oggi nun supportu li sociòlogi. Mi ci sugnu misu a riflèttiri cincu minuti, e mi è vinutu ’n menti ca pi essiri ricanusciuti sociòlogi abbasta pigghiari ’na làurea ’n suciulugìa, cioè aviri assimilatu li nozioni cuntinuti ’n nu certu numuru di libbra stabbilìuti e aviri passatu li esàmi di chiddi (opirazioni tutt’àutru ca prubblimàtica pi ’na pirsuna di ’ntilligenza nurmali) Â fini, lu titulatu sociòlogu nun è ’na pirsuna ca ha mustratu di aviri capitu quarchi cosa supra lu cumpurtamentu dâ sociità, ma ’na pirsuna ca ha mustratu di aviri studiatu chiddu ca àutri hannu capitu supra lu cumpurtamentu dâ sociità. La mia definizioni putissi sunari nu pocu estrimista, lu ammettu. Videmu allura la quistioni di n’àutra angulatura: nu tizziu studia tutti li libbra rigulamintari dû corsu di suciulugìa, otteni lu sò bravu certificatu di sociòlogu, po’ scarabbocchia maldèstri artìculi ntê quali ’mpastoccia a vànvira cî cuncetti di l’àutri di iddu ’mparati, o ancora peggiu va a diri quarchi frasi d’effettu ’n tilivisioni, o si fa ’nchiuiri pi n’annu sulu ’n ’na grutta pi scriviri nu libbru circannu sé stissu, ed ecco ca la sò identità di sociòlogu è chinamenti cunclamata e di tutti accittata. ’N effetti, abbasta scriviri ca unu è sociòlogu supra lu biggliettu di visita, e quasi tutti ci cridirannu. Pi tacitari li ’ncrèduli abbastirà citari ccà e ddà a casacciu Mac Luhan e quarchidunu àutru ca nun sacciu pirchì ju nun sugnu nu sociòlogu.
Propriu pirchì nun sugnu nu sociòlogu, mi sugnu ’mbattutu ’n certi mei rifrissioni ca di nuddu sociòlogu - ahimè - m’è mai fina a ora capitatu di sentiri, e ca ora portu a tia, caro Maurizio Costanzo Show, e a cu’ sia, pi menzu di tia, di sti mei frasi mai fussi birsagghiu.
Lu succu è sèmplici e di apparenza banali assai, e si riassumi ’n ’na frasi ca dici tuttu e nun dici nenti: "LA TILIVISIONI È LA RILIGIONI MUDERNA."
Bedda scuperta, dicirannu tanti. Ma nun ni firmamu ’n supirfici, dicu ju, e n’analizzamu li implicazioni. Prima di tuttu: a chi è sirvuta, servi e sempri sirvirà, ’n ogni tempu e locu dû munnu, qualsiasi riligioni? Nenti sufismi o risposti turtusi, pi favuri! ’Na sula risposta chiara, sèmplici, pragmàtica, incunfutabbili: "La riligioni servi a furniri â pupulazioni li mudelli cumuni di cumpurtamentu."
Po’ chiamarli comu vo’: ètica, murali, valuri ecc. La sustanza è la stissa. ’N ogni tempu e locu dû munnu la riligioni servi pi cumunicari â genti comu s’havi a cumpurtari. Cu’ sia havi daveru fidi ntâ propria riligioni, si cumporta comu la sò riligioni prescrivi.
La riligioni è indispensabbili pi l’organizzazioni suciali, e cu’ pensa lu cuntrariu è nu fissa e lu mustrirò fra pocu. Nun esistinu, nè su’ mai esistìuti, sociità umani senza riligioni. C’è supra chistu assai cunfusioni di tèrmini, pirchì sulamenti li riligioni tradiziunali pàrinu oggi accussì a cu’ sia di nuiautri (ma nun fu sempri accussì; oggi lu cristianu sapi ca puru lu maumittanu havi ’na riligioni; sèculi fa, lu nun-cristianu era pû cristianu sulu n’’nfideli ca nun mereta di vìviri, e defatti era assai pupulari la guerra santa, ancora oggi pupularissima tra li islàmici) Li riligioni nun-tradiziunali, ’mmeci, nun su’ ancora stati ricanusciuti comu riligioni a tutti li effetti. La cchiù recenti e putenti tra li novi riligioni nun-tradiziunali è la Tilivisioni, e nuddu ni ha ancora pigghiatu e dittu pubblicamenti china cuscienza.
Li sociòlogi ciàcciano supra la ovvia cunsiderazioni ca la Tilivisioni sia lu cchiù putenti strumentu di cumunicazioni ca mai sia esistìutu. Chistu è veru. Ma è sulu l’accuminzu.
’N tanti dî paisi unni la Tilivisioni cchiù s’è spànnuta, la riligiusità pupulari tradiziunali s’è fortimenti abbassata. Pirchì? Chiddu ca staju scrivennu, comu già dittu, nun voli essiri (comu defatti nun è) nu saggiu suciulògicu supra li rilazioni esistenti tra tilivisioni e sensu riligiusu, ma ’na lettera ô Maurizio Costanzo Show unni semplicimenti si gira la luci dâ cuscienza cullittiva ’n ’na direzioni fina a ora pocu battuta. Tanti e troppi sumigghianzi si tròvanu ntê cumpurtamenti di cu’ è devotu a ’na riligioni tradiziunali e di cu’ è devotu â Tilivisioni, pi li liquidari comu cuincidenzi. Quali sumigghianzi? Beh, pruvamu a ni truvari quarcuna ’nsemi:

• LI MUDELLI CUMUNI DI CUMPURTAMENTU: Comu già dittu, cu’ sia è devotu a ’na riligioni, di idda pigghia li propri mudelli di cumpurtamentu. Succedi ê cristiani, ê buddisti e ê maumittani. E accussì defatti succedi puru ê tilispittaturi: iddi accattanu li prudutti reclamizzati ’n Tilivisioni, còpiano li battuti di spiritu dî cabbarittisti Tilivisivi, guidanu la màchina câ spiriculatizza cu cui si guida ’n Tilivisioni (accussì facennu, pi esempiu, li famusi stragi dû sàbatu sira), ’mparanu a fari la viulenza câ nuncuranza cu cui è fatta ’n Tilivisioni (comu lu sinnò nun spiegatu fenòminu dâ ipirviulenza dî picciriddi ’n America mostra), fòrmanu li propri prifirenzi sessuali supra lu mudellu dû vastu catàlogu di sex-symbols dispunibbili ntâ universu Tilivisivu, e accussì via.
• LI DOGMI: Cu’ sia è devotu a ’na riligioni, nn’accetta senza pinsari li dogmi. Li devoti ntâ Tilivisioni, crèdinu dogmaticamenti a chiddu ca ci veni dittu ntô tiligiurnali (li cchiù smaliziati si cumpiacinu di crèdiri a nu certu tiligiurnali cchiù ca a n’àutru, ma la sustanza nun cancia). Emblimàtica è supra chistu la cèlebri frasi, adupirata pi mustrari la virdicità di ’na ’nfurmazioni: "L’ha dittu la tilivisioni..."
• LA "TRANCE": Caratterìstica di ogni fedeli duranti la funzioni riligiusa è lu sò cadiri ’n statu di trance. Succedi a buddisti, cattòlici, islàmici e zulù. Succedi puru a cu’ è immersu ’n nu prugramma tilivisivu. Taliannu la tilivisioni unu si scodda dâ propria realtà individuali e lu ciriveddu manna fora unni alfa (signu incunfutabbili di ’na alterazioni dû statu di cuscienza). Comu ’n chiesa cû propriu diu, davanti â Tilivisioni unu s’identifica cû oggettu dâ propria vinirazioni, ovveru li pirsunaggi Tilivisivi. Quannu l’identificazioni nun rèsci si cancia canali (unu si gira a n’àutru santu), ma nun si nesci dâ chiesa, cioè nun si stuta la Tilivisioni. Si ricorri ô zapping quannu nun si sapi cchiù a chi santu si vutari.
• LU RISPETTU DI L’AUTURITÀ SACIRDUTALI: Qualsiasi autènticu fedeli di qualsiasi riligioni s’accustirà trimmannu a cu’ ’ncarna lu sìmbulu dû propriu cultu, ovveru l’auturità sacirdutali. A talia’ li trimmura, li tartagghiamenti e la sulinnità di dintra di cu’ sia si trova a tu pi tu câ propria celebbrità Tilivisiva prifirìuta, nun pàrinu essirci dubbi ca si tratta dû stissu e idènticu fenòminu mintali.
• L’ERESÌA: Una di li caratterìstichi di qualsiasi riligioni ca sia talmenti putenti ca li fedeli nn’àbbianu ’na espirienza accussì assoluta di nun essiri pi nenti cunsapèvuli ca si tratta di ’na riligioni, è chidda di pruduciri lu fenòminu di l’eresìa, cioè la senza pietà dimulizioni di cu’ sia nun mostra ntê fatti di nn’essiri siguaci. Succidiu - cu nichi varianti - ntô Cattulicesimu e ntô Nazismu, e ancora oggi succedi - ’n misura diversa - ntê novi riligioni nun tradiziunali, comu la ricerca scientìfica, la psicanàlisi (Ripigghiamu prima o po’, ’n quarch’àutra lettera - oppuru no... cu’ lu sapi? - l’argumentu ca puru la scienza, comu la psicanàlisi - ca scienza nun è - sianu, ’n sustanza, strutturati nun assai diversamenti a paraguni di li riligioni tradiziunali.), e la Tilivisioni. Pruvassi lu litturi, si ê mei paroli nun cridi, a fìngiri cî sò interlocuturi di nun sapiri chi sia lu Maurizio Costanzo Show, lu Tiligiurnali, di nun sapiri cu’ sianu pippobaudo, mikebongiorno, mauriziocostanzo, sgarbi... Insistennu a ultranza, cu cu’ sia, di nun sapiri assulutamenti cu’ o chi cosa li ditti divinità sianu, unu si guadagnirà la fama di individui "strani", asuciali, ca fànnu finta di essiri matti o ’mmeci lu su’. ’N brevi, unu si truvirà cumplitamenti emarginatu. È lu marchiu di l’eresìa muderna. Eppuru, quasi nuddu di nuiautri ha mai vistu li ditti divinità cî propri occhi... dû vivu! Chiddi allòggianu ntê nostri ciriveddi pirchì pigghiamu la sò essenza ’n Tilivisioni, accussì comu lu bonu cristianu pigghia l’essenza di Diu ’n Chiesa. Pirchì l’essenza Tilivisiva è cchiù fàcili di pigghiari di chidda ecclisiali, ’n quantu è curridata di ottimi immagini a culuri e soni cunvincenti (ora puru stereo), la riligioni Tilivisiva sta cumplitamenti suppiantannu chidda ecclisiali tradiziunali.

  La cchiù grossa forza dâ riligioni Tilivisiva è ca tutti li sò fedeli - ca puru cchiù o menu sannu chi sia ’na riligioni - nun hannu cuscienza ca si tratta di ’na riligioni, e nni su’ accussì devoti comu cchiù nun putissiru. Cu chistu nun tiru cunclusioni murali supra la cchiù o minuri "bontà" dâ riligioni Tilivisiva. Bontà e Cattività su’ categurii ’nfidi, ca mai riscòtinu unità di giudiziu. Senza dubbiu avittìru appariri "cattivi", ê erètici turturati dâ Inquisizioni Cristiana, li sacirdoti di Santa Matri Chiesa, li quali li turturàvanu nun pi propria cattività, ma pi ginuina cunvinzioni ca li "cattivi" fussiru li àutri.
  La riligioni Tilivisiva nun è nè bona, nè cattiva, puru si ’n idda possa essiri pigghiatu sia lu Beni ca lu Mali. La Tilivisioni furnisci oggi a tutti nuiautri li mudelli cumuni di cumpurtamentu. ’Nsigna lu valuri di l’ecolugìa (valuri dû tuttu assenti ’n tutti li paisi unni la Tilivisioni nun l’ha purtatu avanti a longu), ma puru lu valuri dâ viulenza (è chistu pi certi, mia cumprisu, nu valuri nigativu, ma pi àutri nu valuri pusitivu, tant’è veru ca veni di tanti cu fierizza fatta). ’Nsigna lu valuri dî diritti civili, ma puru lu valuri dî duviri cunsumìstici, cundiziunannunì a aviri a cunsumari, cunsumari, e sempri cchiù travagghiari pi cchiù cunsumari. ’Nsigna lu valuri dâ lealtà spurtiva, ma puru dâ guerrigghia tra tifuserìi, stigmatizzannula cî paroli, ma ô stissu tempu prumuvennula, facennunì nu mitu nigativu dâ trasgressioni. ’Nsigna lu valuri dâ sulidarietà, ma puru chiddu dû rampantismu, dâ ricchizza a tutti li custi. ’Nsigna lu valuri dû Cattulicesimu, tinennunì aggiurnati supra li urazioni papali, ma puru lu valuri di ’na visioni sulamenti ginitali dû sessu, facennunì truvari migghiara di videocassetti porno. ’Nsigna lu valuri di essiri comu madreteresadicalcutta, ma puru lu valuri dû cunsumismu sintimintali a l’americana.
  Capisci, caro Maurizio Costanzo Show, comu stannu li cosi? La magghiuri parti dî nostri valuri e dî nostri cunvinzioni ni su’ ô jornu d’oggi furniti dâ Tilivisioni, propriu comu ni èranu ’na vota furniti dû timuri di Diu. Ma la Tilivisioni esisti di pocu tempu, di pochissimu tempu. La magghiuri parti dî taliani è crisciuta senza lu timuri dâ Tilivisioni, e ’na cunversioni ’n età adulta nun vali ’na fidi arradicata fina dî primi anni di vita. Li veri e autèntici adepti assuluti â riligioni dâ Tilivisioni su’ sulamenti li picciotti ca ancora stannu criscennu... ed è accussì ntâ sociità di dumani, quannu tutti sarannu crisciuti fina di l’accuminzu ntô timuri Tilivisivu, ca videmu a pienu li eclatanti effetti dâ rivuluzioni ’n attu...
  Spiculari è lècitu, divirtenti e quarchi vota duvirusu, caro Maurizio Costanzo Show. Sarà ’n n’àutra lettera, fòrsi, ca mi sbizzarrirò a spiculari supra comu sarà la sociità futura, quannu la Tilivisioni rignirà suvrana tra li riligioni dû munnu, nu regnu accussì assolutu ca li sùdditi ci ubbidirannu ciecamenti, cu divuzioni pari a chidda ca àutri sùdditi, ’n àutri tempi, nutrìru versu lu sò re, lu sò papa, o versu lu strijuni dû casali. Cunsapèvuli sulamenti di l’incurmabbili divirsità giràrchica ca li spartirà dî sò novi dei.

  Roberto Quaglia

  ---