sperà minga de trovà ragionevolezza in ogni mia lettera. Quell che elegantement el se fregia del titol de "ragionèvol" l'è quasi semper la vil ripetizion de abüsaa schema. Ghe n'è mai coragg in la esternazion de fras e concett faa, qual i argoment ragionèvol quasi semper hinn. L'ünich valor de la ragionevolezza l'è la praticità. La ragionevolezza l'è pràtica perché fondamentalment condividüda, almen di esser üman pensant. I esser üman reagent, quii che pènsen minga ma semplicement reagissen a l'ambient come qualunca tropism, ne interèssen minga e nanca nün interessom a lor, tant'è ver che cert hinn minga adree a leng o percepì altrimenti sti parol, perché lor lengen alter che quaic titol chì e là. Ne pias pensà a nün come ai üman pensant, e se l'è minga ver che ne pias, l'è tuttavia ver che quest el pias a mì, e el disi senza timor. E tra i üman pensant l'argoment de la ragionevolezza el god de quaic crèdit de tropp. Equivochom minga. A mì pias la ragionevolezza. L'è ütil. Ma la critichi perché l'è noiosa, e soratütt perché la ne ingana. L'è noiosa perché la ripet a la mort i sò dogm, sostegnüü de la propria natüra ragionèvola.
La ragionevolezza la impodaría, a chi el voless scriv alter che quaic crìptica poesiola de merda, de sròtolà sapientement fras acüratament calibraa in di lor significaa lampant e recòndit, fras mesüratament confrontaa mentalment, a l'att de la scritüra o on poo prima o on poo dopo, con la imàgin che se gh'ha de la cültüra colettiva del contest üman de cui se è part. La ragionevolezza la sügeriss de pensà, quand se scriv, ai letor ai quai se se rivòlg, per risültà a lor comprensìbil, nonché piasèvol o spiasèvol a seconda di proprie intenzion, tralassand come se el füss minga important el concett de la totala e còsmica propria libertà in del scriv, inveci, assolütament qualunca roba a vün el vegness in ment, con totala disinteress per chi o per cossa on dì el lengiarà sti fras oppür no.
La ragionevolezza la sconsiglia chi el scriv de scriv per sè, a propri üso e consüm, in totala disprezz de qualunca ragionèvola considerazion sü la comerciabilità de quell che el sta scrivend. In del moment in cui se tegn on qualunca cont de chi el lengiarà quell che se scriv, ecco che se è comercial. Se cerca de smercià el propri pensér ai alter, poch impòrta se el sia in càmbi de danee o de aprovazion, düü divers valüt del medèsim ategiament mercantil.
Tra l'alter, scrivend per sè in del assolüü disinteress vers chi el gh'avess mai de leng tütt quest, se dann düü possìbil svilüpp de la situazion per el cas che quaicedun che el sia minga l'autor el se troeuva poeu a leng "tütt quest":
In del primm cas (el pussee frequent), el scritt el ghe pias minga e alora el finiss oppür pesg per lü.
In del second cas el ghe pias, e alora el continua a leng, content de scrocà inscì certi pensér che l'autor el gh'aveva scrivüü per sè e cert minga per lü.
Come se vede, ghe n'è nissün perìcol. Chi el se voeur mett a scriv domà per sè el gh'ha però de evità de contàss la bala de volè scriv domà per sè quand segretament inveci el spera che quaicedun poeu el leng quell che lü el gh'avaría scrivüü domà per sè, e el mostra forsi anca de aprezzàll. In sto cas l'autor l'è on insicür oppür on vil, e probabilment el andarà incontra a brüsant früstrazion.
E el val nanca el fatt de scriv quaicoss per sè e poeu cercà de fàll minga leng a nissün. Perché mai el gh'avaría de fass leng a nissün? Se se è scrivüü quaicoss domà per sè de sicür se tegn in nissün cont el giüdizi che alter pòssen o vòrren esprim de sto scritt. Se el ghe pias minga hinn afari lor. E se el ghe pias anca. Se se tegn in cont el giüdizi di alter, se è minga scrivüü per sè. Se è scrivüü in mœud ragionèvol e mercantil, senza per "mercantil" intend quaicoss de negativ.
El fatt che mì me sia soffermaa inscì a long sü sto argoment, aludend tra i righ che sont minga adree a scriv per alter che sìen minga mì (defatt mì sont giamò tütt i persònn che incoeu me bàsten - doman vedarèmm), parirìa sügerì che mì voeuia convinç quaicedun o comunque condüll, con tütt sti argoment, a capì la essenza de quell che sont adree a intend dì. Se gh'avess volüü dimostrà che denver me ne frega nagott de chi el sta legend sti righ, gh'avaría avüü de vess ancamò pussee caòtich e incomprensìbil e sconclüsionaa de quell che mì sia comunque egoalment in part staa. Gh'avaría avüü de scriv... ebén insomma, fà on sacch de robb che adess me vegnen minga in ment e gh'hoo nissüna voeuia de sforzàm perché efettivament me ne frega nagott. El fatt che mì gh'àbbia minga faa tütt quest (qualunca roba sto "tütt quest" el sia o el pòssa vess), el dimostra inscì che coerentement mì voless per nagott dimostrà che me ne frega nagott come efettivament me ne frega minga, e dimostràndol inevitabilment el destrüs e el anülla al stess temp el valor de sta dimostrazion, e destrüsèndola la ripristina, inscì ridestrüsèndola e ripristinàndola per ona quantità infinida de voeult, come in ogni bon paradòss che el se rispetta possibilment el avvegn oppür no.
L'è büff che per quant se cerca de abolì ogni ragionevolezza in del procèd di proprie pensér, la ment la sta mai al gioeugh e quaic parvenza de senso larvatament compiüü la se afacia egoalment a la realtà. Insomma, per novanta persònn che giüstament giüdicaríen quell che de mì fina adess vergaa contòrt vaniloqui de nanca eccelsa fatüra, sont pront a scomettegh che ona desina de matt o poch de men insorgaríen contra sto giüdizi, con argomentazion che me interèssen minga e inscì ne parlaroo minga chì. Inscì, se fii part di novanta, sii a mì graa de avèv adess res el confort de la conferma che sii perfetament normai, solidament contegnüü in la maggioranza che come ne impàren la gh'ha semper reson. Se fii part di des, sii a mì graa per i motiv che perfetament savii de sol, senza che ve i àbbia de ripèt mì.
Ma noti on preocüpant ritorn de ragionevolezza in del mè sproloqui, e inscì la pianti sübit là prima che el sia tropp prest.

Roberto Quaglia