a scrìvet incoeu l'è el Max Morando che el cova dent in mì. Doperaroo inscì formalment el sò cervell per scriv tütt quell che seguirà, mostrand inscì la soa faccia, pròpi come se mì füss lü, o piütòst come lü el füss mì, anca se ognidün de nün düü essend prima de tütt sé stess. Hoo inscì decis de Ghe scriv quand hoo vist tütt quij cas üman, o presünt tal, avvicendàss sora i soo poltron, o presünt tal. El campionari l'è vari, el zoo l'è quasi al complet, ma mì rapresenti el Cas ridott a fattor comün, l'essenza de la pietà, el sinònim de l'ümana pietaa, l'antìtesi de l'eroe e de l'antieroe. Pensi, Geòmetra Costanzo Show, che voeuraven destinàm on quadratin sora el 740, pròpi tra l'Unione Chiese cristiane avventiste del 7° dì e i Assemblee di Dio in Italia, per fàm avè l'8 per mille, distribüzion de pietà diretament di grossista, del produttor al consümador. Come ghe disevi, Rasgionatt Costanzo Show, mì sont on pietòfagh, me nütrissi de la pietà di alter, minga che foo nagòtt per meritàmela, domà che i vicend che m'hann colpii hann lassaa ona specie de segn invisìbil che el condanna i persòn che òrbiten la mia vita a svilüppà immediatament sens de colpa smisüraa, compless de superiorità tendent a l'infinii, e in quaich rar cas i costringg anca a burlàss de mì, ma con assee argüzia. Quella che quaidün el identìfica, semplicìsticament, in la malasòrt (ma che mì preferissi, per vastità del fenòmen, e per ona mia tendenza a etichettà nagòtt per intrappolà minga fenòmen compless in schema voeuj, minga ridüü a ona sola parola) l'è in del mè cas atàvica. Preferissi, per brevità e per direta o quasi, conoscenza di fatt començà la mia stòria dal matrimòni di mè genitor, tütt düü ovviament de ümilìssim orìgin (e come vedarèmm dòpo anca de ümilìssim destìn). La nòtt di nòzz la crollà la diga del Vajont, prim segn premonitòri, pürtròpp inascoltaa. Dòpo quaich ann, senza che se regòrden tragedie degn de riliev mì vegnett a la lüs, el 19 magg del 1966. Con ona cüriosa sintonìa con la distribüzion di sacrament la stòria la proseguiss con la mia prima comünion, e ccà, de sòlit, in di mè interlocütor comincia on ball rituale de probàbil orìgin lappònica, segürament on gest propiziatòri a la màscola fertilità, perché el preved el rìtmich palpegiament scrotal framiss a on mormorì pronünciaa a dent strecc e con i oeugg voeuj al ciel. Disevi (me scüsass Avocat Costanzo Sciò per sti mè intermezz, ma sèrven a rènd pü figürada e viva la mia lettera), la mia prima comünion (che la coincidett anca con l'ültima) i mè genitor decidèttten de fàmela "fà" in coincidenza con la nòstra setimana bianca, in mòd de permètt a i nòstri magher finanz el svolgiment de tütt düü i attività sportiv (sciìstica e eücarìstica). El loeugh prescelt el fü Tesero, ridenta cittadina che quaich ann dòpo la vegnett parzialment scovada via dal croll de la diga de la Val di Stava, ma anticipèmm minga i temp. In di dì immediatament precedent a la mia prima comünion la crollà la funivia de Cavalese (domà pòcch chilòmeter de Tesero) provocand la mòrt de tütt i occüpant, foeura vüna, paralizzada. La mia famiglia e i amis cominciàren poeu a cascià, come in ona guerra minga diciarada a partì dal 1972, prim zìo mòrt de cancher, el prim nònno el cascià ann prima de la mia nascita anca lü de cancher, e poeu capdann 1980 (amis mòrt in afondament Phoenix), 1981 zìa mòrta de cancher, 1982 nònna fortünatament mòrta de causa natüral, ovvèro sfondament del cranni per 28 natüralìssim martelaa infertid del còmplice del mè cüsin (alora quindexenn) a scòp rapina, per l'acquist de on validìssim motociclo. In quela ocasion el pà, mè zìo, in del gòff tentativ de scagionà el fioeu el esibett come proeuva d'inocenza on motorin, che lü el sostegnett de avèj regalaa a Thor (de alora sora-nòmm predilett de l'amaa cüsinett). Sfortünatament, avend el zietin quaich precedentin penal, e essend el motorin risültaa robaa el finett in galera anca lü, fina a quaich temp fa.. El me riess a seguìm Dottor Costanzo Show? O forsi sont tròpp nebülos in la esposizion di fatt? Ma el sa la prescia l'è tiranna, e poeu se sa mai... Comunque disevi, la stòria la gh'ha de continuà, 1985 nònno mòrt de probàbil trasfüsion sbagliada, in del 1986 la mòrt de la mia nònna la ne coïett de sorpresa, on ictus pròpi ghe l'aspettàvom minga, oramai tifàvom per i tipi pü spettacolar de mòrt possìbil, l'era cominciaa anca el totomòrt necro-concors a pronòstich. In del 1987 el mè pà che anca el brillava d'originalità essend el creativ de famiglia el decidett de morì in mòd banal, de cancher ai polmon, grazie a Dio (preghi!) ghe pensà la dita indoe el laurava come operari a vivacizzàgh la mòrt, la decidett de coppàss, la dita, faliment, o mej liquidazion, e inscì cicia danee, inütil perfettament vist che intratant gh'evom el sfratt esecütiv. El capiss anca lü Minador Costanzo Show che la successiva mòrt de on alter car amis de asma mentre el prestava servizi de leva, la scomparsa del pà e de la mader in di successiv düü ann, la mòrt de tütt düü i genitor de on mè compagn de class in simültanea per düü causa different podeven domà anojàm. On poo de pü me incüriosì on alter fratern amis finii polpettaa sòta on trator mentre el se recava al prim dì del sò laurà dòpo on longh perìod de disocüpazion, trascüràbil el fatt che el local de proprietà di genitor el fü brüsaa düü vòlt prima che lor el lassassen. Ona dita indoe el laurava l'era condotta de düü simpaticìssim còniüg, i qual aveven creaa tütt per el fioeu, on fioeu straordinari con l'hobby de la pesca subacquea... gh'hoo de terminà la stòria o la se la imàgina lü? Finida la part necrològica, ghe tegnaria a dà ona descrizion somaria anca de alter moment de vita felice e armoniosa, vist che come l'hoo ditt mì sont on pietòfagh, e podaria minga lassà ona òpera incompiüda. El zìo de cui prima, el pà del scültor de carna, Thor per capìss, apena sortii del càrcer l'è staa fermaa, senza patenta, a la guida de ona màchina robada che la trasportava dròga, on alter zìo el vegnett sparaa in circostanz misteriosa, e mì decidett de ghe scriv sta lettera on poo prima che tentassen de redüsela in frappé.... alter fatt sarìen de contà, ma el temp l'è tirann e el computer el se sta lentament aflosciand sòta el pes de la stòria. Mì soo che adess lü el me tem, minga tant perché in mia presenza ghe podaria capità quaicòssa, l'è assee inteligent per capì che ghe podaria capità comunque, ma perché mì sarìa la stòria final, quella l'ültima puntada de Maurizio Costanzo Show, l'ültima frontiera de la pietà. La scireseta sora la torta sarìa che el teater Parioli el crollass el dì prima de la puntada a cui el m'avaria invidaa... Aügüri Messia Costanzo Show

Max Morando