l'è l'Alessandro Testa che l'è dent in mì che scrivarà i parol che seguirann, perché on àbil trücch el me consent de accèd diretament a i procedür de elaborazion del sò cervell.
Ve scrivi in la mòlteplice vesta de l'idòlatra che el s'acòsta ümilment al sò totem, locüpletand la stòlta consapevolezza soa con i illüsòri vantagg che sta sùpplica cartacea la portaria a la consapevolezza soa televisivament minüsabient, nonché sòta i spòj mentitrici del compilador mercenari de centon iletteraa a üs de manichin ossobüchìvor impalaa in la stòlida adorazion di lor porscin inamidaa; vieppü me menti memòria fotostàtica del cantor del pastiss e del gorgonzola che el rancidiss dimèntegh in stantìe credenz meneghin, l'inarrivàbil dolorant Carlo Emilio; e men de tütt me diciari el servitor e spettador ümil vòster Alessandro Testa.
Che la natüra de la improvisazion, de la lodada e vitüperada improvisazion che la infarciss i dòtt sbrodolant dissertazion di esàngui fioeu del De Sanctis, di epìgon de on Getto rinverdii in del pàllid angüicrinii de Ferrara la sia matèria ignòta a i pü, a pü reson in on mond che el se prostra adorant al feticci de la iperspecializzazion e de la conoscenza süperscientìfica, che la natüra de la improvisazion, Ve disevi, la giascia in del pü complet abandon soverciada del strapoter de la Fòrmula, del Palinsest, in estrema anàlisi de la pretesa tütta alfieriana de posseder on significant per ògni significaa, la inveraria el dògma hegelian del "tutto ciò che è reale..." e inscì via disend; ma che de dree a sta pretesa de domìni sora l'univers mond, sta volontà de potenza piscinina piscinina, pü sìmil al "volli, volli, fortissimamente volli" del adülter fülv che no al infantil stüpor del mìt süperòmm se cela ona sostanzial incomprension de la natüra di ròb l'è ona notizia che l'ha avüü scarsa circolazion in del ültim para de sècoi, fada forsi eccezion per pòcch Untermenschen negher praticant el strett e inagèvol senter del blues.
Assìstom adess, multipotent totem che el asperg sora el pòpol insipient de benedizion catòdich gnòstich toe, fà sì che con el sant ausili de la sapienza toa procedent in on ünich, ininterrott effluvi de quell Ün el cui nòmm quadrisìllab la mia lengua profana l'è minga degna de mentovà, la mia scienza limitada e peccatriz la pòssa attìng a ona scintilla de quela lüs che de l'eternità la promana de l'ünica font, de l'ünich ben, de l'ünich vasell de ògni conoscenza affinché la mia lengua e el mè terminal pòssen ardì de captà per la magior glòria Soa ona scintilla de verità de donà, noeuv Prometeo, a i tò fioeu che giàssen in la oscürità. Inscì sia.
A on cert pont, disi mì, chi te riva? On spilungon con almen trii spann de còll, disi mì, vün che el sostègn che quell che se ved l'è tütta ona fandònia, e ròb de sto gener.
Quell là el dis che quell che vedèmm, santa polenta , l'è mica vera ma l'è tütta ona imaginazion di oeugg, o ròb inscì. Ròb de minga crèd, disi mì.
Ma cossa ghe intra questo con la improvisazion, disarìi vialter, piscinitt amis mè? Cossa ghe intra la natüra de la realtà con on secondari procediment artìstich ma cossa disi artìstich de pantomima, de avanspettàcol, de circ!
Mentre el fioeu de sti temp ilüminaa e progressiv rimàstega in poltrona concett ormai convolüü in bòll de enzim che già de temp hann esplicaa la lenta sebben inarrestàbil òpera digestiva lor degradand ògni ròba in ona opaca papa maleodorant che alter la spèta minga che de vess espülsa per i orifizzi che la natüra, matrigna ma sapienta, l'ha predispòst acconciament a la bisògna, alter, men sedentari, el se accing a estrà del magma informe de l'indeterminaa, noeuv demiürg, la Splendenta Gemma del Noeuv.
Ma che gemma-splendenta-del-noeuv sarìa, se già la füss conossüda?
El sàlta inscì a la perspicace coscienza toa, amis lettor, come ògni òpera de vera descoverta la sia possìbil domà attravers el nòbil strüment de la improvisazion.
Ricetta per ona bòna improvisazion:
1) Ògni vòlta che te troeuvet quaicòssa che te par degn de vess tegnüü, abandònel sübit.
2) Diffida de tütt quell che riess a la prima
3) Diffida de tütt quell che riess minga a la prima
4) Gh'è minga el giüst
5) Gh'è minga el sbagliaa
6) Quand te seet minga come fà, improvisa
Se te mantegnaree la toa calma quand tütt intorna a tì la avarann perdüda
Se te accettaree la riuscida e el faliment di tò improvisazion con l'istess soris sora i làver
Se ona vòlta terminada la toa improvisazion te la tesaurizzaree minga, scordàndola per menàtt in on noeuv laurà
Alora, fioeu, te saree on improvisador.

Alessandro Testa