confésso che conóscio Gigi Picetti. Nasciûo into 1939, Gigi Picetti o l'à inte l'istànte in cûi scrîvo 55 ànni, e o l'é 'n indivìdoo ùnico in Itàlia. Primma de tûtto o l'é 'n génio-figeu, e cómme o l'é sénpre capitòu a-a ciù gràn pàrte di géni-figeu, pöche persónne són rivæ a conpréndilo inte seu ìntime peculiaritæ, e tra de lô nisciùnn-a persónna normâle.
Gigi Picetti o l'é çêlibe («No ò mâi commìsso 'n matrimònio»), pôvero de dinæ ma richíscimo de zoêne graçiôze figétte ch'e l'àman orbitâghe d'in gîro («No són mì a avéi successo co-e zoêne, són e zoêne a avéi successo con mì»), e inta cûi òrbita o l'é quàrche vòtta costrétto a penetrâ («Chi o gîxe o aconsénte»), o s'é sénpre tegnûo a-a lèrga da-i travàggi tediôxi e repetitîvi («Me rómpo ma no m'inpiêgo»), e da vâri dêcenni o l'é 'n vulcàn in perénne eruçión d'idêe, aforìsmi e batûe originâli, che no atroveréi là dôve e formîghe s'incàssan né atrôve into móndo in sce càrta stanpâ. Quarchedùn o obiétta che o no pêu èse sublîme autô de aforìsmi quéllo i quæ aforìsmi mâi nisciùn o s'é degnòu de recêugge inti lìbbri prepòsti? A costôro rispóndo superiorménte con 'n pertinénte aforìsma de Gigi Picetti: «No tûtti i aforìsmi finìscian inti lìbbri.»
Gigi Picetti o existe intensaménte, istànte dòppo istànte, con vàsta cosciénsa do moménto âtriménti fugénte.
O nasceu mòrto, lontàn da ògni ospedâle. O mêgo o diagnostichò che no gh'êa sperànsa. Mûto sugeriménto: "Beutâlo pûre vîa." L'ignorànte dònna ch'a assistîva moæ e dôtô a no se ne stéte a tâle senténsa. A maltratò o cadàvere de Gigi Picetti fìnn-a ch'o resuscitò. Gigi Picetti o l'avéiva comensòu a stupî.
Sâto spàçiotenporâle!
Into 1970 Gigi Picetti o spasséggia pe l'ùrbe con 'n gròsso registratô a tracòlla e 'n pâ de voluminôze cùffie in sciô câ, ascoltàndo jazz, e i passànti ô goàrdan cómme o fîse màtto; o l'à precórso i ténpi inventàndo pe lê o walk-man vìnt'ànni prìmma di giaponéixi.
Sâto spàçiotenporâle!
Into 1977 Gigi Picetti o zîra pe Rómma e infiltràndose in salòtti o se méscia a Zavattini, Moravia, Ruggero Orlando, Nicolini, Reim e Di Nola.
Sâto spàçiotenporâle!
Into 1975 during o seu periòdo parixìn, Gigi Picetti o càrpisce in extremis i ùrtimi àtimi de vìtta de èsi umàn seleçionæ tra i ciù significatîvi do nòstro sêcolo: Jean Paul Sartre, Simone de Bovoir, Joris Yven, Michel Foucault.
Sâto spàçiotenporâle!
Into 1991, into prìmmo d'Avrî, Gigi Picetti o invénta pe zêugo a Zêna 'n partîo polìtico e o ô ciàmma PCS (PARTÎO ÇÉNTRO STÒRICO, e ascì crâxi ótima tra PCI e PDS). O l'é 'n successo! Primma pàgina do "Secolo XIX". Artìcoli a repetiçión in sce tûtti i cotidiàn segoénti. Migiæa de telefonæ de inscrivéndi. Artìcolo a pìnn-a pàgina in sce "La Repubblica". Gigi Picetti o se gôde questa seu ôpera d'àrte modèrna fìnn-a a quànde - da vêo artìsta - o se ne dezinterèssa in scioltézza pe dedicâse a 'na segoénte creatûa.
Sâto spàçiotenporâle!
Ancón figeu, 1950, o scaraboccia in sce fêuggio a quaddrétti o profî de 'n'automòbile monovolùmme a fórma de bómba dimezâ. A l'é a Twingo, 35 ànni prìmma.
Sâto spàçiotenporâle!
Into 1973 O s'inbàtte in Dario Fo e ghe tócca fâ pe tréi ànni l'atô pe lê.
Sâto spàçiotenporâle!
Into 1983, pe repararse da improvîza ciêuva during 'n gîro a Milàn, o s'intrûfola insémme a-o sottoscrîto inte 'n palàçio a câxo dôve se stâva svolzéndo o convégno nazionâle di fotògrafi artigiàn. Ùn dòppo l'âtro i fotògrafi candidæ a-a prezidénsa da categorîa s'avixéndan in sciô pùrpito, pöco esprìmmendo inta léttûa di seu noiôxi discórsci. Gigi Picetti o s'inscrîve a parlâ, o improvîza con travolzénte oratöia scadenàndo consénso, e quànde ô l'àn quæxi elètto prezidénte di fotògrafi italièn o l'à into mentîe piantòu de ciêuve e alôa ne andémmo, coscì, sénpliceménte.
Sâto spàçiotenporâle!
Into 1976 o decîde de ciamâ Teâtro de l'Archivòrto 'n lêugo strapòu a l'entropîa, e lì o propón, pe-a primma vòtta in çitæ, a prezénsa de 'n sconosciûo Benigni, e i films de 'n çèrto Fassbinder.

Oscar Wilde, liberòu da-i seu dôi prinçipâli difètti - no conósce l'italiàn e èse za mòrto - de seguo o se leveriéiva o çilìndro a-o cospètto de Gigi Picetti.

Roberto Quaglia