sont Paperino. L'è minga on soranòm. Sont propri Paperino el zio de Qui, Quo, Qua, el nevod de Paperone. Tücc scriven al Maurizio Costanzo Show e hoo inscì decis de fàll anca mì.
Soo minga ben perché el foo. Ma sann perché el fann tütt i alter che te sommèrgen de letter? Nissün el sa realment nagott de mì. La gent la leng i fümett e inscì per quest la se sent autorizzada a cred de savè tütt de Paperino. Nossignori. Dedree a i quint, foeura di stàtich pàgin indove esisti per el pür dilett de grand e piscinitt, gh'hoo ona vita segreta, che l'è minga quela de Paperinik. L'è ona vita de merda. Forsi l'è per quest che hoo decis de scrìvet, car Maurizio Costanzo Show.
Ma forsi quaicoss se intüiss anca legend i fümett che hinn el mè mestee. La mia proverbial malasòrt, i angüstie che el zio Paperone tütt i dì el me infligg, i ümiliazion patii per òpera di dispettos e sapient mè nevodin. E poeu quela stronza de Paperina che me la dà minga e che inveci la se fa montà - ne sont sicür - de quel tronfi imbecill imbrillantinaa de Gastone!
L'è Paperopoli che la porta malasòrt. Tütt el danee che ghe n'è se l'hann cücaa el mè zio e Rockerduck. Car Maurizio Costanzo Show, te gh'heet de assolütament invitàm in la toa trasmission. Incoeu l'è possìbil, te 'l seet? Anca se sont on fümett o on carton animaa. Se Roger Rabbit el pö interagì con i esser üman, alora poeudi anca mì. Te faré on figüron, a invitàm.
Vialter avii mai vist Paperina nüda. Mì sì. Del boeucc de la seradüra. L'era l'ünich sistema. Anca Qui, Quo e Qua l'hann vista. Anca Pippo, per sbali (cojon com'el l'è el stava in realtà cercand de vedè sè istess nüd). Anca Archimede Pitagorico, con vüna di sò danaa invenzion per vardà atraverso i mür. Cazz, l'hann vista nüda tücc foeura vialter, che l'avii vista domà in di fümett, interpretà el rœul de verginella vanitosella. Ebén, avii perdüü nagott. Paperina nüda l'è pesg de Jessica Rabbit vestida. E quest l'è l'oltragg definitiv! Poeudi ammett che ona strafica come Jessica Rabbit me la dà minga, ma Paperina... cazz, tra l'alter nüda l'è pràticament idèntica a mì istess. Se ghe cavet i vestii l'è minga che avanza gran differenz. Gh'è quel cazz de fiocch ross che lee la gh'ha impizzaa in coo dì e nòtt che ne distingue. Mì l'assürd baretin de marinar ogni tant me 'l levi, anca se inscì meti nüd i calvizzi. Lee, el sò fiocch ross... mai! Epoeu la fa i oeuv. Crist, ne fa almen vün al dì. L'emm tücc vista del boeucc de la seradüra. Gh'avaríom avüü de imaginàssel, pàper come semm, che quela là la fa on oeuv dopo l'alter. L'è ona scena schifosa. Vorria savè poeu indove se i imbosca. Second mì finissen tütt a la Nonna Papera che i fa sparì in di sò tort che poeu nün se i mangiom. Che schivi. Brütt storie de canibalism.
Cazz, sont propri sfortünaa. Scüsom se disi semper "cazz", ma in di fümett el poeudi minga fà e gh'hoo de sfogàm. E poeu l'è de moda. Cazz, dì cazz el voeur dì on cazz ma tücc fann alter che dìll, e se el fann in television pàssen ancamò per persònn coi ball.
Te prometti che se te m'invitet parlaroo minga mal in la toa trasmission. Oppür el faroo, se te saré però tì a domandàmmel. Se te te vergognet a dìmmel fàm i gest. Capissi prest, mì, foeura di fümett. Soratütt i robb inscì sempi.
Scüsom se parli inscì, in mœud divers che in di fümett indove fadighi. La gent la se spetta semper i stess robb de mì, in ogni contest. Nissün el se interessa a la persòna o al pàpar che mì senti de vess. Tücc voeuren semper vedèm in del personagg che hann imparaa che mì sont. Cazz, a füria de volèm tücc vedè sfortünaa, finissi per vèssel denver anca in la vita privada. Rock Hudson el l'era on personagg viril, ma in realtà el l'era büliccio. (In del dialett de Paperopoli büliccio el voeur dì ricchion). Mì sont on personagg sfortünaa, ma in realtà el sont ancamò de pü.
Cazz, el gh'ha de vess ver che chissessia l'è propri quell che tücc pènsen e voeuren che lü o lee el sia. In la mia vita privada i robb me vann ancamò pesg che in di fümett. Gh'hoo semper assee malatii, con migliara de sìntom tütt divers, mentre in di fümett quand sto mal gh'hoo semplicement on termòmeter in boca. Per esempi gh'hoo el catar. Ma minga domà in di brònch. Anca in di oeucc e sota i scell. Tücc avii vist, in di fümett, che mì gh'hoo minga i dent. Ebén, l'è propri inscì. Ma in di fümett me mangi i supersandwich che finissen pü... ma l'è tütta finzion. In realtà, senza dent poeudi minga masticà, e in la vita reala me alimenti de broditt.
Perdònom se la mia lettera la par on poo confüsa. Sont leggerment imbriagh. Cossa ve spetavev de on marinar? Avè notaa che in di fümett camini semper scalz? Ebén, anca in la vita reala. Ma in di fümett la strada l'è minga costelada de cicch e stronz de can come in la realtà indove mì ogni moment i càlpesti.
Confessi che me masturbi. Sont dispòst a dìll anca in trasmission, se el pö servì a aumentà l'audience. Hoo pruvaa anca a fàm i cann, sia in la realtà che in di fümett. Naturalment stava faticand in negher, per on cert Andrea Pazienza che el l'era minga on fümett immortal e defatt l'è poeu mort. Poeu hoo finii. Cossa el serv fass i cann quand la realtà l'è giamò de per sè completament foeura de coo? Basta dervì i oeucc e vardà. E vialter savii che i mè oeucc hinn ben gross. Me i disègnen gross e el sont anca in realtà. Quell che vedii minga in di fümett hinn tütt quii cazz de moschin che me ghe finissen dent ogni cinch minüt.
Savii, gh'hoo quaic idea sü la malasòrt che la me perseguita in camp sentimental: Come cazz foo a basà quaicedüna col bech che me retrovi? Se poeu la persòna che voeuri basà la gh'ha el bech anca lee (o anca lü), la facenda la se fa terribilment incasinada. Come fann a basàss dignitosament e con la regolamentar lussüria on pàpar e ona pàpera col bech faa come el mè? Pensee ben al mè bech. L'avii vist migliara de voeult in di mè fümett. Vist de profil, come mì me vardi spess al specc, l'è senza dübi on sìmbol fàllich (Pico de Paperis el saría d'accòrd con mì). El mè bech l'è faa per penetrà, ne sont sicür. Pensee minga che sia on manìach sessüal. L'è on ragionament de tipo geomètrich. El mè bech l'è on sòlid afüsolaa con la tìpica aerodinamicità de on strüment penetrant. Ridii minga de mì se riessi minga a esprimom con la dovüda precision. Sont domà on marinar sfortünaa. Ma con on bech penetrant. Riüssarii minga a convincom del contrari. Ebén, cazz, anca Paperina la ghe l'ha. Come cazz faría a basàla, anca se lee la me 'l lassass fà?
Car Maurizio Costanzo Show, voeuri minga delüd nissün di fans del personagg che interpreti sü el piccolìssim schermo del giornalett de fümett che el inflaziona i edìcol. Ma oramai sont grand de on casin de temp e rivendichi el dirit de vegnì anca mì ona voeulta de tì per fà savè anca mì a tücc i mè cazz. El mè pà Disney l'è mort on sacch de temp fa. El m'ha lassaa in eredità on contratt a vita con l'azienda che la porta el sò nòm. El gh'hoo in del cül. Scüsom se parli inscì, ma ficchév ben in coo che sont on marinar, on marinar sfortünaa, e anca früstraa in del sò rœul de marinar perché hoo mai trovaa on imbarch che el füss vün. El pòrt de Paperopoli l'è in man ai comünista, che l'hann faa falì. Disney el l'era on sàdich. A mì tütt i disgrazi, al zio Paperone tütt i danee, e ai comünista el pòrt de Paperopoli. Disney el l'era on sàdich.
Gh'hoo trii nevodin che me ròmpen semper i cojon col manüal di giovani marmotte. Gh'hoo tütt i svantagg de avègh trii fioeu senza nanca avè avüü el vantagg de fàm ona ciavada che la füss vüna. Disney el l'era on sàdich.
Gh'hoo ona màchina de merda monopòst a metà, che per portàm intorna el nevodam i gh'hoo de mett in del bagagliaa. Nissün di sceneggiadür di mè fümett el v'ha mai ditt la marca. Ebén, ghe credi, se vergognàven. L'era el prototip scartaa de la Trabant, l'auto-scatoletta-de-alis che adess trii via anca in la ex Germania de l'Est.
Ebén, insomma, Maurizio Costanzo Show, invìtom on poo de tì che te ne conti düü sü el zio Paperone. Te cred che el se sia tegnüü foeura de Tangentopoli? Cazz, tra lü e Rockerduck...
M'è scadüda la ricreazion. Te poeudi pü scriv. Quand fadighi poeudi pü emett parol che sìen minga contegnüü in la nüvoletta aparent de quaic fümett.
Cribbi, sont pü nanca sicür de vess denver Paperino. Anca travestii inscì senti semper ona gran spüzza de Roberto Quaglia.

Roberto Quaglia