si à un biel dî che vê pregjudizis al è mâl, ma, pròpit, si à un biel dî e vonde e anzit, in chel dî - se o volìn lâ in font ae cuestion - al è ancje une vore pôc di biel.
Il jessi uman al vîf difat gracie a une vision dal mont fate par plui di pregjudizis. La nozion stesse che vê pregjudizis al sedi un fat negatîf, e je jê stesse un pregjudizi. Ma ce isal un pregjudizi?
Dal dizionari Gabrielli: "PRECONCETTO: Che al è concepît tal anim prime di jessi stât cognossût, considerât, sperimentât, in maniere di creâ pregjudizi, di proibî un judizi seren de realtât."
Come che si viôt, il pregjudizi nol è il judizi anticipât, ma al è invezit eventualmentri la sô cause. Si noti cemût che ancje tal dizionari Gabrielli si fâs cenon al significât negatîf dal tiermin (...proibî un judizi seren...). Il dizionari Gabrielli, definint il pregjudizi, al è vitime ancje lui di un pregjudizi, e di chest al ven fûr, par vie de definizion che lui stes al da ae peraule "preconcetto", che il redatôr dal dizionari al à definît chel concet cence vêlu prime cognossût, considerât, sperimentât, in altris peraulis capît, ripuartant invezit il significât plui slargjât te int, in altris peraulis il pregjudizi.
Pensâ che in Australie a vivin i cangurs al è un pregjudizi, par ogni persone che no je mai stade in Australie. Ancje la idee che la Australie e esisti e je un pregjudizi, par cui che no i è mai stât. Cui nus garantissial che la esistence de Australie no sedi dome une liende cence fondament? E je une opinion slargjade che la Australie e esisti, ma fin che un nol va, chê sô opinion e je un pregjudizi.
No 'nd è nuie di mâl in chescj pregjudizis. In realtât no 'nd è nuie di mâl tai pregjudizis in gjenerâl. Il 99% des nestris cognossincis a son in realtât pregjudizis. Ancje il concet che Marilyn Monroe e sedi sessualmentri apetibil al è un pregjudizi. In realtât e je muarte, soterade e disfate e duncje dut altri che sessualmentri tornade a doprâ. Ancje il concet che e fos sessualmentri apetibil cuant che e jere vive al è un pregjudizi. O vin dome viodût cualchi sô imagjin bidimensionâl une vore truccade in moviment, cence nancje sintî la sô vôs (dopiade). Par ce che o savìn nô e spuçave, e il so flât al podeve fâ vignî in ment un distilât di cjalcins fraids. Par ce che o savìn dutis lis sôs fotos e ducj i fotograms di ducj i siei films a son ritocâts cun abilitât par fâle someâ ecitante. No le vin cognossude e sperimentade, cheste e je la veretât, ogni opinion che o vin di ce che e jere e je un pregjudizi.
Se un nol sa pròpit ce fâ, al pues sentâsi a une scrivanie o in altris bandis e fâ la liste suntun sfuei di cjarte di ducj i siei pregjudizis che i vegnin in ment, cioè dutis lis robis che al ten di savê ancje se nol à mai vût ocasion di verificâlis, sperimentâlis, fâint esperience in prime persone. No ai idee a ce che al pues zovâ fâ chest, ma se a cualchidun i ven pardabon voie di fâlu, lui/jê al/e savarà ce che i zovarà.
Se alore i pregjudizis no son nuie di mâl, a ce zovial savê ce che a son? E parcè int fevelìno?
Ben, tant par scomençâ par tornâ a dâ la dignitât pierdude al concet di pregjudizi, vitime incolpevul di se stes, cioè di un pregjudizi.
E tirìn cumò in bal un altri vocabul vitime di un pregjudizi tremend: "Discriminazion"! Nus àn insegnât che discriminâ al è mâl. Si disin solidâi cu lis cussì clamadis "vitimis de discriminazion". Si fevele tai telegjornâi di "fats grâfs di discriminazion". La peraule "discriminazion" e je dispès associade a "intolerance", come se a volessin dî alc di compagn.
Il dizionari Gabrielli al dîs: "DISCRIMINAZIONE: L'at e l'efiet dal discriminâ, distinzion, diference."
E ancjemò: "DISCRIMINARE: Fâ diference o distingui tra personis e robis; diferenziâ, distingui." Nuie di negatîf al è dentri di chest vocabul. Che la discriminazion e sedi alc di negatîf in se, al è un pregjudizi. Cualsisei che al ten che "discriminâ" al sedi mâl, al à cjolt chest pregjudizi, e di chest al ven fûr, par vie de definizion dal Gabrielli di "preconcetto", che chê persone no à mai cognossût, considerât, sperimentât, il significât reâl de peraule "discriminâ".
E discriminâ, cioè distingui, ricognossi diferencis, al è invezit essenziâl te vite di cualsisei. E al è impuartant imparâ a discriminâ in maniere cussiente, lucide, soredut sui pregjudizis, cioè chel grant grum di convinzions che no son frut de esperience, de proprie sperimentazion, di une cognossince fonde, des verifichis che a coventin. Bisugne cjapâ cussience dai propris pregjudizis e tra di lôr discriminâ, separant i pregjudizis utii di chei dannôs, chei sensâts di chei cence sens. Al è util e sensât vê il pregjudizi che la Australie e esisti, ancje se no si è mai stâts, parcè che in cheste maniere si pues eventualmentri tignî cont de pussibilitât di lâi in vacance. Al è dannôs e cence sens vê il pregjudizi che i neris a son une raze inferiôr, parcè che si cree nemîs che nemîs altrimentri no saressin, e si incentive e si legjitime tal stes timp altris individuis a svilupâ il stes pregjudizi cuintri di nô.
In sintesi, la strade de sapience e je chê di imparâ a discriminâ tra i propris pregjudizis, e no su la base dai propris pregjudizis.
Dut chest polpeton al voleve introdusi cualchi divagazion sul pregjudizi slargjât de muart. Int fevelarìn, Cjâr Maurizio Costanzo Show, te prossime letare.

Roberto Quaglia