son Paperino. No'l xe un soranome. Son proprio Paperino el barba de Qui, Quo, Qua, el nevodo de Paperon. Tuti i scrive a'l Maurizio Costanzo Show e go cussì deciso de farlo anca mi.
No so ben parché lo fao. Ma i sa parché lo fa tuti i altri che i te somerze de létere? Nissun el sa realmente gnente de mi. La gente la lese i fumeti e cussì par questo la se sente autorizà a crédar de saver tuto de Paperino. Nossignori. Drio a le quinte, fora da le stàtiche pàgine indove esisto par el puro dileto de grandi e pìcoli, go na vita segreta, che no la xe queła de Paperinik. La xe na vita de merda. Forse el xe par questo che go deciso de scrìverte, caro Maurizio Costanzo Show.
Ma forse qualcosa se intuise anca lezendo i fumeti che i xe el mio mestier. La proverbial mia scaogna, le angùstie che'l barba Paperon tuti i giorni el me inflize, le umiliasion patìe par òpera dei dispetosi e sapienti mii nevodeti. E po queła stronsa de Paperina che no me la dà e che invese la se fa montar - ne son sicuro - da queł tronfio inbecile inbrillantinà de Gastone!
El xe Paperopoli che la porta scaogna. Tuto el danaro che ghe xe se lo ga cucà el mio barba e Rockerduck. Caro Maurizio Costanzo Show, ti ga da asolutamente invitarme inte la to trasmision. Ancuo el xe posìbile, ti lo sà? Anca se son un fumeto o un carton animà. Se Roger Rabbit el pol interagir con i èseri umani, alora poso anca mi. Ti farè un figuron, a invitarme.
Voaltri no gavì mai visto Paperina nuda. Mi sì. Da'l buso de la seradura. El gera l'ùnico sistema. Anca Qui, Quo e Qua i la ga vista. Anca Pippo, par sbaljo (cojon com'el xe el stava in realtà sercando de véder se steso nudo). Anca Archimede Pitagorico, con una de le so danà invension par vardar atraverso i muri. Caso, i la ga vista nuda tuti fora voaltri, che la gavì vista soło inte i fumeti, a interpretar el roło de verzineła vanitoseła. Ebe, no gavì perso gnente. Paperina nuda la xe pezo de Jessica Rabbit vestìa. E questo el xe l'oltrajo definitivo! Poso amétar che na strafiga come Jessica Rabbit no me la dà, ma Paperina... caso, tra l'altro nuda la xe pràticamente idèntica a mi steso. Se ghe cavi i vestiti no'l xe che vansa grandi diferense. Ghe xe queł caso de fioco roso che eła la se ga tacà in testa giorno e note che ne distingue. Mi el asurdo bareto da marinaro mio ogni tanto me lo levo, anca se cussì meto nuda la calvisie. Eła, el so fioco roso... mai! E po la fa i vovi. Cristo, ne fa almanco uno a'l giorno. Lo gavemo tuti visto da'l buso de la seradura. Gavaresimo gavù da imaginàrselo, pàpari come semo, che queła là la fa un vovo dopo l'altro. La xe na scena schifosa. Voraria saver po indove se li inbosca. Secondo mi i finise tuti da la Nona Papera che la li fa sparir inte le so torte che po noaltri se magnemo. Che schifo. Brute storie de canibalismo.
Caso, son proprio scaognà. Scùsame se digo senpre "caso", ma inte i fumeti no lo poso far e go da sfogarme. E po el xe de moda. Caso, dir caso no vol dir un caso ma tuti no i fa altro che dirlo, e se i lo fa in television i pasa ancora par persone co le bałe.
Te prometo che se ti me inviti no parlarò mal inte la to trasmision. Opur lo farò, se ti sarè però ti a domandàrmelo. Se ti te vergogni a dìrmelo fàme i gesti. Capiso in presa, mi, fora dai fumeti. Soratuto le cose cussì sénplise.
Scùsame se parlo cussì, in modo diverso che inte i fumeti indove fadigo. La gente la se speta senpre le stese cose da mi, in ogni contesto. Nissun el se interesa a la persona o a'l pàparo che mi sento de èser. Tuti i vol senpre védarme inte'l personajo che i ga inparà che mi son. Caso, a furia de volerme tuti véder scaognà, finiso par èserlo davero anca inte la vita privà. Rock Hudson el gera un personajo virile, ma in realtà el gera buliso. (Inte'l dialeto de Paperopoli buliso vol dir ricion). Mi son un personajo scaognà, ma in realtà lo son ancora de pì.
Caso, el ga da èser vero che chiunque el xe proprio queło che tuti i pensa e i vol che lu o eła el sia. Inte la mia vita privà le cose le me va ancora pezo che inte i fumeti. Go senpre asè malatie, con mijara de sìntomi tuti diversi, intanto che inte i fumeti quando sto mal go sénplisemente un termòmetro in boca. Par esenpio go el cataro. Ma no soło inte i bronchi. Anca inte i oci e soto le scèle. Tuti gavì visto, inte i fumeti, che mi no go denti. Ebe, el xe proprio cussì. Ma inte i fumeti me magno i supersandwich che no i finise pì... ma la xe tuta finsion. In realtà, sensa denti no poso mastegar, e inte la vita real me alimento de brodeti.
Perdóname se la mia létera la par un poco confusa. Son lievemente inbriago. Cosa ve spetàvi da un marinaro? Gavì notà che inte i fumeti camino senpre scalso? Ebe, anca inte la vita real. Ma inte i fumeti la strada no la xe costelà de ciche e strónsi de can come inte la realtà indove mi ogni momento li pesto.
Confeso che me masturbo. Son disposto a dirlo anca in trasmision, se el pol servir a aumentar l'audience. Go provà anca a farme le cane, sia inte la realtà che inte i fumeti. Naturalmente stavo fadigando in negro, par un serto Andrea Pazienza che no'l gera un fumeto imortal e de fato el xe po morto. Po go finìo. Cosa serve farse le cane quando la realtà la xe za de par sé conpletamente fora de testa? Basta verzer i oci e vardar. E voaltri savì che i mii oci i xe ben grosi. I me li disegna grosi e lo son anca in realtà. Queło che no vedì inte i fumeti i xe tuti quei caso de mosconi che i me finise drento ogni sinque minuti.
Savì, go qualche idea su la scaogna che la me perseguita in canpo sentimental: Come caso fao a basar qualcheduna co'l beco che me retrovo? Se po la persona che vojo basar la ga el beco anca eła (o anca lu), la facenda la se fa terìbilmente incasinà. Come fa a basarse dignitosamente e co la regolamentar lussuria un pàparo e na pàpera co'l beco fato come el mio? Pensè ben a'l mio beco. Lo gavì visto mijara de volte inte i mii fumeti. Visto de profiło, come mi me vardo speso a'l specio, el xe sensa dubio un sìmboło fàlico (Pico de Paperis el saria d'acordo con mi). El mio beco el xe fato par penetrar, ne son sicuro. No pensè che sia un manìaco sesual. El xe un rasonamento de tipo geomètrico. El mio beco el xe un sòlido afusolà co la tìpica aerodinamisità de un strumento penetrante. No ridì de mi se no rieso a esprìmerme co la dovù presision. Son soło un marinaro scaognà. Ma con un beco penetrante. No riusirì a convìnserme del contrario. Ebe, caso, anca Paperina la ghe l'ha. Come caso faria a basarla, anca se eła la me lo lassase far?
Caro Maurizio Costanzo Show, no vojo delùder nissun dei fans del personajo che interpreto su'l picolìsimo schermo del giornaleto de fumeti che'l inflasiona le edìcole. Ma ormai son grando da un casin de tenpo e rivéndico el dirito de venir anca mi na volta da ti par far saver anca mi a tuti i mii casi. Mio pare Disney el xe morto un saco de tenpo fa. El me ga lassà in eredità un contrato a vita con l'asienda che la porta el so nome. Ghe l'ho inte'l culo. Scùsame se parlo cussì, ma fichève ben in testa che son un marinaro, un marinaro scaognà, e anca frustrà inte'l so roło de marinaro parché no go mai trovà un inbarco che'l fuse uno. El porto de Paperopoli el xe in man ai comunisti, che i lo ga fato falir. Disney el gera un sàdico. A mi tute le disgrasie, a'l barba Paperon tuti i schei, e ai comunisti el porto de Paperopoli. Disney el gera un sàdico.
Go tre nevodeti che i me ronpe senpre i cojoni co'l manual de le giovani marmote. Go tuti i svantaji de gaver tre fioi sensa gnanca gaver gavù el vantajo de gaverme fato na scopà che la fuse una. Disney el gera un sàdico.
Go na màchina de merda monoposto a metà, che par portarme atorno el nevodame li go da méter inte'l bagajaio. Nissun de le seneggiadure dei mii fumeti el ve ga mai dito la marca. Ebe, ghe credo, i se vergognava. El gera el prototipo scartà de la Trabant, l'auto-scatoleta-de-alise che deso i buta via anca inte l'ex Germania de l'Est.
Ebe, insoma, Maurizio Costanzo Show, invìtame un poco da ti che te ne conto do su'l barba Paperon. Ti credi che'l se sia tegnù fora da Tangentopoli? Caso, tra lu e Rockerduck...
Me xe scadù la ricreasion. No te poso pì scrìver. Quando fadigo no poso pì eméter parołe che no le sia contegnùe inte la nuvoleta aparente de qualche fumeto.
Cribio, no son pì gnanca sicuro de èser davero Paperino. Anca travestìo cussì sento senpre na gran spusa de Roberto Quaglia.

Roberto Quaglia