songo Paperino. Nun è 'nu soprannome. Songo proprio Paperino 'o zio 'e Qui, Quo, Qua, 'o nipote 'e Paperone. Tutte scrìvono ô Maurizio Costanzo Show e aggio accussì deciso 'e 'o fa pure io.
Nun saccio bene pecché 'o faccio. Ma sanno pecché 'o fanno tutte ll'ate ca te sommèrgono 'e llettere? Nisciuno sape realmente niente 'e me. 'A gente legge 'e fumette e accussì pe chesto se sente autorizzata a crédere 'e sapé tutto 'e Paperino. Nossignori. Areto a 'e quinte, fora d''e stàteche pàggine addó esisto p''o puro diletto 'e gruosse e piccirille, tengo 'na vita segreta, ca nun è chella 'e Paperinik. È 'na vita 'e mmerda. Fórzo è pe chesto ca aggio deciso 'e te scrìvere, caro Maurizio Costanzo Show.
Ma fórzo quaccosa s'intuisce pure liggenno 'e fumette ca sò 'o mestiere mio. 'A proverbiale scarogna mia, 'e angustie ca 'o zio Paperone tutte 'e juorne m'infligge, 'e umiliazione patute pe òpera d''e dispettuse e saccente niputielle mije. E po' chella strunza 'e Paperina ca nun me 'a dà e ca 'mméce se fa muntà - ne songo sicuro - 'a chillu tronfio imbecille 'mbrillantinato 'e Gastone!
È Paperopoli ca porta scarogna. Tutto 'o denaro ca ce sta se ll'hanno cuccato 'o zio mio e Rockerduck. Caro Maurizio Costanzo Show, hê 'a assolutamente me invità dint'â trasmissione toja. Oje è possìbbile, 'o saje? Pure si songo 'nu fumetto o 'nu cartone animato. Si Roger Rabbit po' interagì cu 'e essere umane, allora pòzzo pure io. Farraje 'nu figurone, a me invità.
Vuje nun avite maje visto a Paperina annura. Io sì. D''o pertuso d''a serratura. Era ll'ùneco sistema. Pure Qui, Quo e Qua ll'hanno vista. Pure Pippo, pe sbaglio (cuglione comm'è steva 'n realtà cercanno 'e vedé a sé stesso annuro). Pure Archimede Pitagorico, cu una d''e dannate invenzione soje pe guardà attraverso 'e mure. Cazzo, ll'hanno vista annura tutte fora vuje, ca ll'avite vista sulo dint'a 'e fumette, interpretà 'o ruolo 'e verginella vanitosella. Embè, nun avite perzo niente. Paperina annura è peggio 'e Jessica Rabbit vestuta. E chesto è ll'oltraggio definitivo! Pòzzo ammèttere ca 'na strafica comme Jessica Rabbit nun me 'a dà, ma Paperina... cazzo, tra ll'ato annura è pràtecamente idèntica a me stesso. Si ce luóve 'e vestite nun è ca avànzano gran differenze. Ce sta chillu cazzo 'e fiocco russo ca essa ha appicciato 'n capa juorno e notte ca ce distingue. Io 'o assurdo birretto 'a marinaro mio ogne tanto me 'o levo, pure si accussì metto annuro 'e carvizie. Essa, 'o fiocco russo suo... maje! Eppo' fa 'e ova. Cristo, ne fa almeno una ô juorno. ll'avimmo tutte vista d''o pertuso d''a serratura. Avarrìamo avuto 'a ce ll'immaginà, pàpere comme simmo, ca chella llà fa 'n uovo doppo ll'ato. È 'na scena schifosa. Vularrìa sapé po' addó se ll'imbosca. Secondo me fernìscono tutte 'a Nonna Papera ca 'e fa sparì dint'a 'e turte soje ca po' nuje ce magnammo. Che schifo. Brutte storie 'e cannibalismo.
Cazzo, songo proprio scarugnato. Scùsame si dico sempe "cazzo", ma dint'a 'e fumette nun 'o pòzzo fa e aggio 'a me sfucà. E po' è 'e moda. Cazzo, dìcere cazzo nun vo' dìcere 'nu cazzo ma tutte nun fanno ato ca 'o dìcere, e si 'o fanno 'n televisione pàssano ancora pe perzone cu 'e palle.
Te prometto ca si me invite nun parlarraggio male dint'â trasmissione toja. Oppure 'o farraggio, si sarraje però tu a me 'o chiedere. Si te vrigogne a me 'o dìcere fàmme 'e gieste. Capisco ampressa, io, fora d''e fumette. Suprattutto 'e cose accussì semplice.
Scùsame si parlo accussì, 'n muodo diverso ca dint'a 'e fumette addó fatico. 'A gente s'aspetta sempe 'e stesse cose 'a me, 'n ogne cuntesto. Nisciuno se 'nteressa â perzona o ô pàparo ca io sento 'e essere. Tutte vònno sempe me vedé dint'ô personaggio ca hanno 'mparato ca io songo. Cazzo, a furia 'e me vulé tutte vedé scarugnato, fernisco pe ll'essere overamente pure dint'â vita privata. Rock Hudson era 'nu personaggio virile, ma 'n realtà era buliccio. (Dint'ô dialetto 'e Paperopoli buliccio vo' dìcere ricchione). Io songo 'nu personaggio scarugnato, ma 'n realtà 'o songo ancora 'e cchiù.
Cazzo, add'à essere overo ca chiunque è proprio chello ca tutte pènzano e vònno ca isso o essa sia. Dint'â vita privata mia 'e cose me vanno ancora peggio ca dint'a 'e fumette. Tengo sempe assaje malatie, cu migliara 'e sìntome tutte diverse, mèntre dint'a 'e fumette quanno sto male tengo semplicemente 'nu termòmetro 'mmocca. Pe esempio tengo 'o catarro. Ma nun sulo dint'a 'e bronche. Pure dint'a ll'uocchie e sotto 'e scelle. Tutte avite visto, dint'a 'e fumette, ca io nun tengo diente. Embè, è proprio accussì. Ma dint'a 'e fumette me magno 'e supersandwich ca nun fernìscono cchiù... ma è tutta finzione. 'N realtà, senza diente nun pòzzo masticà, e dint'â vita reale me alimento 'e brodicielle.
Perdùname si 'a lettera mia pare 'nu poco cunfusa. Songo leggermente 'mbriaco. Che ve aspettàveve 'a 'nu marinaro? Avé notato ca dint'a 'e fumette cammino sempe scàuzo? Embè, pure dint'â vita reale. Ma dint'a 'e fumette 'a strada nun è custellata 'e cicche e strunze 'e cane comme dint'â realtà addó io ogne mumento 'e caupesto.
Cunfesso ca me masturbo. Songo disposto a 'o dìcere pure 'n trasmissione, si po' servì a aumentà ll'audience. Aggio pruvato pure a me fa 'e canne, sia dint'â realtà ca dint'a 'e fumette. Naturalmente stevo faticanno 'n niro, pe 'nu certo Andrea Pazienza ca nun era 'nu fumetto immortale e defatte è po' muorto. Po' aggio fernuto. Che serve se fa 'e canne quanno 'a realtà è già 'e pe sé completamente fora 'e capa? Abbasta arapì ll'uocchie e guardà. E vuje sapite ca ll'uocchie mije sò ben gruosse. Me 'e disègnano gruosse e 'o sò pure 'n realtà. Chello ca nun vedite dint'a 'e fumette sò tutte chille cazzo 'e muscille ca me ce fernìscono dinto ogne cinche minute.
Sapite, tengo quacche idea ncopp'â scarogna ca me perseguita 'n campo sentimentale: Comme cazzo faccio a vasà a quaccheduna cu 'o pizzo ca me retrovo? Si po' 'a perzona ca voglio vasà tène 'o pizzo pure essa (o pure isso), 'a facenna se fa terribilmente 'ncasinata. Comme fanno a se vasà dignitosamente e cu 'a regolamentare lussuria 'nu pàparo e 'na pàpera cu 'o pizzo fatto comme 'o mio? Penzate bene ô pizzo mio. ll'avite visto migliara 'e vvote dint'a 'e fumette mije. Visto 'e prufilo, comme io me guardo spisso ô specchio, è senza dubbio 'nu sìmbolo fàlleco (Pico de Paperis sarrìa d'accordo cu me). 'O pizzo mio è fatto pe penetrà, ne songo sicuro. Nun penzate ca sia 'nu manìaco sessuale. È 'nu raggiunamento 'e tipo geomètreco. 'O pizzo mio è 'nu sòledo affusolato cu 'a tìpeca aerodinamicità 'e 'nu strumento penetrante. Nun ridite 'e me si nun riesco a m'esprìmere cu 'a dovuta precisione. Songo sulo 'nu marinaro scarugnato. Ma cu 'nu pizzo penetrante. Nun riuscarrite a me cunvìncere d''o cuntrario. Embè, cazzo, pure Paperina ce ll'ha. Comme cazzo farrìa a 'a vasà, pure si essa me 'o lassasse fa?
Caro Maurizio Costanzo Show, nun voglio delùdere a nisciuno d''e fans d''o personaggio ca interpreto ncopp'ô piccolìssemo schermo d''o giornaletto 'e fumette ca 'nflaziona 'e edìcole. Ma ormaje songo gruosso 'a 'nu casino 'e tiempo e rivènneco 'o deritto 'e venì pure io 'na vota 'a te pe fa sapé pure io a tutte 'e cazze mije. Pàteme Disney è muorto 'nu sacco 'e tiempo fa. M'ha lassato 'n eredità 'nu cuntratto a vita cu ll'azienda ca porta 'o nomme suo. Ce ll'aggio dint'ô culo. Scùsame si parlo accussì, ma ficcàteve bene 'n capa ca songo 'nu marinaro, 'nu marinaro scarugnato, e pure frustrato dint'ô ruolo suo 'e marinaro pecché nun aggio maje truvato 'n imbarco ca fosse uno. 'O puorto 'e Paperopoli è 'mmano a 'e comuniste, ca ll'hanno fatto fallì. Disney era 'nu sàdico. A me tutte 'e disgrazie, ô zio Paperone tutte 'e sorde, e a 'e comuniste 'o puorto 'e Paperopoli. Disney era 'nu sàdico.
Tengo tre niputielle ca me ròmpono sempe 'e cugliune cu 'o manuale d''e giovani marmotte. Tengo tutte 'e svantagge 'e avé tre figlie senza manco avé avuto 'o vantaggio 'e me essere fatto 'na scupata ca fosse una. Disney era 'nu sàdico.
Tengo 'na màchina 'e mmerda monoposto a metà, ca pe me purtà attuorno 'o nipotame 'e aggio 'a mèttere dint'ô bagagliaio. Nisciuno d''e sceneggiature d''e fumette mije v'ha maje ditto 'a marca. Embè, ce credo, se vrigugnàvano. Era 'o prototipo scartato d''a Trabant, ll'auto-scatuletta-'e-alice ca mò jèttano via pure dint'a ll'ex Germania d''o Est.
Embè, 'nzomma, Maurizio Costanzo Show, invìtame 'nu poco 'a te ca te ne conto duje ncopp'ô zio Paperone. Cride ca se sia tenuto fora 'a Tangentopoli? Cazzo, tra isso e Rockerduck...
M'è scaduta 'a ricreazione. Nun te pòzzo cchiù scrìvere. Quanno fatico nun pòzzo cchiù emèttere parole ca nun sìano cuntenute dint'â nuvuletta apparente 'e quacche fumetto.
Cribbio, nun songo cchiù manco sicuro 'e essere overamente Paperino. Pure travestuto accussì sento sempe 'na gran puzza 'e Roberto Quaglia.

Roberto Quaglia