són Paperino. No l'é 'n strapelùmme. Són pròpio Paperino o barba de Qui, Quo, Qua, o nezo de Paperone. Tûtti scrîvan a-o Maurizio Costanzo Show e ò coscì decîzo de fâlo ascì mì.
No sò bén perché ô fàsso. Ma sàn perché ô fàn tûtti i âtri ch'e te sommèrzan de lettie? Nisciùn o sa realmente ninte de mì. A génte a léze i fumétti e coscì pe questo a se sénte autorizâ a crédde de savéi tûtto de Paperino. Nossciô. Derê a-e quìnte, feua da-e stàtiche pàgine dôve existo pe-o pûo dilèto de gréndi e pìcin, ò 'na vìtta segrétta, che no l'é quélla de Paperinik. A l'é 'na vìtta de mèrda. Fòrsci o l'é pe questo ch'ò decîzo de scrîvete, câo Maurizio Costanzo Show.
Ma fòrsci quarcösa s'intoîsce ascì lezéndo i fumétti che són o mæ mestê. A mæ proverbiâle sçìga, e angùstie che zio Paperone cotidianaménte o m'inflîze, e umiliaçioìn patîe a ôpera di mæ despetôxi e saccénti nezétti. E dòppo quélla strónsa de Paperina che no me â dâ e ch'inveçe a se fâ montâ - ne són segûo - da quéllo trónfio inbeçìlle inbrillantinòu de Gastone!
O l'é Paperopoli ch'a pòrta sçìga. Tûtto o dinâ ch'o gh'é se l'én caccæ o mæ barba e Rockerduck. Câo Maurizio Costanzo Show, ti devi assolutaménte invitâme inta teu trasmiscion. Ancheu o l'é poscìbile, ti sæ? Ànche se són 'n fumétto ò 'n cartón animòu. Se Roger Rabbit o pêu interagî co-i èsi umàn, alôa pòsso ascì mì. Ti faiâ 'n figurón, a invitâme.
Vôtri no avéi mâi vìsto Paperina nûa. Mì sci. Da-o bûzo da seratûa. O l'êa l'ùnico sistêma. Ascì Qui, Quo e Qua l'àn vìsta. Ascì Pippo, pe sbàglio (cogión cómm'o l'é o stâva in realtæ çercàndo de védde lê mæximo nûo). Ascì Archimede Pitagorico, con ùnn-a de-e seu danæ invençioìn pe goardâ atravèrso i mûri. Belìn, l'àn vìsta nûa tûtti feua de vôtri, che l'avéi vìsta sôlo inti fumétti, interpretâ o rêuo de verginétta vanitozétta. Beh, no avéi pèrso ninte. Paperina nûa a l'é pézo de Jessica Rabbit vestîa. E questo o l'é l'otràggio definitîvo! Pòsso amétte che 'na strafîga cómme Jessica Rabbit a no me â dàgghe, ma Paperina... belìn, tra l'âtro nûa a l'é praticaménte idèntica a mì mæximo. Se ghe câvi i vestî no l'é che avànsan grénde diferénse. Gh'é quéllo belìn de fiòcco rósso che lê a l'à apicicòu in tésta giórno e néutte ch'o ne distìngoe. Mì o mæ assùrdo berétto da marinâ ògni tànto me ô câvo, ànche se coscì métto a nûo e carvìçie. Lê, o seu fiòcco rósso... mâi! E dòppo a fâ e êuve. Crìsto, a ne fâ a-o mànco ùnn-a a-o giórno. L'émmo tûtti vìsta da-o bûzo da seratûa. Aviéiscimo dovûo imaginâselo, pàperi cómme sémmo, che quélla lì a fâ 'n êuvo dòppo l'âtro. A l'é 'na scéna schifôza. Voriéiva savéi dòppo dôve se ê inbósca. Segóndo mì finìscian tûtte da Nonna Papera ch'a ê fâ sparî inte seu tórte che dòppo niâtri se mangémmo. Che scìffo. Brùtte stöie de canibalìsmo.
Belìn, són pròpio sçigòu. Scûzime se dîggo sénpre "belìn", ma inti fumétti no pòsso fâlo e devo sfogâme. E dòppo o l'é de mòda. Belìn, dî belìn o no vêu dî 'n belìn ma tûtti no fàn âtro che dîlo, e se ô fàn in televixón pàssan ancón pe persónne co-e bàlle.
Te prométto che se ti m'invîti no parliò mâ inta teu trasmiscion. Ò pûre ô faiò, se ti saiâ però tì a dimandâmelo. Se ti te vergógni a dîmelo fàmme di gèsti. Capìsço in fùria, mì, a-o de feua di fumétti. Sorviatùtto e cöse coscì sénplici.
Scûzime se pàrlo coscì, a-a mainêa despâeìa che drénto a-i fumétti dôve travàglio. A génte a se spêta sénpre e mæxime cöse da mì, in ògni contèsto. Nisciùn o s'interèssa a-a persónna ò a-o pàpero che mì sénto de èse. Tûtti vêuan sénpre védme into persongio ch'àn inparòu che mì són. Belìn, a fùria de voéime tûtti védde sçigòu, finìscio pe éselo pe davéi ascì inta vìtta privâ. Rock Hudson o l'êa 'n persongio virîle, ma in realtæ o l'êa buliccio. (Into diàletto de Paperopoli buliccio o vêu dî bûzaròn). Mì són 'n persongio sçigòu, ma in realtæ ô són ancón de ciù.
Belìn, o dêve èse vêo che chiunque o l'é pròpio quéllo che tûtti péntan e vêuan che lê o segge. Inta mæ vìtta privâ e cöse me vàn ancón pézo che inti fumétti. Ò sénpre tantíscime maotîe, con migiæa de sìntomi tûtti despæghi, méntre inti fumétti quànde stàggo mâ ò sénpliceménte 'n termòmetro in bócca. Pe ezénpio ò o catàro. Ma no sôlo inti brónchi. Ascì inti éuggi e sótta a-e ascélle. Tûtti avéi vìsto, inti fumétti, che mì no ò dénti. Beh, o l'é pròpio coscì. Ma inti fumétti me màngio di supersandwich che no finìscian ciù... ma o l'é tûtta finçión. In realtæ, sénsa dénti no pòsso mastegâ, e inta vìtta reâle me aliménto de broétti.
Perdónime se a mæ lettia a pâ 'n pö confûza. Són levménte inbriægo. Cöse v'aspetâvi da 'n marinâ? Avéi notòu che inti fumétti camìnn-o sénpre descâso? Beh, ascì inta vìtta reâle. Ma inti fumétti a stràdda a no l'é costelâ de cìcche e strónsci de càn cómme inta realtæ dôve mì ògni moménto ê pesto.
Confésso che me màsturbo. Són dispòsto a dîlo ascì in trasmiscion, s'o pêu servî a aumentâ l'audience. Ò provòu ascì a fâme de-e cànne, segge inta realtæ che inti fumétti. Naturalménte stâva travagiàndo in nêgro, pe 'n çèrto Andrea Pazienza ch'o no l'êa 'n fumétto immortâle e defæti o l'é dòppo mòrto. Dòppo ò piantòu. Cöse o sèrve fâse de-e cànne quànde a realtæ a l'é za de pe sénn-e conpletaménte feua de tésta? O l'é abàsta arvî i éuggi e goardâ. E vôtri savéi che i mæ éuggi són bén gréndi. Me ê dìsegnan gréndi e ô són ascì in realtæ. Quéllo che no vedéi inti fumétti són tûtti quélli belìn de moscìn ch'e me ghe finìscian drénto ògni çìnque menûti.
Savéi, ò quàrche idêa in scî a sçìga ch'a me perségoita in cànpo sentimentâle: Cómme belìn fàsso a baxâ quarchedùnn-a co-o bécco che me atrêuvo? Se dòppo a persónna che vêuggio baxâ a l'à o bécco ascì lê (ò ascì lê), a facénda a se fâ terribilménte incaxinâ. Cómme fàn a baxâse dignitozaménte e co-a regolamentâre lussûria 'n pàpero e 'na pàpera co-o bécco fæto cómme o mæ? Pensæ bén a-o mæ bécco. L'avéi vìsto migiæa de vòtte inti mæ fumétti. Vìsto de profî, cómme mì me goàrdo despésso a-o spêgio, o l'é sénsa dùbbio 'n sìnbolo fàllico (Pico de Paperis o saiéiva d'acòrdo con mì). O mæ bécco o l'é fæto pe penetrâ, ne són segûo. No pensæ ch'o segge 'n maniàco sessoâle. O l'é 'n razonaménto de tîpo geomètrico. O mæ bécco o l'é 'n sòlido afuzolòu co-a tîpica aerodinamiçitæ de 'n struménto penetrànte. No rîe de mì se no reûsço a esprìmme co-a dovûa precixón. Són sôlo 'n marinâ sçigòu. Ma con 'n bécco penetrànte. No reusciéi a convìnçime do contrâio. Ebbén, belìn, ascì Paperina a ô l'à. Cómme belìn faiéiva a baxâla, ànche se lê a me ô lasciésse fâ?
Câo Maurizio Costanzo Show, no vêuggio deludde nisciùn di fans do persongio che interprêto in sciô piccolíscimo schèrmo do giornalétto de fumétti ch'o inflaçionn-a e edìcole. Ma òrmâi són adùlto da 'n caxìn de ténpo e revéndico o drîto de vegnî ascì mì 'na vòtta da tì pe fâ savéi ascì mì a tûtti i belìn mæ. O mæ pâ Disney o l'é mòrto 'na mûggia de ténpo fâ. O m'à lasciòu in ereditæ 'n contràtto a vìtta co-l'aziénda ch'a pòrta o seu nómme. Ghe l'ò into cûo. Scûzime se pàrlo coscì, ma ficcâve bén in tésta che són 'n marinâ, 'n marinâ sçigòu, e ascì frustròu into seu rêuo de marinâ perché no ò mâi atrovòu 'n inbàrco ch'o fîse ùn. O pòrto de Paperopoli o l'é in màn a-i comunìsti, ch'e l'àn fæto falî. Disney o l'êa 'n sàdico. A mì tûtte e desgràçie, a zio Paperone tûtti i dinæ, e a-i comunìsti o pòrto de Paperopoli. Disney o l'êa 'n sàdico.
Ò tréi nezétti ch'e me rómpan sénpre i cogioìn co-o manoâle de-e zóvie marmótte. Ò tûtti i svantàggi de avéi tréi figgi sénsa manco avéi avûo o vantàggio de ésime fæto 'na ciavâ ch'a fîse ùnn-a. Disney o l'êa 'n sàdico.
Ò 'na màchina de mèrda monopòsto a meitæ, che pe portâme in gîro o nezàmme ê devo métte into bagagiâio. Nisciùn di sceneggiatôri di mæ fumétti o v'à mâi dîto a màrca. Beh, ghe créddo, se vergognâvan. O l'êa o protòtipo scartòu da Trabant, l'auto-scatolétta-d'anciôe ch'òua beutan vîa ascì inte l'ex Germània de l'Est.
Beh, insómma, Maurizio Costanzo Show, invîtame 'n pö da tì che te ne cónto dôe in sce zio Paperone. Ti crédi ch'o se segge tegnûo feua da Tangentopoli? Belìn, tra lê e Rockerduck...
M'é scadûa a recreaçión. No pòsso ciù scrîvete. Quànde travàglio no pòsso ciù emétte paròlle che no segian contegnûe inta nûvolétta aparénte de quàrche fumétto.
Crìbbio, no són ciù manco segûo de èse pe davéi Paperino. Ascì travestîo coscì sénto sénpre 'na gràn ciûzanìa de Roberto Quaglia.

Roberto Quaglia