ci tinia a diri nu paru di cosi puru ju supra chiddu ca chidd’àutru me stissu ha dittu ntâ lettera pricèdenti ca m’arricordu ca aju scrittu quann’era iddu. Ju sugnu defatti chidd’àutru me stissu ca c’è dintra di mia quannu sugnu ’ntilligenti, cioè quannu nun lu sugnu comu ora c’è sempri però dintra chiddu ca lu è puru si si ni sta zittu.
Chidd’àutru me stissu parra ca ha canusciutu Baccini quannu nun era Baccini, mi pari di capiri. Ma nun ha fattu li cunti senza l’osti, ca po’ sugnu ju, puru littirariamenti, ntâ Panteca. C’era defatti puru ju, dintra ô miu corpu, quannu si stava a minarisilla ’nsemi a Baccini ntâ Panteca. Ma dicemu puru pani ô pani. Ju nun sugnu gelusu ca Baccini ora è famusu e ca si cucca tutti li fimmini ca voli, puru si fòrsi accussì facennu si còrrinu ddi rìsichi di l’AIDS, comu dici Lupo Alberto. Nun sugnu gelusu però dicu ca è propriu ’na ingiustizia ca Baccini nun veni a purtari tutti li brìciuli di fimmini ca ci avànzanu a nuiautri ca semu ristati scarugnati dintra la Panteca. Si mi senti chidd’àutru me stissu ’ntilligenti ca s’annascunni dintra di mia pi po’ sautari fora quannu ju mi distraiu, s’incazza, e lu rìsicu è ca mi sfratta. Iddu è cunvintu ca ju lu sputtanu, a parrari a nomu puru sò cu nu linguaggiu sèmplici e sinceru, ca iddu dici ca è chinu di erruri e di dificienti. Ma nun pozzu stari zittu davanti ê ingiustizii. L’àutra mia pirsunalità ’ntilligenti nun v’ha dittu tutti li cosi perversi di Baccini quannu era scarugnatu. Era propriu comu a mia quannu sugnu comu ora, ntâ mia versioni sèmplici ma sincera. Nun sapia mai chi diri a nuddu. Defatti nun dicia nenti. Martiddava supra lu pianoforti, li picciriddi senza nuddu gustu s’assittàvanu vicinu a iddu a lu taliari sunari e si ci chidivanu quarchi cosa iddu nun sapia mai chi rispònniri. Era propriu comu a mia d’a sèmplici, ma ju almenu lu curaggiu di parrari ci l’aju. L’única cosa ca sapia diri ê picciriddi è si avìvanu bisognu di nu passaggiu a casa, e certi lu bisognu ci l’avìvanu daveru, e allura iddu li accumpagnava a casa e senza ci diri nenti (ê picciriddi) a nu certu puntu ci sautava ’ncoddu e si la picciridda nun era perspicaci finìa ca ci stava senza s’addunari e ca si ritruvava scupata ’n menu ca nun si dici. A stu modu Baccini s’apprufittava dî bisugnusi di passaggi ’n màchina. Avia ’na Due Cavalli russa cû sedili dû passiggeru davanti sfunnatu (veramenti era propriu staccatu dî sò rutai) e accussì cu’ sia s’assittava vicinu a iddu era automàticamenti ’n pusizioni giniculògica. M’arricordu ca ’nsemi a iddu aju fattu nu viaggiu fina a Firenze ’n pusizioni giniculògica. Ma cu mia nun ci ha pruvatu.
Aju puru di ridiri supra tuttu chiddu ca lu miu alter ego ha dittu supra la Panteca. È veru ca è nu pizzu di sballu, ma mica pî cosi pseudo-culturali ca dici iddu. Si ju nun fussi ’nsemi a iddu lu gesturi ci jirìa pû sballu, di cui iddu nun ha mancu parratu. ’N Panteca si sballa pirchì c’è casinu, quannu quarchidunu sona lu volumi è giustamenti a stecca e tutti chiddi ca vèninu ddà pi fari li intillittuali â facci di nuiautri cchiù sèmplici ma sinceri si lu pìgghianu ntô didarreri pirchì cu tuttu ddu casinu nun pònnu mancu parrari e diri tutti ddi cosi ca sbagghiannu li fànnu sentiri supiriuri. Lu casinu li fa stari zitti e a nuiautri ni fa sballari e è giustu accussì, pirchì nuiautri semu la magghiuranza e iddi la minuranza e nuiautri semu ’n nu paisi democràticu. Cchiù casinu c’è, menu si pensa, e menu si pensa e megghiu ci si senti. Lu capirìa puru cu’ sia, abbasta ca nun faccia parti di ddi quattru jatti ca si sèntinu ’ntilligenti ca però nun lu su’ pirchì li veri ’ntilligenti semu nuiautri ntâ nostra semplicità democràtica. Nun pònnu essiri iddi li veri ’ntilligenti propriu pi via dâ dimucrazìa, comu ni ’nsigna la tilivisioni. La magghiuranza havi sempri ragiuni, e la magghiuranza semu nuiautri, defatti li trasmissioni ca taliamu nuiautri â tilivisioni hannu li màssimi indici d’ascutu, e chistu nun lu po’ cancillari nuddu.
Scusati si vaju nu pocu fora dû discursu. È ca li diritti umani accumìncianu propriu quannu si va ’n discoteca, o ’n Panteca, o ’n tutti ddi pizzi pi nuiautri giuvani. Cu quali dirittu li accussì ditti ’ntilligenti ni vògghinu fari la prèdica dicennu chiddu ca nun avemu a fari sulu pirchì nun ci piaci a iddi? A nuiautri ca ni sballa fari casinu li dubbi nun ni vèninu e semu tutti d’accordu ca lu dirittu a fari casinu è nu dirittu umanu, datu ca doppututtu propriu pâ quistioni democràtica semu cchiù umani nuiautri dî accussì ditti ’ntilligenti datu ca la magghiuranza lu arripetu semu nuiautri. Chiudiri li discoteche e tutti chiddi àutri limitazioni è allura ’na viulazioni dî diritti umani. Semu ntâ èpuca dû prugressu, e è giustu ca tuttu aumenta, e accussì è giustu ca aumenta puru lu volumi e tutti li sballi ca ora nun vi dicu sinnò po’ mi arèstanu viulannu li mei diritti umani.
Turnannu a Baccini, almenu li brìciuli di tutti li fimmini ca ci lèccanu li scarpi putia puru purtarcili. È ca doppu ca è addivintatu famusu iddu s’è muntatu la testa e ora è cunvintu di essiri supiriuri, comu li pirsuni ca dìcinu di essiri ’ntilligenti. Iddu almenu nun dici di essiri ’ntilligenti, e è già quarchi cosa. Tutti li pirsuni ca lu canuscìvanu prima su’ tutti d’accordu: almenu li brìciuli dî fimmini ca ci avanzàvanu avia a purtarcili. Tantu cchiù ca su’ tutti fimmini sèmplici comu a nuiautri, â nostra purtata, defatti ci avànzanu.
Speru ca tra vuiautri tutti sannu cu’ è Baccini. È l’única pirsuna ca aju canusciutu ca po’ è addivintata famusa. Si nun lu canuscìti mi faciti nu dispiettu pirchì mi livàti puru chistu. Nun è ca m’importa pi iddu - nun sugnu mica ’ntilligenti!
Speru ca almenu vuiautri capiti tuttu chiddu ca dicu, datu ca ju pi furtuna nun ci arrinesciu sempri, sinnò avirìa scantu ca sugnu addivintatu di novu chiddu ddà intelligentuni dintra di mia ca fa sempri finta assai beni di capiri tuttu ma ju sacciu ca nun è accussì puru si aju a ammettiri ca assai cosi li capisci daveru miu malgradu.
Vinìti allura ’n Panteca, vi raccumannu, ma sulu quannu c’è casinu, casinu democràticu, e allura sì ca cû bonu rumuri ca c’è e ca copri tutti li nostri discursi semu daveru democràticamenti tutti uguali.

Roberto Quaglia