Contributos e donatziones

CANTU DINARI SI PODET IMBIARE A ROBERTO QUAGLIA?

No b'at una chifra fissa. E no b'at unu lìmite. Carchi persones imbiant isceti calchi Euro a Roberto Quaglia, una chifra simbòlica. Prus a s'ispissu, chie cheret contribuire a sa vida de Roberto Quaglia lu faghet cun a su mancu 10 Euro - su costu de una pizza e un'aba minerale. Medas persones contribuint però fintzas cun chifras prus mannas. No est raru chi su contributu arribat fintzas a 100 Euro e prus. Persones de mannu valore ant contribuidu fintzas cun 1000 (milli) Euro. Chie tenet meda podet dare meda. Fintzas deghemìza Euro o chentumìza Euro diant èssere contributos gradèssidos. Dae su millione de Euro in susu si otenet unu certificadu ispetziale de autèntica benemerèntzia.

PROITE UNA PERSONA PODET IMBIARE DINARI A ROBERTO QUAGLIA?

Innantis de totu proite Internet lu permitit faghèndelu una operatzione curtza e simpre. B'at posca vàrias motivatziones chi indughent sas persones a imbiare dinari a Roberto Quaglia. Carchi imbiant dinari a Roberto Quaglia simpremente proite custu lis paret una bona idea. B'at carchi cosa, in Roberto Quaglia, chi faghet bènnere a issos gana de fàghere carchi cosa pro issu, ma, chene ischire pretzisamente ite, los indughet a li imbiare unu pagu de dinari, ischende chi issu l'at a gradèssere.

Àteras persones imbiant dinari a Roberto Quaglia proite lu retenent unu deretu issoro. Est unu deretu sacrosantu de ogni persone lìbera de seberare ite fàghere de su dinari suo. Custas persones l'ischint, e apretziende sas atividades de Roberto Quaglia cherent firmamente sustènnerlas cun unu contributu personale issoro. Preferint de gran'longa chi unu pagu de su dinari issoro andet a Roberto Quaglia in càmbiu de sos sòlitos paràsitos e ràpaces.

B'at persones chi imbiant dinari a Roberto Quaglia simpremente proite custu lis faghet istare mègius. A issos no lis interessat ischire proite ogni tantu regalant dinari a Roberto Quaglia. A issos lis interessat isceti chi custu lis faghet istare bene. Sa prima borta de sòlitu esìtant, dae chi no ant mai fatu carchi cosa de custu gènere, gasi, chene unu motivu pretzisu. Posca, belle chene bi pensare, incarcant su butone "Make a donation" e imbiant su primu dinari issoro. No si nde pentint mai. Est una cosa chi los faghet prus serenos. Ogni borta.

Carchi indivìduos imbiant dinari a Roberto Quaglia proite est unu status symbol. No totus podent francamente bantàresi de àere imbiadu dinari a Roberto Quaglia. Isceti chie l'at a beru fatu podet afirmare una cosa de custu gènere chene mai risicare de pèrdere sa cara. A custas persones lis praghet poder nàrrere: Deo so istadu unu de sos primos a imbiare dinari a Roberto Quaglia. Chie lis podet dare torto?

Àteras persones preferint imbiare dinari a Roberto Quaglia proite lu disprètziant. Carchi fintzas proite l'òdiant. Imbiare dinari a Roberto Quaglia est pro issos una manera de l'umiliare. Issos mustrant sa superioridade issoro respetu a Roberto Quaglia custringhèndelu a atzetare su dinari issoro. Est una isseberada fintzas custa, chi nemos tenet su deretu de biasimare.

Carchi no tenent bene craru in mente proite mai diant dèpere imbiare dinari a Roberto Quaglia. Pro custu, in antis de detzìdere, issos s'imàginant comente s'ant a sèntire a pustis de l'àere fatu. Est una sensatzione gradèssida. Comente totu sos praghères de sa vida, s'orìgine de sa sensatzione de praghere est misteriosa, ma custu la faghet isceti prus atraente. Imaginàresi comente si nd'at a sèntire a pustis de àere imbiadu su contributu suo est sa manera mègius pro ischire cun tzertesa si e cantu dinari si nde sentit de chèrrere imbiare a Roberto Quaglia.

*Imbiare dinari a Roberto Quaglia est una de sas maneras possìbiles de interagire cun issu. Sa vida est unu fenòmenu biològicu e ispirituale fatu de relatziones e transatziones de energia tra sos indivìduos. Carchi formas de relatzione sunt prus cumplessas e elegantes, àteras sunt prus simpres e contàbiles. S'amore est de seguru su contributu prus eclatante chi podimus ofèrrere a chie nos praghet, ma no semper issu arribat a destinatzione e produit sos efetos suos. Su dinari no at a èssere prènnidu de sos matessi "cantos" de puru ispìritu, tanti est chi a su mancu semus seguros chi arribat a destinatzione (mescamente impreende Paypal) e produit a beru sos umiles efetos suos. Proade pro crèere.

Si cherides cuntatare custu mutante
chi cun su tempus càmbiat sa cara sua,
ischides comente fàghere.

Si no l'ischides, CRICADE INOGHE

Si no ischides comente fàghere, lassade pèrdere

Ùrtima modìfica, 23 de santugaine 2003

Totu sos testos e sas imàgines cuntènnidos in "Astounding Quagliaspace", podent èssere leghidos, abbaidados, adorados, iscarrigados in su computer, imprentados e afissados in sa càmera pròpia, e copiados chene lìmite, SCETE PRO IMPREU PERSONALE. Totu sos testos e sas illustratziones sunt propriedade de Roberto Quaglia e no podent èssere impreados intreos o in parte chene permissu. Su progetu gràficu e sos cumponentes gràficos de custas pàginas sunt propriedade riservada de Roberto Quaglia. Nudda de custu podet èssere postu in bèndida o comunque cummertzializadu a peruna manera chene permissu antis.