ghe tegnéiva a dî 'n pâ de cöse ascì mì in sce quéllo che quéll'âtro mì mæximo o l'à dîto inta lettia preçedénte ch'me regòrdo ch'ò scrîto quànd'êa lê. Mì són defæti quéll'âtro mì mæximo ch'gh'é drénto de mì quànde són inteligénte, vêuo dî quànde no ô són cómme òua gh'é sénpre però drénto quéllo ch'o ô l'é ànche s'o se ne stâ cìtto.
Quéll'âtro mì mæximo o pàrla ch'o l'à conosciûo Baccini quànde o no l'êa Baccini, me pâ de capî. Ma o no l'à fæto i cónti sénsa l'òste, ch'dòppo són mì, ascì letterariaménte, inta Panteca. Gh'êa defæti ascì mì, drénto a-o mæ còrpo, quànde se stâva a menâsela insémme a Baccini inta Panteca. Ma dìmmo pûre pàn a-o pàn. Mì no són zelôzo ch'Baccini òua o l'é famôzo e ch'o se cûcca tûtte e dònne ch'o vêu, ànche se fòrsci coscì fâzéndo se córan quélli rîxeghi de l'AIDS, cómme o dîxe Lupo Alberto. No són zelôzo però dîggo ch'o l'é pròpio 'na ingiustìçia ch'Baccini o no vêgne a portâ tûtte e brìzole de dònne ch'ghe avànsan a niâtri ch'sémmo restæ sçigæ drénto a Panteca. Se me sénte quéll'âtro mì mæximo inteligénte ch'o se ascónde drénto de mì pe dòppo saltâ feua quànde mì me distrâggo, o se inràbbia, e o rîxego o l'é ch'o me sfràtta. Lê o l'é convìnto ch'mì ô sputànno, a parlâ a nómme ascì seu con 'n lengoàggio sénplice e sinçêro, ch'lê o dîxe ch'o l'é pìnn-o de eRôri e da defiçénti. Ma no pòsso stâ cìtto davànti a-e ingiustìçie. L'âtra mæ personalitæ inteligénte a no v'à dîto tûtte e cöse pervèrse de Baccini quànde o l'êa sçigòu. O l'êa pròpio cómme mì quànde són cómme òua, inta mæ verscion sénplice ma sinçêra. O no savéiva mâi cöse dî a nisciùn. Defæti o no dixéiva ninte. O martelâva in sciô pianofòrte, e figgiétte sénsa nisciùn gùsto se assêtâvan avixìn a lê a goardâlo sonâ e s'e ghe dimandâvan quarcösa lê o no savéiva mâi cöse rispónde. O l'êa pròpio cómme mì da sénplice, ma mì a-o mànco o coràggio de parlâ ghe l'ò. L'ùnica cösa ch'o savéiva dî a-e figgiétte a l'é s'e avéivan bezéugno de 'n passàggio a câza, e quàrchedùnn-a o bezéugno ghe l'avéivan pe davéi, e alôa lê o ê acompagnâva a câza e sénsa dîghe ninte (a-e figgiétte) a 'n çèrto pónto o ghe saltâva adòsso e se a figgétta a no l'êa perspicâce o finîva ch'a ghe stâva sénsa acòrzîsene e ch'a se atrovâva ciavâ in mêno ch'no se dîxe. A sto mòddo Baccini o se aprofitâva de-e bezognôze de passàggi in màchina. O l'avéiva 'na Due Cavalli róssa co-o sêze do passazê davànti sfondòu (veramente o l'êa pròpio destaccòu da-e seu rotâie) e coscì chiunque o se assêtâva avixìn a lê o l'êa automaticaménte in poxiçión ginecològica. Me regòrdo ch'insémme a lê ò fæto 'n viàggio fìnn-a a Firenze in poxiçión ginecològica. Ma con mì o no gh'à provòu.
Ò ascì da redî in sce tûtto quéllo ch'o mæ alter ego o l'à dîto in sce-a Panteca. O l'é vêo ch'o l'é 'n pòsto da sbàllo, ma mìga pe-e cöse pseudo-culturâli ch'o dîxe lê. Se mì no fîse insémme a lê o gestô ghe andiéiva pe-o sbàllo, de cûi lê o no l'à manco parlòu. In Panteca se sbàlla perché gh'é caxìn, quànde quarchedùn o sêunna o volùmme o l'é giustaménte a stécca e tûtti quélli ch'vêgnan lì pe fâ i inteletoâli a-a fàccia de niâtri ciù sénplici ma sinçêri se ô pìggian into deré perché con tûtto quéllo caxìn no pêuan manco parlâ e dî tûtte quélle cöse ch'sbaliàndo ê fàn sentî superiôri. O caxìn ê fâ stâ cìtti e a niâtri o ne fâ sballâ e o l'é giùsto coscì, perché niâtri sémmo a magiorànsa e lô a minorànsa e niâtri sémmo inte 'n paîze democràtico. Ciù caxìn gh'é, mêno se pénsa, e mêno se pénsa e mêgio se sénte. Ô capiéiva ascì chiunque, abàsta ch'o no fàsse pàrte de quélli quàttro gàtti ch'se séntan inteligénti ch'però no ô són perché i vêi inteligénti sémmo niâtri inta nòstra semplicitæ democràtica. No pêuan èse lô i vêi inteligénti pròpio pe vîa da democrazîa, cómme o ne inségna a televixón. A magiorànsa a l'à sénpre raxón, e a magiorànsa sémmo niâtri, defæti e trasmiscioìn ch'goardémmo niâtri a-a televixón àn i màscimi ìndichi d'ascólto, e questo no ô pêu cancelâ nisciùn.
Scuzæ se vàddo 'n pö feua do discórso. O l'é ch'i drîti umàn coménsan pròpio quànde se va in discotêca, ò in Panteca, ò in tûtti quélli pòsti pe niâtri zoêni. Con quæ drîto i cosídétti inteligénti ne vêuan fâ a prêdica dixéndo quéllo ch'no dovémmo fâ sôlo perché o no ghe piâxe a lô? A niâtri ch'ne sbàlla fâ caxìn i dùbbi no ne vêgnan e sémmo tûtti d'acòrdo ch'o drîto a fâ caxìn o l'é 'n drîto umàn, dæto ch'dòppotùtto pròpio pe-a question democràtica sémmo ciù umàn niâtri di cosídétti inteligénti dæto ch'a magiorànsa ô repéto sémmo niâtri. Saiâ e discotêche e tûtte quélle âtre limitaçioìn o l'é alôa 'na violaçión di drîti umàn. Sémmo inte l'época do progrèsso, e o l'é giùsto ch'tûtto o aumenta, e coscì o l'é giùsto ch'o aumenta ascì o volùmme e tûtti i sbàlli ch'òua no ve dîggo sednò dòppo me arèstan violàndo i mæ drîti umàn.
Tornàndo a Baccini, a-o mànco e brìzole de tûtte e dònne ch'ghe lìccan e scarpe o poéiva ascì portâcele. O l'é ch'dòppo ch'o l'é deventòu famôzo lê o s'é montòu a tésta e òua o l'é convìnto de èse superiôre, cómme e persónne ch'dîxan de èse inteligénti. Lê a-o mànco o no dîxe de èse inteligénte, e o l'é za quarcösa. Tûtte e persónne ch'ô conoscéivan prìmma són tûtte d'acòrdo: a-o mànco e brìzole de-e dònne ch'ghe avansâvan o dovéiva portâcele. Tànto ciù ch'són tûtte dònne sénplici cómme niâtri, a-a nòstra portâ, defæti ghe avànsan.
Spêro ch'tra vôtri tûtti sàn chi o l'é Baccini. O l'é l'ùnica persónna ch'ò conosciûo ch'dòppo a l'é deventâ famôza. Se no ô conoscéi me fæ 'n despèto perché me cavæ ascì questo. No l'é ch'm'impòrta pe lê - no són mìga inteligénte!
Spêro ch'a-o mànco vôtri capî tûtto quéllo ch'dîggo, dæto ch'mì pe fortùnn-a no ghe reûsço sénpre, sednò aviéiva puîa ch'són deventòu da nêuvo quéllo là inteligentón drénto de mì ch'o fâ sénpre fìnta tànto bén de capî tûtto ma mì sò ch'no l'é coscì ànche se devo amétte ch'tànte cöse ê capìsce pe davéi a mæ mâgrado.
Vegnî alôa in Panteca, ve racomàndo, ma sôlo quànde gh'é caxìn, caxìn democràtico, e alôa sci che co-o bèllo rumô ch'gh'é e ch'o cêuvre tûtti i nòstri discórsci sémmo pe davéi democraticaménte tûtti ugoâli.

Roberto Quaglia