• El xe na sucesion de 50 + 1 létere mandà par via postal, una par una, cotidianamente, in busta cartàcea con regolar francobolo, al Maurizio Costanzo Show .
• El xe a tuti i efeti un libro inte la confesion e inte'l significato tradisional del tèrmine, un bon libro de ben 62.400 parołe.
• El xe un amaso de eletroni ben inpiantà sora Internet, indefinitamente a disposision de chiunque inte'l mondo el voja lèzerse le létere o el libro che elo ugualmente el xe.

Ho le mie bone rejon, la prima de le quali la xe che no ghe xe rejon vàlide par le quali gavaria da evitar de farlo. Asè scritori e editori i crede, a mio parer sensa fondamento, che méter un propio libro sora Internet el conporta pì perìcoli che vantaji. La tutela dei diriti de autor, la paranoia de subir plaji, e soratuto el timor che nissun el comprarìa in libreria un libro che po' trovar gratis sora Internet.

Io ritegno che tuti sti motivi i sia conpletamente sensa fondamento. Se trata de credense che no le ga nissuna rejon de esìster e che presto łe venarà scoà via, come prima o po' suzede a tuti i tabù che i ga perso el senso. Preconceti obsoleti che no i durarà a longo, anca parché mi intendo sfatarli imediatamente. La comerciabilità de un libro no la vien de fato par gnente intacà da la mesa "online" soa sora Internet. A chiunque un libro el interesa, poco serve tegnirlo inte'l propio computer indove la letura la ga da pasar par el monitor, la qual roba te ruvina i oci oltra a èser na facenda scomodìsima.

Un libro che piaze se lo vol posséder fisicamente, par podérlo sfojar con còmodo in poltrona, a leto, in autobus o sora la spiaja. Un libro ciapà da Internet, qualora no se intenda lèzerlo sora el monitor (ruvinàndose i oci), se lo podaria stanpar con na stanpante laser. Xe sertamente na solusion vàlida (e adiritura presiosa) par i casi in cui sto libro no'l esista in libreria (e alora l'autor de securo no'l perde nissuna véndita). Stanparselo in casa el devènta invese na facenda piutosto sioca e antieconòmica se'l libro in ojeto el xe comersialisà in libreria. Con queło che costa l'inciostro de na stanpante laser, ndar a comprar el libro in negosio o in edìcola no'l costa pì che stanparselo in casa, e a la fine te resta in man e in biblioteca un libro invese de un mucio de fojase sparse.

Superà el logo comun che de un libro in comersio se abasa le véndite se'l xe integralmente presente anca sora Internet, vedemo i vantaji che sta nova facenda la conporta:
Da ancuo e par tuto el futuro imaginàbile, Internet el fornise a chiunque la possibilità de dar prima na ociada al libro che se intende comprar, par véder se'l piaze. Quante volte fin a deso gavemo de fato comprà a scàtola ciusa un libro che po' el se ga rivelà un "paco"? La mesa in linea sora Internet la penalisarà soltanto - justamente - la véndita dei libri bruti, promovendo queła dei libri bei.

Il gradimento dei sibernauti el sarà in pì el paràmetro inprescindìbile par capir se un libro el interesa ai letori e in quala misura, prima de stabilirne publicasion sora la carta e relativa tiratura. Quante volte ancuo i editori i sbaja clamorosamente tiratura dei so volumi, sopravalutando o sotovalutando un tìtolo o l'altro? In futuro (o mejo, a partir da deso), l'editoria "online" la favorirà el lavoro de selesion dei editori. Questo in pì el conportarà el superamento del odierno, rituale, postulante e umiliante pelegrinajo dei aspiranti autori a la corte dei grandi editori che comunque inte'l 99% dei casi mai i lezarà i so manoscriti. I sarà de fato i editori a aver tuto l'interese de sercar sora Internet i libri online che i àbia riscoso inte'l siberspasio un tal suceso da rènder con certesa conveniente e remunerativa anca la publicasion lori sora la carta e in libreria.

In pì, la publicasion de un libro sora Internet la pol za in sé conportar ritorni econòmici. Vige za par el software la fòrmula del "shareware". Eła la pol aplicarse anca a la leteratura online. El pùblico che leze el xe in bona parte conposto da persone onoràbili, mediamente in grado de rispetar na ética condivisa. A sto argomento, a cui deso go qua soło asenà, la xe concretamente dedicà la pròsima pàgina.

Se infine par caso ritignési de èser finìi sora ste pàgine par sbaljo, esèndove in partensa proposto de sercar qualchedun altro o qualcos'altro, no ve angustiè tropo. L'eror el xe la quintesensa de la evolusion, la ciave de volta de ogni progreso. Sercar el xe inportante, ma qualunque individuo de meza sagesa el sa che a la fine se trova senpre qualcosa de inaspetà che de sòlito el interesa pì de quanto se gera drio sercar. Come dise Gigi Picetti, "Chi serca trova qualcos'altro". Questo el xe particolarmente vero sora Internet, che no a caso el xe un anbiente a rapidìsima evolusion. In pì, chiunque voaltri stavi eventualmente sercando, qua lo gavì idealmente trovà. No xelo forsi el Maurizio Costanzo Show el vero e ùnico Totem del Vilajo Italian? No xelo el Maurizio Costanzo Show el contenitor ideal dei miti moderni a cui tuti i dì in un modo o inte'l altro se riferimo, tanto che ndemo a sercarli anca sora Internet?

Pe dirla a la Negroponte, ogni dì che pasa la esistensa digital de ognun de noaltri la devènta pì efetiva e foriera de efeti de la esistensa material nostra.

Roberto Quaglia, 20 Aprile 1997