vuê no sopuarti i sociolics. Mi soi metût a pensâ cinc minûts, e mi è vignût in ment che par jessi ricognossûts sociolics al baste fâ un cors di laure in sociologjie, cioè vê assimilât lis nozions che a son intun ciert numar di libris stabilîts e vê passât i esams che ur van daûr (operazion dut altri che dificile par une persone di inteligjence normâl). Ae fin, il sociolic titolât nol è une persone che e à dimostrât di vê capît alc dal compuartament de societât, ma une persone che e à dimostrât di vê studiât ce che altris a àn capît dal compuartament de societât. La mê definizion e podarès sunâ un pôc estremiste, lu amet. Viodìn alore la cuestion di une altre bande: un tâl al studie ducj i libris regolamentârs dal cors di sociologjie, al cjape il so biel certificât di sociolic, po al scribacje articui malfats là che al pastice a stramp cui concets di chei altris che al à imparât, o ancjemò piês al va a dî cualchi frase di efiet in television, o si fâs sierâ par un an bessôl intune grote par scrivi un libri cirint se stes, e ve che la sô identitât di sociolic e je dal dut proclamade e acetade di ducj. Di fat, al baste scrivi che si è sociolics sul biliet di visite, e cuasi ducj a crodaran. Par fâ tasê i increduls al bastarà citâ chi e là a câs Mac Luhan e cualchidun altri che no sai parcè che jo no soi un sociolic.
Pròpit parcè che no soi un sociolic, mi soi intopât in cualchi mê riflession che di nissun sociolic - puaret me - mi è mai sucedût fin cumò di sintî, e che cumò ti ripuarti, Cjâr Maurizio Costanzo Show, e a cualsisei, traviers di te, che di chestis mês frasis al fos mai bersai.
Il sugo al è sempliç e in aparence une vore banâl, e si ricjape intune frase che e dîs dut e no dîs nuie: "LA TELEVISION E JE LA RELIGJON MODERNE."
Biele scuvierte, a disaran in tancj. Ma no fermìnsi in superficie, o dîs jo, e analizìn lis implicazions. Prin di dut: a ce isal zovât, ise che e zove e e zovarà simpri, in ogni timp e lûc dal mont, cualsisei religjon? Nissun sofisim o rispuestis intorteadis, par plasê! Une rispueste sole clare, sempliç, pragmatiche, che no si pues dineâ: "La religjon e servìs a dâ ae popolazion i modei comuns di compuartament."
Tu puedis clamâju come che tu vûs: etiche, morâl, valôrs e v.i. La sostance e je la stesse. In ogni timp e lûc dal mont la religjon e servìs par comunicâ ae int cemût che bisugne compuartâsi. Cualsisei che al à pardabon fede te proprie religjon, si compuarte come che la sô religjon e comande.
La religjon e je indispensabil pe organizazion sociâl, e cui che al pense il contrari al è un bambo e lu dimostrarai tra pôc. No esistin, e no son mai esistudis, societâts umanis cence religjon. Su chest al è un grum di confusion di tiermins, parcè che dome lis religjons tradizionâls a somein vuê tâls a cualsisei di nô (ma no al è stât simpri cussì; vuê il cristian al sa che ancje il maometan al à une religjon; secui indaûr, il no-cristian al jere pal cristian dome un infedêl no degn di vivi, e difat e jere une vore popolâr la vuere sante, ancjemò vuê popolarissime tra i islamics). Lis religjons no-tradizionâls, invezit, no son ancjemò stadis ricognossudis come religjons a ducj i efiets. La plui resinte e potente tra lis gnovis religjons no-tradizionâls e je la Television, e nissun nol à ancjemò cjapât e esprimût in public plene cussience.
I sociolics a cjacarin su la considerazion clare che la Television e sedi il strument di comunicazion plui potent che al sedi mai esistût. Chest al è vêr. Ma al è dome l'inizi.
In tancj dai paîs là che la Television si è slargjade di plui, la religjositât popolâr tradizionâl si è sbassade une vore. Parcè? Ce che o stoi scrivint, come che o ai za dit, nol vûl jessi (e difat nol è) un sagjo sociologjic su lis relazions che a esistin tra television e sens religjôs, ma une letare al Maurizio Costanzo Show là che semplicementri si volte la lûs de cussience coletive intune direzion fin cumò pôc batude. Tantis e masse someancis si cjatin tai compuartaments di cui che al è devot a une religjon tradizionâl e di cui che al è devot ae Television, par liquidâlis come coincidencis. Cualis someancis? Ben, provìn a cjatâint cualchidune insiemi:

• I MODEI COMUNS DI COMPUARTAMENT: Come che o ai za dit, cualsisei che al è devot a une religjon, di jê al cjape i siei modei di compuartament. Al sucêt ai cristians, ai budiscj e ai maometans. E cussì difat al sucêt ancje ai telespetatôrs: a comprin i prodots publicizâts in Television, a copiin lis batudis di spirt dai cabaretiscj Televisîfs, a vuidin la machine cu la imprudence che si vuide in Television (causant cussì, par esempli, lis famosis stragjis dal sabide di sere), a imparin a doprâ la violence cu la nonchalance che e ven doprade in Television (come che al dimostre il fenomen altrimentri no spiegât de iperviolence minorîl in Americhe), a modelin lis lôr preferencis sessuâls sul model dal grant catalic di sex-symbols che si cjate tal univers Televisîf, e vie indenant.
• I DOGMIS: Cualsisei che al è devot a une religjon, al acete cence pensâ i siei dogmis. I devots te Television, a crodin in maniere dogmatiche a ce che ur ven dit tal telegjornâl (i plui furbos si comprasin di crodi a un ciert telegjornâl plui che a un altri, ma la sostance no cambie). E je emblematiche a chest proposit la famose frase, doprade par dimostrâ la veretât di une informazion: "Lu à dit la television..."
• LA "TRANCE": Carateristiche di ogni fedêl dilunc de funzion religjose e je il so colâ in stât di trance. Al sucêt a budiscj, catolics, islamics e zulù. Al sucêt ancje a cui che al è sprofondât intun program televisîf. Cjalant la television si distache de proprie realtât individuâl e il cjâf al mande fûr ondis alfa (segn che no si pues dineâ di une alterazion dal stât di cussience). Come in glesie cul propri diu, denant de Television si identifiche cul ogjet de proprie venerazion, cioè i personaçs Televisîfs. Cuant che la identificazion no rive si cambie canâl (si volte a un altri sant), ma no si va fûr de glesie, cioè no si distude la Television. Si ricor al zapping cuant che no si sa plui a cuâl sant votâsi.
• IL RISPIET DE AUTORITÂT DAI PREDIS: Cualsisei autentic fedêl di cualsisei religjon si svicinarà tremant a cui che al incarne il simbul dal propri cult, cioè la autoritât dai predis. A cjalâ i trimuis, i barbotaments e la solenitât interiôr di cualsisei che si cjati a tu par tu cu la proprie celebritât Televisive preferide, no somein jessi dubis che si trati dal stes e compagn fenomen mentâl.
• LA ERESIE: Une des carateristichis di cualsisei religjon che e sedi tant potente che i fedêi int vedin une esperience cussì assolude di no jessi par nuie cussients che si trati di une religjon, e je chê di produsi il fenomen de eresie, cioè la demolizion cence pietât di cualsisei che nol dimostri tai fats di jessint seguaç. Al è sucedût - cun piçulis variantis - tal Catolicisim e tal Nazisim, e ancjemò al sucêt - in misure diferente - tes gnovis religjons no tradizionâls, come la ricercje sientifiche, la psicanalisi (O tornarìn prime o dopo, in cualchi altre letare - o forsit no... cui lu sa? - sul argoment che ancje la sience, come la psicanalisi - che sience no je - a sedin, in sostance, struturadis no une vore diferentementri rispiet aes religjons tradizionâls.), e la Television. Che al provi il letôr, se nol crôt aes mês peraulis, a fâ fente cui siei interlocutôrs di no savê ce che al è il Maurizio Costanzo Show, il Telegjornâl, di no savê cui che a son pippobaudo, mikebongiorno, mauriziocostanzo, sgarbi... Insistint fin ae fin, cun cualsisei, di no savê pardabon cui o ce che a son lis divinitâts nomenadis, si vuadagnarà la innomine di individuis "strambs", asociâi, che a fasin fente di jessi mats o invezit lu son. In curt, si cjatarà dal dut emarginâts. Al è il marc de eresie moderne. Epûr, cuasi nissun di nô al à mai viodût lis divinitâts nomenadis cui siei voi... dal vîf! A stan di cjase tai nestris cjâfs parcè che o cjapìn la lôr essence in Television, cussì come che il bon cristian al cjape la essence di Diu in Glesie. Stant che la essence Televisive e je plui facile di cjapâ di chê de glesie, parcè che e je furnide di otimis imagjins a colôrs e di suns che a convincin (cumò ancje stereo), la religjon Televisive e sta dal dut cjapant il puest di chê de glesie tradizionâl.

  La fuarce plui grande de religjon Televisive e je che ducj i siei fedêi - che pûr a san plui o mancul ce che e je une religjon - no a àn cussience che si trati di une religjon, e int son duncje devots come che di plui no podaressin. Cun chest no tiri conclusions morâls su la plui o mancul "bontât" de religjon Televisive. Bontât e Cativerie a son categoriis tradidoris, che no cjatin mai unitât di judizi. Cence dubi a varan parût "catîfs", ai eretics torturâts de Incuisizion Cristiane, i predis de Sante Mari Glesie, che ju torturavin no par cativerie lôr, ma par convinzion gjenuine che i "catîfs" a fossin chei altris.
  La religjon Televisive no je ni buine, ni triste, ancje se in jê si pues cjatâ sedi il Ben che il Mâl. La Television e da vuê a ducj nô i modei comuns di compuartament. E insegne il valôr de ecologjie (valôr dal dut assint in ducj i paîs là che la Television no lu à promovût a lunc), ma ancje il valôr de violence (al è chest par cualchidun, me compagn, un valôr negatîf, ma par altris un valôr positîf, tant al è vêr che tancj lu fasin cun braure). E insegne il valôr dai dirits civîi, ma ancje il valôr dai dovês consumistics, condizionantnus a vê di consumâ, consumâ, e simpri plui lavorâ par plui consumâ. E insegne il valôr de lealtât sportive, ma ancje de vuerilie tra tifosariis, condanantle a peraulis, ma tal stes timp promovintle, fasintint un mît negatîf de trasgression. E insegne il valôr de solidarietât, ma ancje chel dal rampantisim, de ricjece a ducj i coscj. E insegne il valôr dal Catolicisim, tignintnus inzornâts su lis orazions dal pape, ma ancje il valôr di une vision dome gjenitâl dal ses, metintnus a disposizion miârs di videocassetis porno. E insegne il valôr di jessi come madreteresadicalcutta, ma ancje il valôr dal consumisim sentimentâl ae americane.
  Capissistu, Cjâr Maurizio Costanzo Show, cemût che a stan lis robis? La plui part dai nestris valôrs e des nestris convinzions nus vegnin dâts vuê de Television, pròpit come che nus vignivin dâts une volte de pôre di Diu. Ma la Television e esist di pôc timp, di pochissim timp. La plui part dai talians e je cressude cence la pôre de Television, e une conversion di grancj no vâl une fede inlidrisade fin dai prins agns di vite. I vêrs e autentics adeps assolûts ae religjon de Television a son dome i fruts che a stan ancjemò cressint... e al è duncje te societât di doman, cuant che ducj a saran cressûts dal inizi te pôre Televisive, che o viodarìn a plen i efiets clamorôs de rivoluzion in at...
  Speculâ al è leciti, divertent e cualchi volte dovût, Cjâr Maurizio Costanzo Show. Al sarà intune altre letare, forsit, che mi sbizarissarai a speculâ su cemût che e sarà la societât dal avignî, cuant che la Television e regnarà sovrane tra lis religjons dal mont, un ream cussì assolût che i sudits i ubidissaran a vuarbe, cuntune devozion compagne di chê che altris sudits, in altris timps, a vevin pal lôr re, pal lôr pape, o pal strion dal vilaç. Cussients dome de diversitât gjerarchiche che no si pues colmâ che ju separarà dai lôr gnûfs dius.

  Roberto Quaglia

  ---