a scrîvete ancheu o l'é o Max Morando ch'o cûa in mì. Adêuvierò coscì formalménte o seu çervèllo pe scrîve tûtto quéllo ch'o segoirâ, mostràndo coscì a seu fàccia, pròpio cómme se mì fîse lê, ò ciûtòsto cómme lê o fîse mì, pûre ciascedùn de niâtri dôi esséndo primma de tûtto lê mæximo. Ò coscì decîzo de scrîveLe quànde ò vìsto tûtti quélli câxi umàn, ò prezùnti tâli, avixendâse in sce-e seu poltrónn-e, ò prezùnte tâli. O canpionâio o l'é vârio, o zoo o l'é quæxi a-o conpléto, ma mì raprezénto o Câxo recugéito a fatô comùn, l'esénsa da pietæ, o sinònimo da umànn-a pietâte, l'antìtexi de l'eròe e de l'antieròe. O pénse, Geometra Costanzo Show, ch'e voéivan destinâme 'n quadratìn in sciô 740, pròpio tra l'Unión Gêxe cristiànn-e aventìste do 7° giórno e e Assemblêe de Dîo in Itàlia, pe fâme avéi l'8 pe mìlle, distribuçión de pietæ diretaménte da-i grosìsti, da-o produtô a-o consumatô. Cómme ghe dixéiva, Ragionier Costanzo Show, mì són 'n pietòfago, me nûtro da pietæ d'âtri, no ch'fàsse ninte pe meritâmela, sôlo ch'e viçénde ch'm'àn colpîo àn lasciòu 'na spêce de ségno invixìbile ch'o condànna e persónne orbitànti a mæ vìtta a sviluppâ immediataménte sénsci de córpa smezuæ, conplèssci de superioritæ tendénti a l'infinîo, e in quàrche râro câxo ê costrénze ascì a burlâse de mì, ma con tànta arguçia. Quélla che quarchedùn o identìfica, semplicisticaménte, inta sçìga (ma ch'mì preferìscio, pe vastitæ do fenòmeno, e pe 'na mæ tendénsa a no etichetâ ninte pe no intrappolâ fenòmeni conplèssci in vêui schémi, no ridûe a 'na sôla paròlla) a l'é into mæ câxo atàvica. Preferìscio, pe brevitæ e pe dirètta ò quæxi, conoscénsa di fæti comensâ a mæ stöia da-o matrimònio di mæ genitôri, tûtti dôi evidenteménte de umilíscime orìgini (e cómme vedrémo in segoîto ascì de umilíscimi destìn). A néutte de-e nòsse o crollò a dîga do Vajont, prìmmo ségno premonitôre, pûrtròppo inascoltòu. Dòppo quàrche ànno, sénsa ch'se regòrdan tragêdie dégne de rilêvo mì vegnî a-a lûxe, o 19 màzo do 1966. Con 'na curiôza sintonîa co-a distribuçión di sacraménti a stöia a proségoe co-a mæ primma comunión, e chì, de sòlito, inti mæ interlocutôri o coménsa 'n bàllo ritoâle de probàbile orìgine lapònica, segûamente 'n gèsto propiziatöio a-a màscia fertilitæ, perché o prevéde o rìtmico palpegiaménto scrotâle frammìsto a 'n mormöio prononçiòu a dénti strénti e co-i éuggi vòlti a-o çê. Dixéiva (o me scûze Avvocato Costanzo Sciò pe sti mæ intermèzzi, ma sèrvan a rénde ciù figurâ e vîva a mæ lettia), a mæ primma comunión (ch'a coinçidde ascì co-l'ùrtima) i mæ genitôri deçizàn de fâmela "fâ" in coinçidénsa co-a nòstra setemànn-a giànca, a-a mainêa de permétte a-e nòstre màgre finànse o svolgiménto de tûtte dôe e atividæ sportîve (sciìstica e eucarìstica). O lêugo preçèrto o fû Tesero, ridénte çitadénn-a ch'quàrche ànno dòppo a vegnî parçialménte sguassâ vîa da-o cròllo da dîga da Val di Stava, ma no antiçipémmo i ténpi. Inti giórni immediataménte preçedénti a-a mæ primma comunión o crollò a funivîa de Cavalese (sôlo pöchi chilòmetri da Tesero) provocàndo a mòrte de tûtti i ocupànti, feua che ùnn-a, paralizâ. A mæ famìggia e i amîxi comensàn dòppo a câze, cómme inte 'na guèra no diciarâ a partî da-o 1972, prìmmo barba mòrto pe cànchero, o prìmmo nònno o câze ànni prìmma da mæ nàscita ascì lê pe cànchero, e dòppo cao d'ànno 1980 (amîgo mòrto in afondaménto Phoenix), 1981 lalla mòrta pe cànchero, 1982 nònna fortunataménte mòrta pe câuze natuâli, vêuo dî sfondaménto do crânio pe 28 naturalíscime martelæ infèrtighe da-o cómplice de mæ cuxìn (alôa quindiçénne) a scòpo rapìnn-a, pe l'acquìsto de 'n validíscimo motoçìclo. Inte l'ocaxón o pâ, mæ barba, into gòffo tentatîvo de scagionâ o figgio o ezibî cómme pröva d'inoçénsa 'n motorìn, ch'o sostegnî avéi regalòu a Thor (da alôa strapelùmme prediléto de l'amòu cuxinétto). Sfortunataménte, avéndo o barbétta quàrche preçedentùsso penâle, e esséndo o motorìn rezultòu rubòu o finî in galêa ascì lê, fìnn-a a quàrche ténpo fâ.. Me reûsce a segoî Dottor Costanzo Show? Ò fòrsci són tròppo nebulôzo inte l'espoxiçión di fæti? Ma o sa a fùria a l'é tirànna, e dòppo no se sa mâi... Comùnque dixéiva, a stöia a dêve continoâ, 1985 nònno mòrto pe probàbile trasfuxón sbaliâ, into 1986 a mòrte de mæ nònna a ne cêse de sorprêza, 'n ictus pròpio no se ô spetâvimo, òrmâi tifâvimo pe-i tîpi ciù spetacolâri de mòrte poscìbile, o l'êa comensòu ascì o totomòrte nêcro-concórso a pronòstichi. Into 1987 mæ pâ ch'pûre o brillâva de originalitæ esséndo o creatîvo de famìggia o deçidde de moî a-a mainêa banâle, pe cànchero a-i pormoìn, gràçie a Dîo (prêgo!) ghe pensò a dìtta prêsso a quæ o travagiâva cómme operâio a vivaçizâne a mòrte, a deçidde de suicidâse, a dìtta, fallimento, ò mêgio liquidaçión, e coscì cìcca dinæ, inûtili perfètamente vìsto ch'intratànto avéivimo o sfràtto esecutîvo. A capìsce ascì lê Minatore Costanzo Show ch'a segoénte mòrte de 'n âtro câo amîgo pe àsma méntre o prestâva servìçio de lêva, a scompàrsa do pâ e da moæ inti segoénti dôi ànni, a mòrte de tûtti dôi i genitôri de 'n mæ conpàgno de clàsse in scimultànea pe dôe câuze diferénti no poéivan che annoiâme. 'N pö de ciù me incuriozî 'n âtro fratèrno amîgo finîo polpetòu sótta 'n tratôre méntre o se recâva a-o seu prìmmo giórno de travàggio dòppo 'n lóngo perìodo de dezocupaçión, trascuràbile o fæto ch'o locâle de propietæ di genitôri o fû brûxòu dôe vòtte prìmma ch'lô ô lasciâsan. 'Na dìtta prêsso a quæ travagiâi a l'êa condûta da dôi sinpaticíscimi coniùgi, i quæ avéivan creòu tûtto pe-o figgio, 'n figeu straordinâio co-l'hobby da pésca subacqoêa... devo terminâ a stöia ò a l'imàgina lê? Finîa a pàrte necrològi, ghe tegniéiva a dâ 'na descriçión somâria ascì de âtri moménti de vìtta felîçe e armoniôza, vìsto che cómme ghe l'ò dîto mì són 'n pietòfago, e no poriéiva lasciâ 'n'ôpera inconpîa. O barba de cûi prìmma, o pâ de l'scultô de càrne, Thor pe intendîse, no apénn-a sciortîo da-o càrcere o l'é stæto fermòu, sénsa paténte, a-a goîda de 'na màchina rubâ ch'a trasportâva dröga, 'n âtro barba o vegnî sparòu in circostànse mistitôze, e mì deçizi de scrîveghe sta lettia pöco prìmma ch'tentàn de ridûla in frappé.... âtri fæti saiéivan da contâ, ma o ténpo o l'é tirànno e o computer o se stâ lentaménte aflosciàndo sótta o pêzo da stöia. Mì sò ch'òua lê o me tême, no tànto perché in mæ prezénsa o ghe poriéiva capitâ quarcösa, o l'é abàsta inteligénte pe capî ch'ghe poriéiva capitâ comùnque, ma perché mì saiéiva a stöia finâle, quélla da ùrtima puntâ de Maurizio Costanzo Show, l'ùrtima frontêa da pietæ. A çêxétta in sce-a tórta a saiéiva ch'o teàtro Parioli o crollésse o giórno prìmma da puntâ a-a quæ o m'aviéiva invitòu... Auguri Messia Costanzo Show

Max Morando