sèmm trasend in la era de la verità. Soo minga se sta fras l'àbbia assee sens, ma me divert ciapà in considerazion la ipòtesi che essa l'àbbia sens. Cossa intendi dì? Vedarèmm tra pòcch. Mì istess confidi de aprènd di mè istess parol se a la diciarazion inizial podarann seguì argoment che la legittìmen almen in part.
Sèmm donca trasend in la època de la verità. Per tütta la stòria del mond la verità l'è stada soratütt on att de fed. Chiunque el disess qualunque ròba el podeva dòpo smentì tütt, proponend ona noeuva verità pròpria in sostitüzion de quela vècia ormai scòmoda. L'era fàcil crèd a ona noeuva verità che la se sostitüiva a ona precedent, perché de questa rimaneva minga tràccia in la realtà, foeura ca in la memòria de chi el s'ostinass a regordà. Ma quand regordà l'era scòmod o sconvenient, scordà l'era facilìssim. Del passaa rimaneva pressapòch nagòtt. Se mancava quaicòssa de scrivüü, de ona verità passada podeva minga rimanè nagòtt del tütt. "Verba volant", se diseva defatti. I parol sòrten de la bòca e sübit vòlen via e se dispèrden per semper, e chi l'ha in certün de essi credüü el podarà mai a alter dimostrà che quij certün on dì denver esistèttten.
Incoeu l'è pü minga inscì. Esist la registrazion audiovisiva de imàgin e son. Esist la television.
Personagg pùbblich de spicch cültüral e polìtich hinn minga tal se "esìsten" minga in la Television. E l'ambient màgich de la television el gh'ha ona proprietà denver sorprendenta: el pò regordà e riproponn tütt quell che el sia accadüü dent in sé. Ona diciarazion fada la pò pü vegnì negada, perché la menzògna la vegnaria smascherada facilment, riproponend la imàgin del mentitor dürant l'att istess de mentì. In la època moderna, per chi el gh'àbbia spicch pùbblich e el sia inscì part del Univers Televisiv, Verba Non Volant Pü.
Sèmm domà a i inizzi de la era de la verità, ma già i prim vìttim càscen e se rialzarann minga tant facilment. Vìttim illüster, gròss (ex-gròss) polìtich, ma minga domà lor. La voeuja de verità la cress irresistìbil in di telespettador, ovvèro in la società. Gh'hann süccess i inscì ditt trasmission de "television-verità", che alter hinn minga che el rozz embrion de quell che el sarà la television del fütür. Ma i antìgh critèri stolidament resìsten, e aroccaa in di soo obsolet trincee la pü part di programm televisiv fondaa sora la finzion (inscì sora la menzògna lècita) ancamò persèveren, anca semper de pü inevitabilment anojand.
La reiterazion audiovisiva de rituai menzògn la mett inelüttabilment a nüd la lor natüra de element irreal, rendend via via semper pü difìcil la sospension de la incredülità che la consent al spettador de giovàss del spettàcol che el osserva.
In parol pü pòver, se se abitüa al fatt che quell che se ved el sia tütt "per finta", e alora passa la voeuja de vedèll. Per contrastà sta assüefazion, in cinematografìa hinn ormai pressapòch indispensàbil i "effett special", ovvèro l'espedient de mostrà quaicòssa de fint in on mòd che ancamò el consenta al spettador l'esercizzi de la sospension de la incredülità. In television, ona soporìfera sebben sfavillanta menzognera trasmission de varietà la se anima domà mediant irreverent exploit de sparüü personagg che già vìven e agìssen in la granda Verità del fütür. L'è la categorìa di Grillo, di Benigni, per capìss. Minga di "còmich". I còmich in sens strett hinn destinaa a sparì anca lor, perché farann pü rìd. La reiterazion di bolz schema del fals e artefatt ümorismo lor la mettarà infin a nüd la intrìnseca falsità lor. El viv defatti in la menzògna el còmich che el recita a memòria on copion fingend de improvisà come el polìtich che el sciorina menzògn in la falsa e cecada convinzion de podèi in fütür negà.
L'è la Verità che semper pü la avvinciss. Se ama o se òdia Sgarbi perché el viv e el sguazza con maestrìa in la Verità. Ma se rimann minga indiferent. O se ama se se condivid la soa Verità. O se òdia se se la condivid minga. La Verità l'è minga vüna sola. L'è sempliz e confortant crèd che el sia, ma essa - ahimè e soratütt ahivialter - l'è minga VÜNA.
Ghe stà crescenta affezion, in tütt el mond, per la Verità, "bòna" o "cattiva" che la sia. La eviratrice pü famosa di Stati Uniti, carnefice del fall de John Wayne, l'è deventada ona eroina, perché "vera" in on mòd ünich e original, ancorché orrìbil.
El Maurizio Costanzo Show l'è la trasmission italiana de pü riconossüü e düratür süccess perché l'è "vera" del inizzi a la fin. Pòcch impòrta che spess trist o nojos figür blatèren ròb già ditt miliara de vòlt. Quell che in assolüt el conta l'è savè che quell che se ved el accada denver, e no per finta.
Artista particolarment àbil a parèi ver durarann de pü, ma scomparirann anca lor, prima o poeu, cedend el pass a chi, aparend "vero" in virtü del fatt de l'èss, el gh'avarà savüü fà del pròpri vess ver on degn spettàcol.
Ma el camp indoe sta rivolüzion la sarà pü importanta l'è per fòrza de ròb el camp polìtich. El süccess de Funari el insegnass. Funari l'è "vero", in ognidün di istant in cui el appar sora el video.
I polìtich del fütür gh'avarann de vess semper pü ver. Minga necessariament pü inteligent. Domà pü ver. Ona stüpidità "vera" la sarà pü premiada de ona inteligenza "falsa". La dopiezza malcelada la sarà foriera de rovina. La dopiezza bencelada la durarà domà pü a longh. La contradizion la sarà accetta, purché la para genüina e "vera" e minga on frütt de ona colpèvol volontà de ingann
Tütt quell che me sont incorgiaa de avèj ditt el podaria avèj assee sens o n'avèj pòcch. El me convinc minga del tütt, perché me frülla in ment anca ona speculazion che la condüraria a conclüsion opòst che ccà e adess ve risparmi.
Ma esiti minga a espònn a chi me seguiss anca sti mè döbbi, perché vìv in la verità el significa anca dì quell che se pensa de quell che se è scrivüü o se è pensaa.

Roberto Quaglia