o soi Paperin. Nol è un sorenon. O soi pròpit Paperin il barbe di Qui, Quo, Qua, il nevôt di Paperon. Ducj a scrivin al Maurizio Costanzo Show e duncje o ai decidût di fâlu ancje jo.
No sai ben parcè che lu fâs. Ma savino parcè che lu fasin ducj chei altris che ti sapulissin di letaris? Nissun nol sa pardabon nuie di me. La int e lei i fumets e duncje par chest si sint autorizade a crodi di savê dut di Paperin. Nossiôrs. Daûr des cuintis, fûr des pagjinis statichis dulà che o esist pal pûr gust di grancj e piçui, o ai une vite segrete, che no je chê di Paperinik. E je une vite di merde. Forsit al è par chest che o ai decidût di scrivîti, caro Maurizio Costanzo Show.
Ma forsit alc si intuìs ancje leint i fumets che a son il gno mistîr. La mê proverbiâl sfighe, lis angustiis che barbe Paperon ogni dì mi infliç, lis umiliazions patidis par colpe dai miei nevodus dispietôs e saputei. E po chê stronze di Paperine che no me da e che invezit si fâs montâ - o soi sigûr - di chel stupit tronfi imbrilantinât di Gastone!
Al è Paperopoli che al puarte sfighe. Ducj i bêçs che a son se ju son cjolts gno barbe e Rockerduck. Cjâr Maurizio Costanzo Show, tu âs assolutamentri di invidâmi te tô trasmission. Vuê al è pussibil, sâstu? Ancje se o soi un fumet o un cartun animât. Se Roger Rabbit al pues interagjî cui jessis umans, alore o pues ancje jo. Tu fasarâs une figurone, a invidâmi.
Vualtris no vês mai viodude Paperine crote. Jo sì. Dal bûs de sieradure. Al jere l'unic sisteme. Ancje Qui, Quo e Qua le àn viodude. Ancje Pippo, par sbali (cojon come che al è al stave in realtât cirint di viodi se stes crot). Ancje Archimede Pitagorico, cuntune des sôs invenzions maladetis par cjalâ traviers i mûrs. Caz, le àn viodude crote ducj fûr che vualtris, che le vês viodude dome tai fumets, a interpretâ il rûl di vergjinute vanitosute. Ben, no vês pierdût nuie. Paperine crote e je piês di Jessica Rabbit vistude. E chest al è l'oltraç definitîf! O pues amet che une strafighe come Jessica Rabbit no me dedi, ma Paperine... caz, tra l'altri crote e je praticamentri compagne di me. Se tu i gjavis i vistîts no restin grandis diferencis. Al è chel caz di floc ros che jê e à tacât sul cjâf dì e gnot che nus distin. Jo il gno barete di marinâr assurt ogni tant mal gjavi, ancje se cussì o met in crot la pelade. Jê, il so floc ros... mai! E po e fâs i ûfs. Crist, int fâs almancul un al dì. Le vin viodude ducj dal bûs de sieradure. O varessin vût di imagjinâsal, razis come che o sin, che chê li e fâs un ûf daûr chel altri. E je une sene schifose. O volarès savê po dulà che ju plate. Seont me a finissin ducj di None Paperie che ju fâs sparî tes sôs tortis che po nô o mangjìn. Ce schifo. Brutis storiis di canibalisim.
Caz, o soi pròpit sfigât. Scusimi se o dîs simpri "caz", ma tai fumets no pues fâlu e o ai di sfogâmi. E po al è di mode. Caz, dî caz nol vûl dî un caz ma ducj no fasin altri che dîlu, e se lu fasin in television a passin ancjemò par personis cun lis balis.
Ti prometi che se tu mi invidis no fevelarai mâl te tô trasmission. O ben lu fasarai, se però tu sarâs tu a domandâmal. Se ti vergognis a dîmal fasimi segns. O capìs in presse, jo, fûr dai fumets. Soredut lis robis cussì semplicis.
Scusimi se o fevel cussì, in mût diviers che dentri tai fumets dulà che o lavori. La int e spiete simpri lis stessis robis di me, in ogni contest. Nissun nol è interessât ae persone o al razot che o sint di jessi. Ducj a vuelin simpri viodimi tal personaç che a àn imparât che o soi. Caz, a fuarce di volêmi ducj viodi sfigât, o finìs par jessilu pardabon ancje te vite privade. Rock Hudson al jere un personaç virîl, ma in realtât al jere buliccio. (Tal dialet di Paperopoli buliccio al vûl dî frocio). Jo o soi un personaç sfigât, ma in realtât lu soi ancjemò di plui.
Caz, al à di jessi vêr che ognun al è pròpit ce che ducj a pensin e a vuelin che lui o jê al sedi. Te mê vite privade lis robis mi van ancjemò piês che tai fumets. O ai simpri tantissimis malatiis, cun miârs di sintoms ducj diviers, intant che tai fumets cuant che o stoi mâl o ai dome un termometri in bocje. Par esempli o ai il catar. Ma no dome tai bronchis. Ancje tai voi e sot dai sielis. Ducj o vês viodût, tai fumets, che jo no ai dincj. Ben, al è pròpit cussì. Ma tai fumets o mangji supersandwich che no finissin plui... ma e je dute finzion. In realtât, cence dincj no pues mastiâ, e te vite reâl mi nudrìs di brodins.
Perdonimi se la mê letare e semee un pôc confusionade. O soi un fregul cjoc. Ce spietavitu di un marinâr? Vêso notât che tai fumets o cjamini simpri discolç? Ben, ancje te vite reâl. Ma tai fumets la strade no je plene di cichis e stronçs di cjan come te realtât dulà che jo ogni moment ju pesti.
O confessi che mi masturbi. O soi disponût a dîlu ancje in trasmission, se al pues coventâ a cressi la audience. O ai provât ancje a fâmi cannis, sedi te realtât che tai fumets. Naturalmentri o lavoravi in neri, par un cert Andrea Pazienza che nol jere un fumet imortâl e difat al è po muart. Po o ai smetût. Ce covential fâsi cannis cuant che la realtât e je za di bessole dal dut fûr di cjâf? Al baste vierzi i voi e cjalâ. E vualtris o savês che i miei voi a son ben grancj. Mai disegnin grancj e a son ancje in realtât. Ce che no viodês tai fumets a son ducj chei caz di moscjins che mi finissin dentri ogni cinc minûts.
Savêso, o ai cualchi idee su la sfighe che mi perseguite in cjamp sentimentâl: Cemût caz fasio a businâ cualchidune cul bec che mi cjati? Se po la persone che o vuei businâ e à il bec ancje jê (o ancje lui), la robe si fâs teribilmentri incasinade. Cemût fasino a businâsi cun dignitât e cu la lussurie regolamentâr un razot e une raze cul bec fat come il gno? Pensait ben al gno bec. Lu vês viodût miârs di voltis tai miei fumets. Viodût di profîl, come che jo mi cjali dispès tal spieli, al è cence dubi un simbul falic (Pico de Paperis al sarès dacuardi cun me). Il gno bec al è fat par penetrâ, o soi sigûr. No sta pensâ che o sedi un maniac sessuâl. Al è un resonament di tip gjeometric. Il gno bec al è un solit afusolât cu la tipiche aerodinamicitât di un strument penetrant. No sta ridi di me se no rivi a esprimimi cu la precision juste. O soi dome un marinâr sfigât. Ma cuntun bec penetrant. No rivarês a convincimi dal contrari. Ben, caz, ancje Paperine lu à. Cemût caz fasaressio a businâle, ancje se jê mal lassàs fâ?
Cjâr Maurizio Costanzo Show, no vuei delusionâ nissun dai fans dal personaç che o interpreti sul piçulissim schermi dal gjornalut di fumets che al inflazione lis edicolis. Ma oramai o soi adult di un casin di timp e o rivendichi il dirit di vignî ancje jo une volte di te par fâ savê ancje jo a ducj i miei cazs. Gno pari Disney al è muart un grum di timp indaûr. Mi à lassât in ereditât un contrat a vite cu la aziende che e puarte il so non. Lu ai tal cûl. Scusimi se o fevel cussì, ma metêtsal ben tal cjâf che o soi un marinâr, un marinâr sfigât, e ancje frustrât tal so rûl di marinâr parcè che no ai mai cjatât un imbarc che al fos un. Il puart di Paperopoli al è in man ai comuniscj, che lu àn fat falî. Disney al jere un sadic. A mi dutis lis disgraciis, a barbe Paperon ducj i bêçs, e ai comuniscj il puart di Paperopoli. Disney al jere un sadic.
O ai trê nevodus che mi rompin simpri i cojons cul manuâl des zovinis marmotis. O ai ducj i svantaçs di vê trê fîs cence nancje vê vût il vantaç di vêmi fat une ciulade che e fos une. Disney al jere un sadic.
O ai une machine di merde a un puest e mieç, che par puartâ ator i nevôts ju ai di meti tal bauli. Nissun dai sceneggiadôrs dai miei fumets no us à mai dit la marcje. Ben, o crôt, si vergognavin. E jere il prototip scartât de Trabant, la machine-scjatute-di-sardelis che cumò a butin vie ancje te ex Gjermanie dal Est.
Ben, insome, Maurizio Costanzo Show, invidimi un pôc di te che ti 'nt conti dôs su barbe Paperon. Crodistu che si sedi tignût fûr di Tangentopoli? Caz, tra lui e Rockerduck...
Mi è scjadude la ricreazion. No pues plui scrivîti. Cuant che o lavori no pues plui dî peraulis che no sedin tal nulut di cualchi fumet.
Cribbio, no soi plui nancje sigûr di jessi pardabon Paperin. Ancje mascarât cussì o sint simpri une grande spuzze di Roberto Quaglia.

Roberto Quaglia