è 'e moda ll'orrore, purché sia pe finta. Meglio si è reale, ma sempe pe finta. Viva 'o raccapricciante, purché se àbbia certezza ca sia pe finta. Ce se diverte a se 'mpaurà overamente 'n virtù 'e cause verosìmmele, ma finte.
Ce se cala dint'â angoscia 'e 'nu film 'e ll'orrore, addó tutte 'e protagoniste vènono squarciate pe finta overamente. Ce se nutre 'e 'nu telegiornale ca ce vòmmeca dint'a ll'uocchie 'e scene 'e ate protagoniste, squarciate stavota overamente, ma pe finta. 'E muorte vere d''o telegiornale 'o sò pe finta, defatte abbasta cagnà canale e lloro scumpàreno, assolutamente e pe sempe, d''e vite noste, addó accussì scuprimmo ca nun èrano maje apparze overamente, ma sulo pe finta.
Ce se cala 'n qualunque versione 'e finto orrore cu passione ca ll'uommene quacche vota chiàmmano morbosa. 'N realtà è 'a passione 'e chi 'mpara ll'orrore attraverso rappresentazione irreale soje, pe se mèttere 'n grado 'e ll'affruntà meglio quanno maje isso se presentasse annanze a nuje cu 'o spietato càreco suo 'e effettiva realtà. Ce se allena a ll'orrore overo, ca pe furtuna 'e raro ce tocca, immedesimànnoce dint'a ll'orrore finto fintìssemo d''e film chine 'e muostre improbbàbbele, e 'n chillo overo, ma finto pe nuje, d''e telegiornale chine 'e muostre probbàbbele.
Ma assìstere a sti rappresentazione 'e orrore è tutto summato esercizio alquanto passivo. Se 'mpara a vascio livello, pecché tutto chello ca 'o teleschermo ce 'mpara è a vascio livello. Pe capì meglio ll'orrore, e essere pronte a ll'affruntà quanno isso maje ce avesse 'a piglià 'e mira, è cchiù ùtile aduperà 'a immaginazione propia. Defatte, è sempe cchiù ùtile aduperà 'a immaginazione propia 'mméce d''o televisore pe 'mparà, capì, sentì, apprezzà o disprezzà quaccosa. Pe vaccinà a sé stesse d''e rische ca ll'orrore overo cumporta, ce vo' primma 'e tutto nun avé paura 'e se ll'immaginà. Se piglia soddisfazione d''e film 'e ll'orrore e d''e telegiornale (chi nun pigliasse soddisfazione nun 'e guardarrìa, è ovvio) proprio pecché lloro se sostituìscono a nuje dint'â responsabilità 'e scègliere quale orrore se immaginà. Affiora 'n nuje comme 'nu senzo 'e corpa, a immaginà 'mproprio 'e orrore ca nun desiderammo p''a vita nosta e pe chella 'e ll'ate. È 'nu senzo 'e corpa fora luogo, dovuto ô timore nuosto ca immaginà 'n orrore pòzza indurre a 'o cummèttere, quanno è spisso 'mméce overo 'o cuntrario.
Pigliammo allora 'n cunziderazione 'a idea 'e 'mpalà 'o gatto 'e casa nuosto o 'o cagnulillo nuosto. Puverielle, comme suffrarrìano. 'A idea ce urta, e allora insistimmo immaginanno 'o cuntrario 'e chello ca ce vène istintivo, ovèro 'e ce mèttere a rìdere cu profondo sàdico piacere annanze a ll'agonizzante tesorùccio dumèsteco nuosto, e proprio quanno 'a commozione ce indurrìa a 'a fernì lle sputammo 'mméce 'n faccia, ô puveriello cucciolillo nuosto ca accussì tanto ce ha sempe vuluto bene, strappànnole 'e pile uno a uno e appicciànno 'a cora soja 'mbevuta 'e àlcol. È 'nu penziero poco gentile. Ma se po' fa 'e meglio. Putimmo immaginà 'nu regalo 'e cumpleanno d''o tutto particulare p''a cara nonna nosta, ca quanno èramo piccirille ce cuntava accussì bbuono 'e fàvule, o p''o amato nonnillo nuosto. Cu 'a scusa ca è 'o cumpleanno lloro 'e attaccammo a 'na seggia pe juoco, e quanno s'aspèttano ca arriva 'o regalo lle iniettammo 'mméce a ripetizione acqua salata bullente dint'ô naso, nun senza ll'avé primma accuratamente 'mbavagliate. Po', quanno ll'atmosfera s'è scarfata abbastanza facimmo trasì 'n casa 'a piccola banda 'e pasture stupratore ca avimmo reclutato doppo longhe ricerche, individue temprate 'a anne 'e cuite cu pècore e galline, e quanno lloro se danno 'a fa cu 'e puverielle nuonne nuoste nuje tenimmo 'o bbuono gusto 'e immortalà ogne dettaglio cu 'a piccola telecàmmera nosta, facenno sùbbeto doppo rivedé a 'e estenuate nuonne 'o filmato d''e involontarie prudezze lloro, informànnole pe correttezza ca mediante 'n espediente tècneco simmo cullegate cu ll'antenna condominiale ncopp'â frequenza giusta, accussì ca tutto 'o palazzo 'e sta mò ammiranno ô puosto 'e RAI UNO. Vulenno esagerà putarrìamo immèttere 'e fotogramme megliore ncopp'ô circuito telemàteco 'e INTERNET, mettènnole accussì a disposizione 'e vinte miliune 'e utente 'n tutto 'o munno. Ma a furia 'e esagerà ll'orrore ben priesto se trasforma 'n umorismo niro, e nun fa cchiù 'o stesso effetto.
Quaccheduno putarrà se scandalizzà, penzanno ca quacche d'ato pòzza osà penzà quaccosa 'e stu genere. Si è pe chesto pòzzo osà penzà buono 'e peggio, ma nun vuleva mò dimostrà quanto io sia 'n grado 'e me immaginà 'e orrìbbile. Vuleva mèttere 'n evidenza 'o fatto ca se immaginà d'a sule 'e orrore è 'na evoluzione rispetto ô gesto 'e se guardà 'e orrore 'n 'nu film o dint'ô telegiornale. Ce se stupisce d''e orrore esibite 'n 'nu film 'e Dario Argento & Colleghi e ce se stupisce d''e orrore esibite 'n 'nu telegiornale p''a mancanza 'e immaginazione ca tradimmo a nun ce immaginà pe cunto nuosto chello ca 'o regista d''o film ha 'mméce saputo se immaginà e chello 'e ripugnante ca 'e giornaliste marpiune sò riuscite a scuvà attuorno p''a società.
ll'orrore attrae pecché esiste e pecché dato ca esiste ce vo' sapérese difènnere. Nun se canosce overamente fino a quanno nun se 'ncontra. Ma ce se avvicina a 'o canóscere osservanno 'e esempie ca 'e film e 'e telegiornale ce fornìscono, oppure aduperanno 'a immaginazione propia. Quanto cchiù ce se è avvicinato a 'o canóscere, tanto cchiù se è 'n grado 'e ll'affruntà quanno isso ce tuccasse direttamente. A chesto sèrvono 'e film 'e ll'orrore, 'a violenza 'n tivù, e 'e telegiornale. A chesto serve, buono 'e cchiù, 'a immaginazione, pe chi 'a sape aduperà. Immaginà ll'orrìbbile, sapenno ca è orrìbbile, 'n tutte 'e dettaglie suoje, ce fornisce 'nu bbuono potenziale 'e difesa cuntra 'e isso.

Roberto Quaglia