a confès ch'a cgnóss Gigi Picetti. Nasó int al 1939, Gigi Picetti al gh à int l'istànt in cui a scrîv 55 ân, e l'é un individui ónich in Itâglia. Prémma ed tótt l'é un zêni-ragazål, e cme l'é sänper capitè ala pió granda pèrt di zêni-ragazû, påchi persåni i én arivè a capîrel int äli så intîmi peculiaritè, e tra ed låur inciåna persåna normèl.
Gigi Picetti l'é zêlibe («An ò mâi comès un matrimôni»), påver ed dnèr mo richéssum ed żåvni graziåuṡi ragazôli ch'äli âmen orbitèregh datåren («An sån brîṡa mé a avair suzès con äli żåvni, äli én äli żåvni a avair suzès con mé»), e int la cui årbita l'é däli vôlt custrét a penetrèr («Chi żèṡ al aconsént»), al s é sänper tgnó ala lêrga dai lavurîr tediåuṡ e ripetitîv («A m rómp mo an m impiêg brîṡa»), e da vâri decåni l'é un volcàn in perèn eruziån d'idê, aforîṡum e batûd originèli, ch'an truvarî brîṡa là indóv äli furmîghi äli s incâzen né in èter lågh int al månnd in vatta a cârta stampè. Quelcdón al obiêta ch'an på èser sublîme autåur d'aforîṡum ló i cui aforîṡum mâi inción al s degnò d'arcåglier int i lébber prepåst? A custår a rispånd superiormänt con un pertinänt aforîṡum ed Gigi Picetti: «An tótt i aforîṡum i finéssen int i lébber.»
Gigi Picetti al eṡésta intensamänt, istànt dåp istànt, con vèsta cusiänza dal mumänt altrimänti fuggänt.
Al naschò môrt, luntàn da ògni ospedèl. Al mêdich al diagnostichò ch'an ai êra speranza. Mût sugerimänt: "Butèdel pûr vî." L'ignorànt dòna ch'la asistêva mèder e dutåur an s in stò a tèl sentänza. La maltratò al cadâver ed Gigi Picetti infén ch'al reṡuscitò. Gigi Picetti l'avêva tachè a stupîr.
Sèlt spaziotemporèl!
Int al 1970 Gigi Picetti al pasêggia par l'ûrbe con un gròs registratåur a tracòla e un pèra ed voluminåuṡi cûfi in vatta al chèv, ascoltänd jazz, e i pasànt i al guèrden cme s'al fóss mât; l'à precårs i tänp inventänd par sé al walk-man vint'ân prémma di giaponaiṡ.
Sèlt spaziotemporèl!
Int al 1977 Gigi Picetti al żirâcia par Roma e infiltràndes in salòt al s mêscola a Zavattini, Moravia, Ruggero Orlando, Nicolini, Reim e Di Nola.
Sèlt spaziotemporèl!
Int al 1975 durànt al så perîod parigén, Gigi Picetti al carpéss in extremis i ûltim âtim ed vétta d'èser umàn selezionè tra i pió significatîv dal nåster sêcol: Jean Paul Sartre, Simone de Bovoir, Joris Yven, Michel Foucault.
Sèlt spaziotemporèl!
Int al 1991, int al prémm d'avrîl, Gigi Picetti al inventa par żûgh a Gènova un partî polético e al al ciâma PCS (PARTITO CENTRO STORICO, nunchè crâṡi utmi tra PCI e PDS). L'é un suzès! Prémma pâgina ed "Il Secolo XIX". Artéccol a ripetiziån in vatta a tótt i quotidiàn sucesîv. Miglièra ed telefonè d'iscrivändi. Artéccol a pîna pâgina in vatta a "La Repubblica". Gigi Picetti al s gåd sta så åpera d'ârt modêrna infén che - da vaira artésta - al s in diṡinteresa in scioltèza par dedichères a una sucesîva creatûra.
Sèlt spaziotemporèl!
Ancåura fangén, 1950, al scarabåcia in vatta a un fói a quadrétt al profîl d'una automobile monovolume a fårma ed bomba dmezè. L'é la Twingo, 35 ân prémma.
Sèlt spaziotemporèl!
Int al 1973 al s imbât in Dario Fo e ai tåca fèr par trî ân l'atåur par ló.
Sèlt spaziotemporèl!
Int al 1983, par riparères da improvîṡa piåva durànt un gîr a Milàn, al s intrûfola insàmm al sottoscritt in un palâz a câṡ indóv as stêva svolgänd al convêggn nazionèl di fotågraf artigiàn. Ón dåp chl'èter i fotågraf candidè ala preṡidänza dla categorî i s avvicénden in vatta al pólpit, påch esprimänd int la letûra di så noiåuṡ discûrs. Gigi Picetti al s iscrîv a parlèr, al improvîṡa con travolgänt oratåria scadnänd consäns, e quand i l an prasapåch elèt preṡidänt di fotågraf itagliàn l'à int al fratänp lasè lé ed pióver e alåra a s in andän, acsé, sänplizemänt.
Sèlt spaziotemporèl!
Int al 1976 al decéd ed ciamèr Teatro dell'Archivolto un lågh strapè a l'entropî, e lé al propån, par la prémma vôlta in zitè, la preṡänza d'un dscgnusó Benigni, e i films d'un zêrt Fassbinder.

Oscar Wilde, liberè dai så dû principèl difèt - an cgnóser brîṡa l'itagliàn e èser bèle môrt - certamänt al s cavarévv al zilénder al cospèt ed Gigi Picetti.

Roberto Quaglia