si podet nàrrere cantu si cheret chi tènnere sos preconcetos est male, ma, apuntu, si narat e bastat e antzis, in custu nàrrere - si cherimus andare a fundu de sa chistione - b'at fintzas meda pagu de bellu.
S'èssere umanu bivet difatis gràtzias a una visione de su mundu fata pro sos prus de preconcetos. Sa notzione etotu chi tènnere sos preconcetos siat unu fatu negativu, est issa etotu unu preconcetu. Ma ite est unu preconcetu?
Dae su ditzionàriu Gabrielli: "PRECONCETU: Chi est cuntzepidu in s'ànimu prima de èssere istadu connotu, cunsideradu, isperimentadu, a modu de creare pregiudìtziu, de bietare unu giudìtziu serenu de sa realidade."
Comente si bidet, su preconcetu no est su pregiudìtziu, ma nde est imbetzes eventualmente sa càusa. Si notet comente fintzas in su ditzionàriu Gabrielli s'acennat a su significadu negativu de su tèrmine (...bietare unu giudìtziu serenu...). Su ditzionàriu Gabrielli, definende su preconcetu, est vìtima issu etotu de unu preconcetu, e dae custu cunseguit, in virtude de sa definitzione chi issu etotu dat a sa paràula "preconcetu", chi su redatore de su ditzionàriu at definidu custu cuntzetu sena l'àere prima connotu, cunsideradu, isperimentadu, in àteras paràulas cumpresu, riportèndende imbetzes su significadu popularmente prus difusu, in àteras paràulas su preconcetu.
Pensare chi in Austràlia bìvant sos canguros est unu preconcetu, pro onni persone chi no siat mai istada in Austràlia. Fintzas s'idea chi s'Austràlia esistit est unu preconcetu, pro chie no bi siat mai istadu. Chie nos garantzat chi s'esistèntzia de s'Austràlia no siat isceti una leggenda sena fundamentu? Est opinione difusa chi s'Austràlia esistit, ma finas a cando unu no bi andat, cussa opinione sua est unu preconcetu.
No b'at nudda de male in custos preconcetos. In realidade no b'at nudda de male in sos preconcetos in generale. Su 99% de sas connoschèntzias nostras sunt in realidade preconcetos. Fintzas su cuntzetu chi Marilyn Monroe siat sessualmente apetìbile est unu preconcetu. In realidade est morta, interrada e descumposta e gasi totu àteru che sessualmente riutilizàbile. Fintzas su cuntzetu chi esseret sessualmente apetìbile cando fiat biva est unu preconcetu. Amus pròpiu bidu carchi immàgine sua truccatìssima bidimensionale in movimentu, sena mancu nde intèndere sa boghe (doppiada). Pro su chi nde ischimus nois fetiat, e s'alenu suo diat pòdere evocare s'impressione de unu distilladu de cartzitas fràzigas. Pro su chi nde ischimus totu sas fotos suas e totu sos fotogramas de totu sos films suos sunt abilmente ritocados pro nos la fàghere pàrrere arrapante. No l'amus connota e isperimentada, custa est sa veridade, onni opinione chi tenimus de su chi issa esseret est unu preconcetu.
Si unu pròpiu no ischit ite fàghere, si podet sètzere a una iscrivania o in àteru logu e elencare subra unu fògiu de paperi totu sos preconcetos suos chi li benint a conca, est a nàrrere totu sas cosas chi pensat de ischire fintzas no aende mai tentu ocasione de las verificare, isperimentare, nde fàghere esperièntzia in prima persone. No tèngio idea a ite podet serbire a lu fàghere, ma si a calicunu li benit a beru sa gana de lu fàghere, issu/issa at a ischire ite li at a serbire.
Si tando sos preconcetos no sunt nudda de male, a ite servit ischire ite sunt? E proite nde semus faeddende?
Ebbè, tantu pro incumintzare pro torrare sa dignidade pèrdida a su cuntzetu de preconcetu, incurpàbile vìtima de sese matessi, est a nàrrere de unu preconcetu.
E tiramus immoe in ballu un'àteru vocàbulu vìtima de un'atrotze preconcetu: "Discriminatzione"! Nos ant imparadu chi discriminare est male. Si narant solidales cun sas gasi naradas "vìtimas de sa discriminatzione". Si faeddat in sos telegiornales de "graes fatos de discriminatzione". Sa paràula "discriminatzione" est ispissu assotziada a "intolleràntzia", comente si significarent carchi cosa de sìmile.
Su ditzionàriu Gabrielli narat: "DISCRIMINATZIONE: s'atu e s'efetu de su discriminare, distintzione, diferèntzia."
E galu: "DISCRIMINARE: Fàghere diferèntzia o distìnghere tra persones e cosas; diferentziare, distìnghere." Nudda de negativu est cuntènnidu in custu vocàbulu. Chi sa discriminatzione siat carchi cosa de negativu in sese, est unu preconcetu. Chie si siat pensat chi "discriminare" siat male, at adotadu custu preconcetu, e dae custu cunseguit, in virtude de sa definitzione de su Gabrielli de "preconcetu", chi custa persone no at mai connotu, cunsideradu, isperimentadu, su reale significadu de sa paràula "discriminare".
E discriminare, est a nàrrere distìnghere, reconnòschere diferèntzias, est imbetzes essentziale in sa vida de chie si siat. E est importante imparare a discriminare cuscientemente, lùcidamente, suba de totu a susu de sos preconcetos, est a nàrrere cussa manna massa de cumbintziones chi no sunt frutu de s'esperièntzia, de sa isperimentatzione pròpia, de una connoschèntzia aprofundida, de sas netzessàrias verìficas. Bi cheret leare cussèntzia de sos preconcetos suos e tra issos discriminare, separende sos preconcetos ùtiles dae cussos dannosos, cussos sensados dae cussos dissensados. Est ùtile e sensadu tènnere su preconcetu chi s'Austràlia esistit, fintzas si no bi si est mai istadu, proite gasi si podet eventualmente leare in cunsideratzione s'oportunidade de bi andare in vacàntzia. Est dannosu e dissensadu tènnere su preconcetu chi sos nieddos sunt una ratza inferiore, proite si creant nemigos chi nemigos sinono no diant èssere, e s'incentivat e legìtimat a su matessi tempus àteros indivìduos a isvilupare su matessi preconcetu cara a nois.
In sìntesi, sa via de sa sabidoria est cussa de imparare a discriminare tra sos preconcetos suos, e no in base a sos preconcetos suos.
Totu custu purpetone cheriat introduire carchi divagatzione a susu de su difusu preconcetu de sa morte. Nde amus a faeddare, caro Maurizio Costanzo Show, in sa lìtera chi benit.

Roberto Quaglia