a
p r e v a l é n t e û z o
d i c i b e r n à u t i
"Câo Maurizio Costanzo Show..." o l'é o prìmmo travàggio letterâio Ùn e Trìn efetoòu in Itàlia. "Ùn", perché mì l'ò fæto 'na vòtta sôla. "Trìn", perché o l'à contenporaneaménte tréi fórme prinçipâli, ò identitæ:
- O l'é 'na sucesción de 50 + 1 lettie mandæ pe vîa postâle, ùnn-a pe ùnn-a, quotidianaménte, inte 'na bùsta cartàçea con regolâre francheból, a-o Maurizio Costanzo Show .
- O l'é a tûtti i efètti 'n lìbbro inta confeçión e into significâto tradiçionâle do tèrmine, 'n bèllo lìbbro de bén 62.400 paròlle.
- O l'é 'n amàsso de eletroìn bén inpiantòu in sce Internet, indefinîamente a dispoxiçión de chiunque into móndo o vêugge lézise e lettie ò o lìbbro ch'o l'é ugoalménte.
Perché ò decîzo de métte in sce Internet a dispoxiçión de tûtti sto mæ lìbbro?
Hò e mæ ótime raxoìn, a primma de-e quæ a l'é ch'no ghe són raxoìn vàlide pe-e quæ doviéiva evitâ de fâlo. Tànti scritôri e editôri crédan, a mæ avîzo infondataménte, ch'métte 'n seu lìbbro in sce Internet o compòrte ciù perìcoli che vantàggi. A tutéla di drîti d'autô, a paranöia de subî plàgi, e sorviatùtto o tîmô ch'nisciùn o accatiéiva inta librarîa 'n lìbbro ch'o pêu atrovâ gràtis in sce Internet.
Iò retêgno ch'tûtti sti motîvi segian conpletaménte infondæ. Se tràtta de credénse ch'no l'àn nisciùnn-a raxón de existe e ch'prèsto vegniàn sguassæ vîa, cómme prìmma ò dòppo o capìte a tûtti i tabù ch'àn pèrso de sénso. Preconcètti obsolêti ch'no dureràn a lóngo, ascì perché mì inténdo sfatâli immediataménte. A comerçiabilitæ de 'n lìbbro a no vêgne defæti pe ninte intaccâ da-a seu missa "online" in sce Internet. A chiunque 'n lìbbro o l'interèssa, pöco sèrve avéilo into seu computer dôve a letûa a dêve passâ pe-o monitor, a quæ cösa a te rovìnn-a i éuggi ôtre a èse 'na facénda scòmodíscima.
Un lìbbro ch'o piâxe ô se vêu posséde fixicaménte, pe podéiselo sfoggiâ con còmodo in poltrónn-a, a léto, in autobùs ò in sce-a spiàggia. 'N lìbbro prelevòu da Internet, into câxo che no ô se inténde léze in sciô monitor (rovinàndose i éuggi), ô se poriéiva stanpâ con 'na stanpànte laser. O l'é çèrtaménte 'na soluçión vàlida (e adiritûa preçiôza) pe-i câxi inte cûi tâle lìbbro o no existe inta librarîa (e alôa l'autô de seguo o no pèrde nisciùnn-a véndita). Stanpâselo in câza o devénta inveçe 'na facénda ciûtòsto tòsca e antieconòmica se o lìbbro in oggètto o l'é comerçializòu inta librarîa. Con quéllo ch'o cósta l'inciòstro de 'na stanpànte laser, anâse a accatâ o lìbbro into negòçio ò inte l'edìcola o no cósta de ciù ch'stanpâselo in câza, e a-a fìn te résta in màn e inta bibliotêca 'n lìbbro inveçe de 'n mùggio de fogiàssi spàrsci.
Superòu o lêugo comùn ch'de 'n lìbbro in comèrcio se abàssan e véndite se o l'é integralménte prezénte pûre in sce Internet, vedémmo i vantàggi ch'sta nêuva facénda a compòrta:
Da ancheu e pe tûtto o futûro imaginàbile, Internet o fornìsce a chiunque a poscibilitæ de dâ prìmma 'n'éugiâ a-o lìbbro ch'se inténde accatâ, pe védde se o piâxe. Quànte vòtte finn'òua émmo defæti accatòu a scàtoa serâ 'n lìbbro ch'dòppo o s'é rivelòu 'n "pàcco"? A missa in lìnea in sce Internet a penalizerâ sôlo - giustaménte - a véndita di lìbbri brùtti, promovéndo quélla di lìbbri bèlli.
Il gradiménto di cibernàuti o saiâ in ciù o paràmetro imprescindìbile pe conpréndce se 'n lìbbro o l'interèssa a-i lettôri e in quæ mezûa, prìmma de stabilîne publicaçión in sce càrta e relatîva tiratûa. Quànte vòtte ancheu i editôri sbàglian clamorozaménte tiratûa di seu volùmmi, sopravalutàndo ò sottovalutàndo 'n tîtolo ò l'âtro? In futûro (ò mêgio, a partî da òua), l'editorîa "online" a favoriâ o travàggio de seleçión di editôri. Questo in ciù o compoterâ o superaménto de l'odièrno, ritoâle, postulànte e umiliànte peregrinàggio di aspirànti autôri a-a córte di gréndi editôri ch'comùnque into 99% di câxi mâi lezeràn i seu manoscrîti. Saiàn defæti i editôri a avéi tûtto l'interèsse de çercâ in sce Internet i lìbbri online ch'l'àbbian riscòsso into ciberspàçio 'n tâle sucèsso da rénde con çertézza conveniénte e remuneratîva ascì a seu publicaçión in sce càrta e inta librarîa.
In ciù, a publicaçión de 'n lìbbro in sce Internet a pêu za in sénn-e compoteâ di ritórni econòmichi. O vîge za pe-o software a fòrmola de-o "shareware". Lê a pêu aplicâse ascì a-a letteratûa online. O pùblico ch'lêze o l'é in bónn-a pàrte conpòsto da persónne onorévoli, mediaménte in grâdo de rispetâ 'n'ètica condivîza. A tâle argoménto, a cûi òua ò chì sôlo açennòu, a l'é concretaménte dedicâ a pròscima pàgina.
Se a-a fìn pe câxo retegnésci de èse finîi in sce ste pàgine pe sbàglio, esséndove in parténsa propòsti de çercâ quarchedùn d'âtro ò quarcösa d'âtro, no ve angustiæ tròppo. L'eRôre o l'é a quintesénsa de l'evoluçión, a ciâve de vòrta de ògni progrèsso. Çercâ o l'é inpurtànte, ma quæ se sîa indivìdoo de mëza saviézza o sa ch'a-a fìn se atrêuva sénpre quarcösa de inaspetòu ch'de sòlito o l'interèssa de ciù de quànto se stâva çercàndo. Cómme o dîxe Gigi Picetti, "Chi o çèrca o atrêuva quarcösa d'âtro". Questo o l'é particolarménte vêo in sce Internet, ch'no a câxo o l'é 'n ambiénte a rapidíscima evoluçión. In ciù, chiunque vôtri stâvi eventoalménte çercàndo, chì ô gh'avéi idealménte atrovòu. No l'é fòrsci o Maurizio Costanzo Show o vêo e ùnico Totem do Villàggio Italiàn? No l'é o Maurizio Costanzo Show o contegnitô ideâle di mîti modèrni a-i quæ tûtti i giórni inte 'n mòddo ò inte l'âtro ne riferémmo, tànto ch'ghe ê andémmo a çercâ ascì in sce Internet?
Pe dîla a-a Negroponte, ògni giórno ch'o pàssa l'existénsa digitâle de ciascedùn de niâtri a devénta ciù efetîva e foriêra de efètti da nòstra existénsa materiâle.
Roberto Quaglia, 20 Avrî 1997
