cunfesso ca canosco Gigi Picetti. Nato dint'ô 1939, Gigi Picetti tène dint'a ll'istante ca scrivo 55 anne, e è 'n individuo ùneco 'n Italia. Primma 'e tutto è 'nu genio-criaturo, e comme è sempe succieso â cchiù parte d''e geni-criature, poche perzone sò arrivate a 'o capì dint'a 'e peculiarità ìntime soje, e tra 'e lloro nisciuna perzona normale.
Gigi Picetti è cèlibe («Nun aggio maje cummisso 'nu matrimonio»), puveriello 'e denare ma ricchìssemo 'e giòvane graziuse figliole ca àmano girà attuorno a isso («Nun songo io ca tengo successo cu 'e giòvane, sò 'e giòvane ca tènono successo cu me»), e dint'â cui òrbita è quacche vota custrétto a trasì («Chi giace accunsente»), s'è sempe tenuto alla larga d''e lavure tediuse e ripetitive («Me spezzo ma nun m'impiego»), e 'a varie decenne è 'nu vulcano 'n perenne eruzione 'e idee, aforisme e battute originale, ca nun truvarrite addó 'e formìcole s'incàzzano né 'n nisciun ato pizzo d''o munno ncopp'â carta stampata. Quaccheduno obbietta ca nun po' essere sublime autore 'e aforisme chillo 'e cui aforisme maje nisciuno se degnaje 'e arricògliere dint'a 'e libbre apposta? A chìste rispónno 'a 'ncoppa cu 'nu pertinente aforisma 'e Gigi Picetti: «Nun tutte ll'aforisme fernìscono dint'a 'e libbre.»
Gigi Picetti esiste 'ntensamente, istante doppo istante, cu vasta cuscienza d''o mumento ca si no fuje.
Nascette muorto, luntano 'a ogne spitale. 'O mìdeco diagnosticaje ca nun ce steva speranza. Muto suggerimento: "Jettàtelo pure." 'A ignorante femmena ca assisteva mamma e dottore nun se ne stette a sta sentenza. Maletrattaje 'o muorto 'e Gigi Picetti fino a quanno isso resuscitaje. Gigi Picetti aveva accummenciato a stupì.
Sàveto spaziotemporale!
Dint'ô 1970 Gigi Picetti spasseggia pe 'n cità cu 'nu gruosso registratore a tracolla e 'nu paro 'e voluminose cuffie ncapa, ascutanno jazz, e 'e passante 'o guàrdano comme fosse pazzo; ha precorzo 'e tiempe 'mmentanno pe isso 'o walk-man vint'anne primma d''e giappunise.
Sàveto spaziotemporale!
Dint'ô 1977 Gigi Picetti gira pe Roma e 'nfilànnose dint'a 'e salotte se mèsceca cu Zavattini, Moravia, Ruggero Orlando, Nicolini, Reim e Di Nola.
Sàveto spaziotemporale!
Dint'ô 1975 durante 'o perìodo parigino suo, Gigi Picetti acchiappa 'n extremis ll'ùrteme àtteme 'e vita 'e essere umane scegliute tra 'e cchiù significative d''o sèculo nuosto: Jean Paul Sartre, Simone de Bovoir, Joris Yven, Michel Foucault.
Sàveto spaziotemporale!
Dint'ô 1991, 'o primmo 'e Abbrile, Gigi Picetti 'mmenta pe gioco a Gènova 'nu partito polìteco e 'o chiamma PCS (PARTITO CENTRO STORICO, nonché crasi ottimale tra PCI e PDS). È 'nu successo! Primma pàggina d''o "Il Secolo XIX". Articule a ripetizione ncopp'a tutte 'e quotidiane appriesso. Migliara 'e telefonate 'e gente ca se vò iscrìvere. Articulo a piena pàggina ncopp'â "La Repubblica". Gigi Picetti se gode chesta òpera d'arte muderna soja fino a quanno - 'a vero artista - se ne disinteressa cu scioltezza pe se dedicà a 'na criatura appriesso.
Sàveto spaziotemporale!
Ancora nennillo, 1950, scarabocchia ncopp'a 'nu fuoglio a quadretielle 'o prufilo 'e 'na màchina monovolume a forma 'e bomba dimezzata. È 'a Twingo, 35 anne primma.
Sàveto spaziotemporale!
Dint'ô 1973 S'imbatte 'n Dario Fo e ll'attocca fa pe tre anne ll'attore pe isso.
Sàveto spaziotemporale!
Dint'ô 1983, pe se riparà 'a 'na chiuvuta 'mprovvisa durante 'nu giro a Milano, s'intrufola 'nzieme cu 'o sottoscritto dint'a 'nu palazzo a caso addó se steva facenno 'o cunvegno nazionale d''e fotògrafe artigiane. Uno doppo ll'ato 'e fotògrafe candidate â presidenza d''a categoria s'avvicèndano ncopp'ô pùlpeto, poco esprimenno dint'â lettura d''e discurze nuiuse lloro. Gigi Picetti se scrive a parlà, improvvisa cu travolgente oratoria scatenanno cunzenzo, e quanno ll'hanno quase eletto presidente d''e fotògrafe taliane ha 'ntramente fernuto 'e chiòvere e allora ce ne jammo, accussì, semplicemente.
Sàveto spaziotemporale!
Dint'ô 1976 decide 'e chiammà Teatro dell'Archivolto 'nu pizzo strappato a ll'entropia, e llà propone, p''a primma vota 'n cità, 'a presenza 'e 'nu scanusciuto Benigni, e 'e films 'e 'nu certo Fassbinder.

Oscar Wilde, libberato d''e duje difiette principale suoje - nun canóscere 'o taliano e essere già muorto - certamente se levarrìa 'o cilindro annanze a Gigi Picetti.

Roberto Quaglia