapi de la consolant pràtica de fà semper e domà i stess sentee de la ment, de innamoràss di opinion, che sìen di alter o di mè. Con i opinion me pias domà fà l'amor a la lesta, lassàndoi quand ai mè œucc paren vègi, tegnend de fatt l'opinion (propri inscì) che i opinion raroment hinn quaicoss de certament ver, senò i ciamaríen "dat de fatt" e no opinion, e i òmm se metaríen minga in guera in di spess patetich prov de fà vince i vün (de solit i sò) sora i alter (de solit quii di alter).
Coss sont mì alora?
Sont, primma de tütt, i parol che sónen in la ment de chi el sta legend o el sta sentend leng sti righ. Sont, segond, i imàgin che certi de quii che stann legend sti righ se hinn faa o se stann fasend de mì. Sont, terz, la soma de imàgin e regord e metàfor con la quala mì istess foo savè domà a mì istess quell che mì sont, sont staa in passaa e me piasaría vess el dì che vègn.
Tropp imbroiaa? Me imbroii minga, car Maurizio Costanzo Show, tì te vee pussee assee de la semplicità che anca la te sofega, e gh'è nagott che riguarda i fadigh umann che tì te podet minga tegnì dent de tì e che tì te tegnaree minga. El tò roeul, in mezz e gross assee, l'è el tò destin.
In del moment che mì me rivolgi a tì, tì te me tegnet giamò dent de tì, car Maurizio Costanzo Show, te me tegnet anca se te gh'heet minga ancamò daa a quest ona püblica vos, mandi la mia imàgin e i mè parol in tütt i cà italiann. Te me tegnet perché mì sont entraa dent de tì con sta lettera, inscì come el religios el s'alaccia al sò Dio con la preghiera.
Adess che el ness l'è miss, car Maurizio Costanzo Show, rivi a la fin de sta prima lettera. Tant alter vegnaràn, vüna al dì (vera o che la par), fin a quand tütt i argoment che me piasarà de dì saràn minga staa ditt foeura. La soma di letter la farà on liber. Dì dopo dì te mandi tütt i letter, e a la fin te mandi anca el liber. Per via vera e per via virtual. Per posta e per Internet. On carigh de significaa indirizzaa a tì e, per conoscenza, a l'ümanità.

Roberto Quaglia