Contribûts e donazions

TROP BÊZ SI PUÊ MANDÂ A ROBERTO QUAGLIA?

No'nd è une cifre fisse. E no'nd è un limit. Cualchi persone e mande dome cualchi Euro a Roberto Quaglia, une cifre simboliche. Plui tipicamentri, chi che al vûl contribuî a la vite di Roberto Quaglia lu fâs cun almancul 10 Euro - il cost di une pizze e une minerâl. Une vore di personis a contribuissin però ancje cun cifris plui grandis. Nol è râr che il contribût al rivi ancje a 100 Euro e plui. Personis di grant valôr a àn contribuît ancje cun 1000 (mil) Euro. Chi che al à une vore al pò dâ une vore. Ancje diesemil Euro o centmil Euro a saressin contribûts benvignûts. Dal milion di Euro in sù si oten un speciâl certificât di autentiche benemerence.

PARCÈ CHE UNE PERSONE E PUÊ MANDÂ BÊZ A ROBERTO QUAGLIA?

Prin di dut parcè che Internet lu permet, fasintlu une operazion curte e semplice. A son po' variis motivazions che a inducin lis personis a mandâ bêz a Roberto Quaglia. Cualchidun al mande bêz a Roberto Quaglia semplicimentri parcè che chest ur semee une buine idee. Al è alc, in Roberto Quaglia, che ur fâs vignî voie di fâ alc par lui, ma, no savint di precîs ce, ju induc a mandâi un pôc di bêz, savint che lui al gradirà.

Altris personis a mandin bêz a Roberto Quaglia parcè che lu ritegnin un lôr dirit. Al è un dirit sacrosant di ogni persone libare di sielgi ce fâ dai siei bêz. Chestis personis lu san, e aprezant lis ativitâts di Roberto Quaglia a intindin fermamentri di sostignîlis cuntun lôr contribût personâl. A preferissin di grancj lungjis che un pôc dai lôr bêz al ledi a Roberto Quaglia invezit che ai solits parassits e avoltois.

A son personis che a mandin bêz a Roberto Quaglia semplicimentri parcè che chest ju fâs stâ miôr. A lôr no ur interesse savê parcè che ogni tant a regalin bêz a Roberto Quaglia. A lôr ur interesse dome che chest ju fâs stâ ben. La prime volte di solit a stentin, dât che no àn mai fat alc dal gjenar, cussì, cence un motîf precîs. Po', cuasi cence pensâi, a frachin sul boton "Make a donation" e a mandin i lôr prins bêz. No si'nt pentissin mai. E je une robe che ju rint plui serens. Ogni volte.

Cualchi individui al mande bêz a Roberto Quaglia parcè che al è un status symbol. No ducj a puedin francamentri vantâsi di vê mandât bêz a Roberto Quaglia. Dome chi che lu à pardabon fat al pò diclarâ une robe dal gjenar cence rîs cualchi dì di pierdi la muse. A chestis personis ur plâs podê dî: Jo o soi stât un dai prins a mandâ bêz a Roberto Quaglia. Cui ur pò dâ tuart?

Altris personis a preferissin mandâ bêz a Roberto Quaglia parcè che lu disprezin. Cualchidun ancje parcè che lu odein. Mandâ bêz a Roberto Quaglia al è par lôr un mût di umiliâlu. Lôr a dimostrin la lôr superioritât rispiet a Roberto Quaglia sfuarçantlu a acetâ i lôr bêz. E je une sielte ancje cheste, che nissun al à il dirit di biasimâ.

Cualchidun nol à ben clâr in mins parcè che mai al varès di mandâ bêz a Roberto Quaglia. Par chest, prin di decidi, a imaginin cemût che si sintaran dopo vêlu fat. E je une sensazion gustose. Come ducj i plasês de vite, la orizin de sensazion di plasê e je misteriose, ma chest le rint dome plui atraent. Imaginâsi cemût che si sintarà dopo vê mandât il propri contribût al è il mût miôr par savê cun sigurece se e trop bêz si sint di volê mandâ a Roberto Quaglia.

*Mandâ bêz a Roberto Quaglia al è un dai pussibii mûts di interagjî cun lui. La vite e je un fenomen biologjic e spirituâl fat di relazions e transazions di energjie tra i individus. Cualchi forme di relazion e je plui complesse e elegante, altris a son plui semplicis e contabilis. L'amôr al è cence dubi il contribût plui eclatant che o podìn ufrî a chi che nus plâs, ma no simpri al rive a destinazion e al produs i siei efiets. I bêz no saran cjamâts dai stes "cuant" di pûr spirt, dut câs almancul o sin sigûrs che a rivin a destinazion (soredut doprant Paypal) e a produsin pardabon i lôr umil efiets. Provâ par crodi.

Se o volês contatâ chest mutant
che cul timp e cambie la sô muse,
o savês cemût fâ.

Se no lu savês, FASÊT CLIC CHI

Se no savês cemût fâ, lassait stâ

Ultime modifiche, 23 otubar 2003

Ducj i tescj e lis imagjinis contignûts in "Astounding Quagliaspace", a puedin jessi lets, cjalâts, adorâts, discjariâts sul computer, stampâts e picjâts te propie cjamarute, e copiâts cence limits, DOME PAR ÛS PERSONÂL. Ducj i tescj e lis ilustrazions a son proprietât di Roberto Quaglia e no puedin jessi doprâts ducj cuancj o in part cence permès. Il proiet grafic e lis componentis grafichis di chestis pagjinis a son proprietât riservade di Roberto Quaglia. Nuie di chest al pò jessi metût in vendite o comunque comercializât a nissun titul cence permès prin.