Aggio 'a cercà 'e essere banale, accidente. Me sò capitate 'mmano 'e brutte copie d''e llettere ca già t'aggio scritto e m'aggio addunato ca sò overamente brutte, ovèro me sò scappate mumente 'e profondità involontaria, a discàpeto d''a banalità indispensàbbile a fa 'e qualunque prodotto 'nu prodotto bbuono. È 'n argumiento abbastanza banale, chesto? 'O spero overamente. Tutte dìcono ormaje ca qualunque cosa è primma 'e tutto 'nu prodotto. Si 'o dìcono tutte, fórzo è 'nu cuncètto banale, ovèro proprio chello ca sto cercanno 'e prodùcere. Si tutto è 'nu prodotto, o è 'nu bbuono prodotto bbuono o è 'nu cattivo prodotto cattivo. Bene, me pare ca a banalità stammo jenno bbuono. Chi è ca decide quanno 'na cosa è overamente banale? Sta frase m'è venuta abbastanza banale. Me sto megliuranno.
'Na cosa po' essere banale pe certuni e banale pe ate, ovèro, vuleva dìcere, banale pe certuni e nun banale pe ate. E che ne dicite 'e mèttere certe frase 'n corsivo, senza particulare mutive? Nun è decisamente banale? Fórzo è leggermente originale. Ce vo' stà attiente. ll'originalità t'aspetta ô varco areto a ll'angulo, e te piglia quanno meno te ll'aspiette. Ma 'na cosa po' essere pe niente banale eppure assaje stùpeda. È meglio 'na bbona banalità o 'na perentoria stupidità? 'Na cosa troppo stùpeda fernisce 'e essere banale.
Accidente! ll'eccesso 'e banalità cunduce a tradimento ô cuntrario suo quanno meno te ll'aspiette. Ce vo' decrementà 'a correttezza semànteca - ma che cavolo dico! - ce vo' diminuì 'a buntà grammaticale pe compensà 'e rigùrgete 'e banalità paradossante.
Ce capisco 'nu bbello niente manco io, ve assicuro overamente. Che figura ce faccio, oje, cu ste parole ca nun me piàceno manco 'nu pucurillo? Paro scemo, o paro ignorante? Oppure nun paro 'nu bbello niente pecché avite già fernuto 'e lèggere? Ma che dico? Si hanno fernuto 'e lèggere nun se ne addònano 'e tutte ste parole ca pure cuntinuano a stà ncopp'ô fuoglio 'e carta a ll'insaputa lloro, accussì che ce stanno a fa?
Ccà me sa ca 'a banalità se n'è ghiuta a se fa frìjere. Ce vo' 'nu bbuono luogo cummune pe sarvà crapa e càvule. Quaccosa d''o tipo: "'A cosa 'mpurtante è ca ce sia solidarietà". Niente male, eh? Defatte 'o denaro nun fa 'a felicità, pecché 'a natura è matrègna e quanno meno te ll'aspiette 'e nure vènono ô pèttene e ccà casca ll'àseno. Nun ce sta proprio giustizia a stu munno! È proprio overo ca nun ce sta 'a se fidà. Cchiù canosco 'e perzone e cchiù amo ll'animale.
Tutto chesto è semplicemente squàllido, scarsamente banale o antibanale, 'nu brano scritto d''o tipo "vularrìa ma nun pòzzo", 'na masnada 'e frase ammassate a casaccio.
Fórzo riuscimmo almeno a addiventà nuiuse.
Ma pecché avarrìamo addiventà nuiuse? Vulévamo essere banale pecché chesto è chello ca piace â gente. Ma 'e nuiusaggine nun piàceno a nisciuno. Ccà stammo proprio sbaglianno tutto. Si proprio ce vo' essere nuiuse, tanto vale dìcere pure quaccosa 'e scientìfecamente interessante.
Caro Maurizio Costanzo Show, aiùtame tu...!
Ecco, ce simmo! Superbanalità!
«Caro Maurizio Costanzo Show, aggio pruvato tutte 'e strade ma nun ce è stato niente 'a fa. Tutte 'e porte me se sò 'nchiuse 'n faccia. Songo proprio disperato/a. Nun saccio cchiù che fa. M'hanno cunzigliato 'e me rivòlgere a te, e mò tu si 'a sola speranza mia. 'A vita mia è addiventata 'n inferno. Saccio ca sò assaje 'e perzone ca te scrìvono cu prubbleme pure cchiù gruosse d''o mio, ma voglio me illùdere ca vurraje me dà 'na mano a superà stu mumento difficile mio.
«Tutto è accumminciato quanno 'o sistema nervuso mio nun ha cchiù rietto sotto 'o peso d''e terrìbbele prubbleme familiare mije, ca te sparmio pecché tanto sò sempe 'e stesse disgrazie, ca sùccedono a accussì assaje perzone ca nàscono sfurtunate comme a me. 'O cedimento nervuso 'e origine familiare s'è propagato a ll'ate sfere d''a vita mia, erodènnola progressivamente fino a ll'uosso.
«Mò me sento comme annuro/a annanze â vita, ca me soverchia e me ammacca sotto 'o terrìbbile peso suo. Nun pòzzo guardà ô futuro, e quanno penzo ô passato me vènono 'e trìmmole. Pure sfurzànnome ô màsseme, nun riesco maje a penzà ô presente pe cchiù 'e quacche secondo, pecché dint'ô presente mio nun ce sta niente 'e niente a parte chella granne ll'angoscia ca nun saccio comme te spiegà, ma me leva pure 'o sciato.
«Caro Maurizio Costanzo Show, famme venì ô show tuo a suffrì 'n diretta, io penzo ca ll'esempio d''a sufferenza mia putesse aiutà assaje perzone ca stanno dint'â 'nfelice situazione mia, e fórzo me putesse aiutà a truvà pure 'na ànema bbona ca me voglia aiutà... tengo tanto bisogno 'e aiuto... spisso penzo a me stesso/a comme a 'n auciello 'nfeso carute abbascio d''o nido dint'ô fango, e tutte me caupèstano senza s'addunà e nisciuno me raccoglie e me rimette dint'ô nido...
«Aiuto!
Che senzo tène avé scritto sta rrobba ccà? E pe chiunque ll'àbbia liggiuta, che senzo ha avuto ll'avé liggiuta? Ma quante vote tène senzo avé liggiuto quaccosa ca s'àbbia appena liggiuto? Ogne vota ca se legge quaccosa avarrìa 'a po' sùbbeto doppo fa 'na ràpeda ànalisi pe capì si ha avuto senzo avé liggiuto chello ca se è liggiuto. Se sparmiarrìano gigantesche frammente 'e vita sprecata!
Scusàteme pe sta improvvisa parvenza 'e profondità involontaria. Oje, 'o giuro, avarrìa tanto vuluto essere sulo banale. Ma nisciuno è perfetto.

Roberto Quaglia