se pö dì quant se voeur che avègh i preconcett l'è mal, ma, apunt, se dis e basta e anzi, in sto dì - se volom andà in fond a la question - ghe n'è anca assee poch de bell.
L'esser üman el viv defatt grazie a ona vision del mond faa per el pussee de preconcett. La nozion istessa che avègh i preconcett el sia on fatt negativ, l'è lee istessa on preconcett. Ma cossa l'è on preconcett?
Del dizionari Gabrielli: "PRECONCETT: Che l'è concepii in l'ànim prima de vess staa conossüü, consideraa, sperimentaa, a mœud de creà pregiüdizi, de vietà on giüdizi seren de la realtà."
Come se vede, el preconcett l'è minga el pregiüdizi, ma el n'è inveci eventualment la causa. Se noti come anca in del dizionari Gabrielli se acenna al significaa negativ del tèrmin (...vietà on giüdizi seren...). El dizionari Gabrielli, definend el preconcett, l'è vìtima lü istess de on preconcett, e de quest consegue, in virtü de la definizion che lü istess el dà a la parola "preconcett", che el redator del dizionari el gh'ha definii sto concett senza avèghel prima conossüü, consideraa, sperimentaa, in alter parol capii, riportàndon inveci el significaa popolarment pussee difüs, in alter parol el preconcett.
Pensà che in Australia viven i cangür l'è on preconcett, per ogni persòna che la sia mai stada in Australia. Anca l'idea che l'Australia la esist l'è on preconcett, per chi el ghe sia mai staa. Chi ne garantiss che l'esistenza de l'Australia la sia minga domà ona leggenda senza fondament? L'è opinion difüsa che l'Australia la esist, ma fina a quand vün el ghe va minga, quela soa opinion l'è on preconcett.
Gh'è nagott de mal in sti preconcett. In realtà gh'è nagott de mal in di preconcett in general. El 99% di nòster conoscenz hinn in realtà preconcett. Anca el concett che Marilyn Monroe la sia sessualment apetìbil l'è on preconcett. In realtà l'è morta, interrada e decomposta e inscì tütt'alter che sessualment riütilizzàbil. Anca el concett che la füss sessualment apetìbil quand l'era viva l'è on preconcett. Emm giüst vist quaic imàgin soa trüccatìssima bidimensional in moviment, senza nanca sentìghen la vos (doppiada). Per quell che ne savom lee la spüzzava, e el sò fiaa el podess evocà l'impression de on distillaa de cazett màscie. Per quell che ne savom tütt i foto soe e tütt i fotogramm de tütt i film sò hinn abilment ritocaa per fàghela parè arapanta. L'emm minga conossüda e sperimentada, questa l'è la verità, ogni opinion che gh'emm de quell che lee la füss l'è on preconcett.
Se vün propri el sa minga cossa fà, el se pö setà a ona scrivania o in alter pizz e elencà sü on foeui de carta tütt i sò preconcett che ghe vegnen in ment, ovèro tütt i robb che el pensa de savè anca avend mai avüü ocasion de verificài, sperimentài, fàghen esperienza in prima persòna. Gh'hoo minga idea a cossa el pö servì fàll, ma se a quaicedun ghe vegn denver la voeuia de fàll, lü/lee el saparà cossa ghe servirà.
Se alora i preconcett hinn nagott de mal, a cossa el serv savè cossa hinn? E perché ne semm adree a parlàn?
Ebén, tant per començà per restitüì la dignità perdüda al concett de preconcett, incolpèvol vìtima de sè istess, ovèro de on preconcett.
E tirom adess in ball on alter vocàbol vìtima de on atros preconcett: "Discriminazion"! Ne hann imparaa che discriminà l'è mal. Se se dis solidal con i inscì ditt "vìtim de la discriminazion". Se parla in di telegiornai de "grav fatt de discriminazion". La parola "discriminazion" l'è spess associada a "intolleranza", come se significassen quaicoss de sìmil.
El dizionari Gabrielli el dis: "DISCRIMINAZION: l'att e l'efett del discriminà, distinzion, differenza."
E ancamò: "DISCRIMINÀ: Fà differenza o distingu tra persònn e robb; differenzià, distingu." Nagott de negativ l'è contegnüü in sto vocàbol. Che la discriminazion la sia quaicoss de negativ in sè, l'è on preconcett. Chissessia el pensa che "discriminà" el sia mal, el gh'ha adotaa sto preconcett, e de quest consegue, in virtü de la definizion del Gabrielli de "preconcett", che sta persòna la gh'ha mai conossüü, consideraa, sperimentaa, el real significaa de la parola "discriminà".
E discriminà, ovèro distingu, ricognoss differenz, l'è inveci essenzial in la vita de chissessia. E l'è important imparà a discriminà cosientement, lücidament, soratütt rigoard ai preconcett, ovèro quela gran massa de convinzion che hinn minga früt de l'esperienza, de la sperimentazion propria, de ona conoscenza aprofondida, di necessari verifich. Ghe voeur ciapà cossienza di sò preconcett e tra de lor discriminà, separand i preconcett ütil de quii danos, quii sensaa de quii dissennaa. L'è ütil e sensaa avègh el preconcett che l'Australia la esist, anca se se ghe è mai staa, perché inscì se pö eventualment ciapà in considerazion l'oportünità de andàgh in vacanza. L'è danos e dissennaa avègh el preconcett che i negher hinn ona razza inferiora, perché se se crea nemis che nemis se de no saríen minga, e se incentiva e legitima al stess temp alter individü a svilüpà el stess preconcett vers de nün.
In sìntesi, la via de la saviezza l'è quela de imparà a discriminà tra i sò preconcett, e minga in base ai sò preconcett.
Tütt sto polpetton el voeva introdür quaic divagazion sü el difüs preconcett de la mort. Ne parlarèmm, car Maurizio Costanzo Show, in la lettera che vegn.

Roberto Quaglia