ghe tegnevi a dì on para de ròb anca mì sora quell che quell alter mì istess l'ha ditt in la lettera precedent che me regòrdi che hoo scrivüü quand s'eri lü. Mì sont defatti quell alter mì istess che gh'è dent in mì quand sont inteligent, ovvèro quand el sont minga come adess gh'è semper però dent quell che el l'è anca se el se ne sta cìtt.
Quell alter mì istess el parla che l'ha conossüü Baccini quand l'era minga Baccini, me par de capì. Ma l'ha faa minga i cönt senza l'òst, che poeu sont mì, anca letterariament, in la Panteca. Ghe seri defatti anca mì, in del mè còrp, quand se stava a menàssela insèma a Baccini in la Panteca. Ma disèmm anca pan al pan. Mì sont minga gelos che Baccini adess l'è famos e che el se cücca tütt i dònn che el voeur, anca se forsi inscì fasend se còrren quij rìsigh de l'AIDS, come el dis Lupo Alberto. Sont minga gelos però disi che l'è pròpi ona ingiüstizia che Baccini el vègn minga a portà tütt i brìsol de dònn che ghe avànzen a nün che sèmm rimast sfigaa in la Panteca. Se el me sent quell alter mì istess inteligent che el se scond dent in mì per poeu saltà foeura quand mì me distraggi, el se incazza, e el rìsigh l'è che el me sfratta. Lü l'è convint che mì el sputtani, a parlà a nòmm anca sò con on lenguagg sempliz e sinceri, che lü el dis che l'è pien de eror e de deficient. Ma pòdi minga stà cìtt denanz a i ingiüstizzi. l'altra mia personalità inteligenta la v'ha minga ditt tütt i ròb pervers de Baccini quand l'era sfigaa. L'era pròpi come a mì quand sont come adess, in la mia version sempliz ma sincera. El saveva mai cossa dì a nissün. Defatti el diseva nagòtt. El martelava sora el pianofòrt, i tosann senza nissün güst se setaven visin a lü a vardàll sonà e se ghe ciedeven quaicòssa lü el saveva mai cossa respònd. L'era pròpi come a mì la sempliz, ma mì almen el coragg de parlà ghe l'hoo. L'ünica ròba che el saveva dì a i tosann l'è se gh'aveven bisògn de on passagg a cà, e cert vüna el bisògn ghe l'aveven denver, e alora lü el i acompagnava a cà e senza dìgh nagòtt (a i tosann) a on cert pont el ghe saltava adòss e se la tosa l'era minga perspicace la finiva che la ghe stava senza incorgìss e che la se retrovava scovada in men che se dis. A sto mòd Baccini el se aprofittava di bisognos de passagg in màchina. El gh'aveva ona Due Cavalli rossa con el sedil del passegger denanz sfondaa (denver l'era pròpi staccaa di soo rotai) e inscì chiunque el se setava visin a lü l'era automàticament in posizion ginecològica. Me regòrdi che insèma a lü hoo faa on viacc fina a Firenze in posizion ginecològica. Ma con mì el gh'ha minga proaa.
Gh'hoo anca de ridì sora tütt quell che l'alter ego mè l'ha ditt sora la Panteca. L'è vera che l'è on sit de sball, ma mica per i ròb pseudo-cültüral che el dis lü. Se mì füss minga insèma a lü el gestor el ghe andaria per el sball, de cui lü l'ha nanca parlaa. In Panteca se sballa perché gh'è casin, quand quaidün el sona el volüm l'è giüstament a stecca e tütt quij che vègnen là per fà i inteletüal in facia a nün pü sempliz ma sinceri se el ciàpen in del deder perché con tütt quel casin pòden nanca parlà e dì tütt quij ròb che sbagliand i fann sentì superior. El casin i fà stà cìtt e a nün el ne fà sballà e l'è giüst inscì, perché nün sèmm la maggioranza e lor la minoranza e nün sèmm in on paes democràtich. Pussee casin gh'è, men se pensa, e men se pensa e mej se sent. El ghe piasaria anca a chiunque, basta che el faga minga part de quij quatter gatt che se sènten inteligent che però el sont minga perché i ver inteligent sèmm nün in la nòstra semplicità democràtica. Pòden minga vess lor i ver inteligent pròpi per via de la democrazìa, come ne impara la television. La maggioranza la gh'ha semper reson, e la maggioranza sèmm nün, defatti i trasmission che vardèmm nün a la television gh'hann i màssim indis de ascolt, e questo el pò cancellà nissün.
Scüsee se voo on poo foeura del discors. L'è che i diritt üman comìncien pròpi quand se va in discotèca, o in Panteca, o in tütt quij sit per nün gioven. Con qual diritt i inscì ditt inteligent ne voeuren fà la prèdica disend quell che gh'èmm minga de fà domà perché el ghe pias minga a lor? A nün che ne sballa fà casin i döbbi ne vègnen minga e sèmm tütt d'acòrd che el diritt de fà casin l'è on diritt üman, dato che dòpotütt pròpi per la question democràtica sèmm pü üman nün di inscì ditt inteligent dato che la maggioranza el repeti sèmm nün. Sarà i discotèch e tütt quij alter limitazion l'è alora ona violazion di diritt üman. Sèmm in la època del progress, e l'è giüst che tütt aumenta, e inscì l'è giüst che aumenta anca el volüm e tütt i sball che adess ve disi minga senò poeu me arrèsten violand i mè diritt üman.
Tornand a Baccini, almen i brìsol de tütt i dònn che ghe lecchen i scarp el podeva anca portàghecel. L'è che dòpo che l'è deventaa famos lü el s'è montaa la crapa e adess l'è convint de vess superior, come i persòn che dìsen de vess inteligent. Lü almen el dis minga de vess inteligent, e l'è già quaicòssa. Tütt i persòn che el conosseven prima hinn tütt d'acòrd: almen i brìsol di dònn che ghe avanzaven el doveva portàghecel. Tant pü che hinn tütt dònn sempliz come a nün, a la nòstra portada, defatti ghe avànzen.
Speri che tra vialter tütt sàppien chi l'è Baccini. L'è l'ünica persòna che hoo conossüü che poeu l'è deventada famosa. Se el conossii minga me fii on dispiett perché me levii anca questo. L'è minga che me impòrta per lü - sont mica inteligent!
Speri che almen vialter capii tütt quell che disi, dato che mì per fortüna ghe riessi minga semper, altrimenti gh'avaria pagüra che sont deventaa de noeuv quel là inteligenton dent in mì che el fà semper finta assee ben de capì tütt ma mì soo che l'è minga inscì anca se gh'hoo de ammètt che assee ròb i capiss denver mè malgrad.
Vegnii alora in Panteca, ve racomandi, ma domà quand gh'è casin, casin democràtich, e alora sì che con el bon rümor che gh'è e che el cropp tütt i nòster discors sèmm denver democràticament tütt istess.

Roberto Quaglia