o confessi che o cognòs Gigi Picetti. Nassût tal 1939, Gigi Picetti al à tal moment che o scrîf 55 agns, e al è un individui unic in Italie. Prin di dut al è un gjeni-frut, e come che al è simpri sucedût ae plui part dai gjenis-fruts, pocjis personis a son rivadis a capîlu tes sôs particolaritâts intimis, e tra di lôr nissune persone normâl.
Gigi Picetti al è vedran («No ai mai cometût un matrimoni»), puar di bêçs ma siorissim di zovinis graciosis che a amin zirâi ator («No soi jo a vê sucès cu lis zovinis, a son lis zovinis a vê sucès cun me»), e te orbite di chês cualchi volte al è sfuarçât a jentrâ («Cui che al tâs al acete»), si è simpri tignût lontan dai lavôrs noiôs e ripetitîfs («Mi crepi ma no mi impleii»), e di plui decenis al è un vulcan in eruzion perpetue di ideis, aforismis e batudis origjinâls, che no cjatarês là che lis furmiis si inrabiin ni in altris bandis dal mont su cjarte stampade. Cualchidun al obiete che nol pues jessi autôr sublim di aforismis chel che i siei aforismis nissun si à mai degnât di tirâju sù tai libris fats aposte? A chei o rispuint dal alt cuntun aforisim adat di Gigi Picetti: «No ducj i aforismis a finissin tai libris.»
Gigi Picetti al esist cun intensitât, moment dopo moment, cuntune largje cussience dal moment che altrimentri al scjampe.
Al nassè muart, lontan di ogni ospedâl. Il miedi al diagnosticà che no 'nd jere sperance. Sugjeriment mut: "Butaitlu pûr vie." La femine ignorante che e assisteve mari e dotôr no si fermà a cheste sentence. E maltratà il cadavar di Gigi Picetti fintremai che al resussità. Gigi Picetti al veve tacât a fâ maraveâ.
Salt spazi-temporâl!
Tal 1970 Gigi Picetti al cjamine pe citât cuntun grues regjistradôr a tracole e un pâr di cufiis grandis sul cjâf, scoltant jazz, e la int che e passe lu cjale come se al fos mat; al à anticipât i timps inventant par se il walk-man vincj agns prime dai gjaponês.
Salt spazi-temporâl!
Tal 1977 Gigi Picetti al zire par Rome e infiltrantsi tai salots si messede cun Zavattini, Moravia, Ruggero Orlando, Nicolini, Reim e Di Nola.
Salt spazi-temporâl!
Tal 1975 tal so periodi parigin, Gigi Picetti al cjape in extremis i ultins moments di vite di jessis umans sielzûts tra i plui significatîfs dal nestri secul: Jean Paul Sartre, Simone de Bovoir, Joris Yven, Michel Foucault.
Salt spazi-temporâl!
Tal 1991, il prin di Avrîl, Gigi Picetti al invente par zûc a Gjenue un partît politic e lu clame PCS (PARTÎT CENTRI STORIC, e ancje crasi ideâl tra PCI e PDS). Al è un sucès! Prime pagjine di "Il Secolo XIX". Articui un daûr chel altri su ducj i cuotidians dopo. Miârs di telefonadis di chei che si volevin iscrivi. Articul a plene pagjine su "La Repubblica". Gigi Picetti si gjolt cheste sô opare di art moderne fintremai che - di vêr artist - no si 'nt interesse plui cun disinvolture par dedicâsi a une creature gnove.
Salt spazi-temporâl!
Ancjemò frut, 1950, al pastroce suntun sfuei a cuadruts il profîl di une machine monovolum in forme di bombe dimezade. E je la Twingo, 35 agns prime.
Salt spazi-temporâl!
Tal 1973 si intope in Dario Fo e i tocje fâ par trê agns l'atôr par lui.
Salt spazi-temporâl!
Tal 1983, par parâsi di une ploie improvise dilunc di un zîr a Milan, si fiche insiemi cun chel che al scrîf intun palaç a câs là che si tignive il congrès nazionâl dai fotografs artesans. Un dopo chel altri i fotografs candidâts ae presidence de categorie si dan il cambi sul pulpit, esprimint pôc te leture dai lôr discors noiôs. Gigi Picetti si iscrîf a fevelâ, al improvise cuntune oratorie che e travolç e al fâs saltâ fûr il consens, e cuant che lu àn cuasi elet president dai fotografs talians intant al à smetût di plovi e alore o lin vie, cussì, semplicementri.
Salt spazi-temporâl!
Tal 1976 al decît di clamâ Teatro dell'Archivolto un lûc gjavât ae entropie, e li al propon, pe prime volte in citât, la presince di un Benigni no cognossût, e i films di un ciert Fassbinder.

Oscar Wilde, liberât dai siei doi difiets principâi - no cognossi il talian e jessi za muart - di sigûr si gjavarès il cilindri denant di Gigi Picetti.

Roberto Quaglia