O ai di cirî di jessi banâl, orpo. Mi son capitadis in man lis bruticopiis des letaris che ti ai za scrit e mi soi inacuart che a son pardabon brutis, cioè mi son scjampâts moments di profonditât involontarie, a discapit de banalitât indispensabile par fâ di cualsisei prodot un prodot bon. Isal un argoment avonde banâl, chest? Lu speri pardabon. Ducj a disin oramai che cualsisei robe e je prime di dut un prodot. Se lu disin ducj, forsit al è un concet banâl, cioè pròpit ce che o stoi cirint di produsi. Se dut al è un prodot, o al è un bon prodot bon o al è un trist prodot trist. Ben, mi semee che a banalitât o stin lant ben. Cui isal che al decît cuant che une robe e je pardabon banâl? Cheste frase mi è vignude avonde banâl. O stoi miorant.
Une robe e pues jessi banâl par cualchidun e banâl par altris, cioè, o volevi dî, banâl par cualchidun e no banâl par altris. E ce disêso di meti cualchi frase in corsîf, cence motîfs particolârs? No isal decisementri banâl? Forsit al è un fregul origjinâl. Bisugne stâ atents. La origjinalitât ti spiete al varc daûr dal cjanton, e ti cjape cuant che mancul tu le spietis. Ma une robe e pues jessi nuie banâl epûr une vore stupide. Isal miôr une buine banalitât o une stupiditât perentorie? Une robe masse stupide e finìs di jessi banâl.
Orpo! L'ecès di banalitât al puarte a tradiment al so contrari cuant che mancul tu tal spietis. Bisugne decrementâ la corezion semantiche - ma ce cavul disio! - bisugne diminuî la bontât gramaticâl par compensâ i rigurgits di banalitât paradossante.
No capìs nuie nancje jo, us siguri pardabon. Ce figure fasio, vuê, cun chestis peraulis che no mi plasin nancje un pôc? Someio stupit, o someio ignorant? O ben no someii nuie parcè che o vês za finît di lei? Ma ce disio? Se a àn finît di lei no si inacuargin di dutis chestis peraulis che a continuin però a jessi sul sfuei di cjarte cence che lôr lu savedin, duncje ce stano a fâ?
Achì o crôt che la banalitât e sedi lade a fâsi fri. Al covente un biel lûc comun par salvâ cjavre e verzis. Alc dal gjenar: "La robe impuartante e je che e sedi solidarietât". No mâl, eh? Difat i bêçs no fasin la felicitât, parcè che la nature e je madrigne e cuant che mancul tu tal spietis i grops a vegnin al pietin e achì al cole il mus. No je pròpit justizie a chest mont! Al è pròpit vêr che no si pues fidâsi. Plui o cognos lis personis e plui o ami i nemâi.
Dut chest al è dome squalit, scjarsementri banâl o antibanâl, un toc scrit dal gjenar "o volarès ma no pues", une masnade di frasis ingrumadis a câs.
Forsit o rivìn almancul a deventâ noiôs.
Ma parcè varessino di deventâ noiôs? O volevin jessi banâi parcè che chest al è ce che i plâs ae int. Ma lis noiositâts no plasin a nissun. Achì o stin pròpit sbaliant dut. Se pròpit bisugne jessi noiôs, tant al vâl dî ancje alc di sientificamentri interessant.
Cjâr Maurizio Costanzo Show, jude tu...!
Ve, o sin! Superbanalitât!
«Cjâr Maurizio Costanzo Show, o ai provât dutis lis stradis ma no 'nd è stât nuie di fâ. Dutis lis puartis mi son stadis sieradis in muse. O soi pròpit disperât/disperade. No sai plui ce fâ. Mi àn consiliât di rivolzimi a te, e cumò tu tu sês la mê sole sperance. La mê vite e je deventade un infier. O sai che a son tantissimis lis personis che ti scrivin cun problemis ancje plui grancj dal gno, ma o vuei ilusionâmi che tu vueledis dâmi une man a superâ chest gno moment dificil.
«Dut al è scomençât cuant che il gno sisteme nervôs nol à plui tignût sot dal pês dai miei problemis familiârs teribii, che ti sparagni parcè che tant a son simpri lis stessis disgraciis, che a sucedin a tantis personis che a nassin sfortunadis come me. Il cediment nervôs di origjin familiâr si è slargjât a chês altris sferis de mê vite, roseantle a pôc a pôc fin al vues.
«Cumò mi sint come crot/crote di front ae vite, che mi sorevinç e mi fracasse sot dal so pês teribil. No pues cjalâ al avignî, e cuant che o pensi al passât mi vegnin i trimiçs. Ancje sfuarçantmi al massim, no rivi mai a pensâ al presint par plui di cualchi secont, parcè che tal gno presint nol è nuie di nuie fûr di chê grande angosse che no sai cemût spiegâti, ma mi gjave ancje il flât.
«Cjâr Maurizio Costanzo Show, fasimi vignî al to show a patî in direte, jo o pensi che l'esempli de mê sofference al podarès judâ tantis personis che a son te mê situazion infelice, e magari mi podarès judâ a cjatâ ancje une anime buine che mi vueli judâ... o ai tante bisugne di jutori... dispès o pensi a me stes/stesse come a un uciut indifês colât jù dal nît tal pantan, e ducj mi pestin cence inacuarzisi e nissun mi cjape sù e mi torne a meti tal nît...
«Jutori!
Ce sens aial vê scrit cheste robe achì? E par cui che le vedi lete, ce sens aial vût vêle lete? Ma tropis voltis aial sens vê let alc che si à apene let? Ogni volte che si lei alc bisugnarès subit dopo fâ une analisi svelte par capî se al à vût sens vê let ce che si à let. Si sparagnaressin tocs gjigants di vite straçade!
Scusaitmi par cheste parvence improvise di profonditât involontarie. Vuê, lu zuri, o varès tant volût jessi dome banâl. Ma nissun nol è perfet.

Roberto Quaglia