confessi che conossi Gigi Picetti. Nassüü in del 1939, Gigi Picetti el gh'ha in l'istant che scrivi 55 ann, e l'è on individu ünich in Italia. Prima de tütt l'è on geni-fioeu, e come l'è semper sücced a la pussee part di geni-fioeu, poch persònn hinn rivaa a capìll in di sò peculiarità ìntim, e tra de lor nissüna persòna normala.
Gigi Picetti l'è cèlibe («Hoo mai comess on matrimòni»), poveritt de danee ma ricchìssim de gioven grazios tosann che àmen girà intorna a lü («Sont minga mì che gh'hoo sücess con i gioven, hinn i gioven che gh'hann sücess con mì»), e in la cui òrbita l'è quaic voeulta costrett a entrà («Chi el gias el consent»), el s'è semper tegnüü a la larga di lavorà tedios e ripetitiv («Me romp ma me impieghi minga»), e de vari decenni l'è on vulcan in perenn erüzion de idee, aforismi e batüd original, che trovarii minga indove i formigh se incàzzen né in nissün alter pizz del mond sü la carta stampada. Quaicedun el obietta che el pö minga vess sublim autor de aforismi quel de cui aforismi mai nissün el s'è degnaa de racòg in di liber aposta? A quist rispondi de sora con on pertinent aforisma de Gigi Picetti: «Minga tütt i aforismi finissen in di liber.»
Gigi Picetti el esist intensament, istant dopo istant, con vasta cossienza del moment che se de no el scapa via.
El nassett mort, lontan de ogni ospedal. El mèdegh el diagnosticà che ghe era nissüna speranza. Müt suggeriment: "Trii-el via pür." La ignoranta fèmena che assisteva mama e dottor la se ne stett minga a sta sentenza. La maltrattà el mort de Gigi Picetti fina a quand lü el resüscità. Gigi Picetti el gh'aveva començaa a stüpì.
Salt spaziotemporal!
In del 1970 Gigi Picetti el spassegia per ona cità con on gross registrator a tracolla e on para de volüminos cüfi in coo, scoltand jazz, e i passant el vàrden come el füss matt; el gh'ha precors i temp inventand per lü el walk-man vint'ann prima di giaponés.
Salt spaziotemporal!
In del 1977 Gigi Picetti el gira per Roma e infilàndos in di salott el se mèscia con Zavattini, Moravia, Ruggero Orlando, Nicolini, Reim e Di Nola.
Salt spaziotemporal!
In del 1975 durant el sò perìod parisin, Gigi Picetti el ciapa in extremis i ültim àtim de vita de esser üman sceltt tra i pussee significativ del nòster sècol: Jean Paul Sartre, Simone de Bovoir, Joris Yven, Michel Foucault.
Salt spaziotemporal!
In del 1991, el primm de Avril, Gigi Picetti el inventa per gioeugh a Gènova on partii polìtich e el ciama PCS (PARTITO CENTRO STORICO, nonché crasi ottimala tra PCI e PDS). L'è on sücess! Prima pàgina del "Il Secolo XIX". Articoli a ripetizion sü tütt i quotidian dree. Migliara de telefonad de gent che se voeur iscriv. Articol a piena pàgina sü "La Repubblica". Gigi Picetti el se god questa soa òpera d'art moderna fina a quand - de ver artista - el se ne disinteressa con scioltezza per dedicass a ona creatüra dree.
Salt spaziotemporal!
Ancamò fioeulin, 1950, el scaraboccia sü on foeui a quadrett el profil de ona màchina monovolüm a forma de bomba dimezzada. L'è la Twingo, 35 ann prima.
Salt spaziotemporal!
In del 1973 el s'imbatt in Dario Fo e ghe toca fà per trii ann l'attor per lü.
Salt spaziotemporal!
In del 1983, per riparass de ona pioggia improvisa durant on gir a Milan, el se intrufola insema col sottoscritt in on palazz a cas indove se steva fasend el convegn nazional di fotògrafi artigian. Vün dopo l'alter i fotògrafi candidaa a la presidenza de la categoria se avvicènden sü el pùlpit, poch esprimend in la letüra di sò discors noios. Gigi Picetti el se scriv a parlà, el improvisa con travolgenta oratoria scatenand consens, e quand l'hann quasi elett president di fotògrafi italian el gh'ha intrament finii de pioeuv e alora ghe ne andom, inscì, semplicement.
Salt spaziotemporal!
In del 1976 el decid de ciamà Teatro dell'Archivolto on pizz sbregaa a l'entropia, e là el propon, per la prima voeulta in cità, la presenza de on scognossüü Benigni, e i films de on cert Fassbinder.

Oscar Wilde, liberaa di sò düü difett principai - conoss minga l'italian e vess giamò mort - de sicür el se levaría el cilinder denanz a Gigi Picetti.

Roberto Quaglia