ju mi rivolgiu a tia, cu n’attiggiamentu pari a cu’ - ’n àutri tempi o ’n àutri lochi - si rivolgi â divinità, o a cu’ - ’n àutri tempi o ’n àutri lochi - si rivolgi ô cunfissuri o ô psicanalista o ô re o ô prisidenti o ô caputribù o ô partitu o a Satanassu. Mi rivolgiu a tia pirchì, oltri li definizioni cchiù chiari, tu po’ essiri visto comu lu megghiu emblema di n’entità ca ormai nun si po’ fari a menu ntâ sociità taliana: la Tilivisioni.
Mi rivolgiu accussì a tia dannuti l’identità ca cchiù mi cumveni di ti dari. Dialughirò cu tia facennu cu mia stissu ca tu m’ascuti, e lu sapiri ca nun è accussì nun mi disturbirà, pirchì ’n realtà sacciu benissimu ca tu nun si’ chiddu ca pi praticità ju fingiu cu mia stissu ca tu si’.
Caro Maurizio Costanzo Show, chi si’, allura? Pirchì si’ impurtanti? Ma... si’ impurtanti? Beh, ’n Italia tutti parranu spissu di tia, e puru si la simàntica è n’opinioni, ni veni ca tu si’ impurtanti. Chi si’ allura? Si’ nu prugramma tilivisivu? Senza dubbiu sì. Sarrìa curaggiusu a lu nigari. Ma si’ daveru sulu nu prugramma tilivisivu? Si tu fussi daveru sulu nu prugramma tilivisivu, ’n Italia nun si parrirìa accussì assai di tia, e tu nun sarrissi accussì impurtanti. Doppu tuttu, la Tilivisioni taliana (cu li sò cintinara di prugrammi locali o naziunali) è pû 99% china di prugrammi tilivisivi ca nun su’ lu Maurizio Costanzo Show, la vita veru di ognunu di nuiautri è tiuricamenti custitúuta pi cchiù dû 99% di fatti ca nun su’ tilivisivi, e chistu nonostanti tu occupi nu postu di rilievu ntâ menti dâ magghiuranza dî cittadini taliani, e addiventi addirittura n’entità ca nun si po’ fari a menu quannu si pensa e si discuti a propòsitu di assai e assai argumenti. Chi si’, dunqui? È chiddu ca circhirò di scupriri ’n sta mia lettera, e suprattuttu ’n chiddi ca vinirannu ntê jorna e ntê misi futuri, ovveru ntê àutri pàggini di stu cuntinituri.
Comu vidi, caro Maurizio Costanzo Show, ju t’aju pigghiatu comu sìmbulu pi dialugari cu mia stissu, almenu fina a quannu quarchidunu m’ascutirà. Avissi pututu sdirrubbari sti paroli doppu l’intistazioni "Caro Diario..." o doppu aviri dittu nu mantra riligiusu ca m’aprissi a n’espirienza mística o doppu aviri misu d’accordu cu nu psicanalista lu prezzu dâ sò pristazioni di stari a ascutari lu sdirrubbu dî mei pinseri.
’Mmeci aju scegghiutu a tia.
Nun è nu casu. È ’na decisioni ca nun si po’ evitari, scìuta dû capiri la tò mudernità a paraguni di li àutri categurii simbòlichi (Pataternu ecc.), dû ricanusciri la forza simbòlica ca nun si resisti ca tu hai pigghiatu ’mpressa ntô senu dâ sociità taliana.
Caro Maurizio Costanzo Show, tu nun si’ ’na pirsuna, nun si’ Maurizio Costanzo (l’umanu ca t’ha criatu e vattiatu), nun si’ l’impiegatu o lu funziunariu ca leggi sti lettiri ô Maurizio Costanzo Show cû duviri di scegghiri, filtrari, jittari â munnizza. Si’ la Divinità Muderna, lu Totem dû Casali, lu Sacerdoti dû Reali.
Nun vònnu chisti - li mei - essiri sulu paroluni grossi ca fànnu effettu. Ntê lettiri ca vinirannu, indaghirò a funnu ntê significati ca chiddi teninu ’nchiusi. Ma nun lu farò câ pompa accadèmica di cu’ teni li tìtuli e li càttidri ca ci rènninu lècita e duvuta la mustra di pompa accadèmica. Nun sacciu ancora comu lu farò, ma lu farò a modu miu, qualsiasi cosa sta frasi voli diri. Darreri ê mei paroli c’è n’individuu senza tìtuli accadèmici, senza studii sistemàtici, senza nudda ’ntrasuta (pi nun parrari di integrazioni) ntâ sociità dû sapiri, senza ’na mintalità china di certizzi noziunìstichi, di dogmi riligiusi o scientìfici. Fuiu dâ cunsulanti pràtica di ripèrciri sempri e sulu li stissi sinteri dâ menti, di s’annamurari di li opinioni, ca sianu di l’àutri o li propri. Cî opinioni mi piaci sulu a flirtari, abbannunannuli quannu ê mei occhi chiddi pàrinu vecchi, nutrennu defatti l’opinioni (propriu accussì) ca li opinioni raramenti sianu quarchi cosa di certamenti autènticu, sinnò fussiru chiamati "dati di fattu" e nun opinioni, e li umani nun luttassiru ntê spissu patètici tintativi di fari privaliri l’uni (di sòlitu li propri) supra li àutri (di sòlitu chiddi di l’àutri).
Chi sugnu ju allura?
Sugnu, prima di tuttu, li paroli ca sònanu ntâ menti di cu’ sta liggennu o sta sintennu lèggiri sti righi. Sugnu, ’n secunnu locu, l’immagini ca certi di chiddi ca stannu liggennu sti righi si su’ fatti o si stannu facennu di mia. Sugnu, ’n terzu locu, la summa di immagini e ricordi e metàfuri câ quali ju stissu fazzu sapiri sulu a mia stissu chiddu ca ju sugnu, sugnu statu ’n passatu e mi piacissi essiri ’n futuru.
Troppu cumplicatu? Nun m’inganni, caro Maurizio Costanzo Show, tu trascenni la simplicità di cui puru t’addobbi, e nun c’è nenti ca riguarda li attività umani ca tu nun possa cuntiniri e ca tu nun cuntinirài. Lu tò ruolu, centrali e immensu, è lu tò distinu.
Ntô mumentu ’n cui ju mi rivolgiu a tia, tu già mi cunteni, caro Maurizio Costanzo Show, mi cunteni puru nun avennu ancora datu a chistu pùbblica sprissioni, mannannu l’immagini mia e li mei paroli ’n tutti li casi taliani. Mi cunteni pirchì ju sugnu trasutu ’n tia cu sta lettera, accussì comu lu riligiusu s’allaccia ô sò Diu câ prièra.
Ora ca lu nessu è stabbilìutu, caro Maurizio Costanzo Show, arrivu â fini di sta prima lettera. Assai àutri vinirannu, cu cadenza cutidiana (veru o ca pari), fina a quannu tutti li argumenti ca mi piacirà di diri nun sarannu stati dditti fora. La summa dî lettiri façì nu libbru. Jornu doppu jornu ti mannu tutti li lettiri, e â fini ti mannu puru lu libbru. Pi via veru e pi via virtuali. Pi posta e pi Internet. Nu càrricu di significati indirizzati a tia e, pi canuscenza, a l’umanità.

Roberto Quaglia