Contribót e donaziån

QUANT SÅLD AS PÅ MANDÈR A ROBERTO QUAGLIA?

An ai é brîṡa una zîfra fésa. E an ai é brîṡa un lémit. Quèlch persåna i mânden såul quèlch Euro a Roberto Quaglia, una zîfra simbålica. Pió tîpicamänt, chi vål contribuîr ala vétta ed Roberto Quaglia al fa con almänc 10 Euro - al còst ed una pizza e una minerèl. Tanti persåni i contribuéssen però anc con zîfri pió grandi. An é brîṡa râr ch'al contribót al ariva anc a 100 Euro e pió. Persåni ed grand valåur i an contribué anc con 1000 (méll) Euro. Chi à tant al på dèr tant. Anc dîṡméla Euro o zäntméla Euro i srévven contribót gradé. Dal miliån ed Euro in só as otén un spezièl certifichè ed autêntica benemeränza.

PARCHÉ UNA PERSÅNA PÅ MANDÈR DI SÅLD A ROBERTO QUAGLIA?

Prémma ed tótt parché Internet al al permåt rendändla un'operaziån curta e sänzz. Ai é dåp vâri motivaziån ch'i indûṡen äli persåni a mandèr di såld a Roberto Quaglia. Quèlchidón i mânden di såld a Roberto Quaglia sänplizemänt parché quasst ai pèr una bôna idê. Ai é quèl, in Roberto Quaglia, ch'al fa gnîr a låur vòia ed fèr quèl par ló, mo, an savänd eṡatamänt csa, i induṡ a mandèrgh un påch ed såld, savänd ch'al gradirà.

Ètri persåni i mânden di såld a Roberto Quaglia parché al ritånen un så dirétt. L'é un dirétt sacrosànt ed ògni persåna lébbera ed zêrner csa fèr dal så såld. Sti persåni al san, e apreżänd äli ativitè ed Roberto Quaglia i intänden fermamänt ed sustgnîrli con un så contribót personèl. I preferéssen ed gran lónga ch'un påch dal så såld al vâga a Roberto Quaglia invêzi che ai sòlit parasît e avultûr.

Ai é persåni ch'i mânden di såld a Roberto Quaglia sänplizemänt parché quasst al i fa stèr méi. A låur an ai interèsa brîṡa savair parché ògni tant i regâlen di såld a Roberto Quaglia. A låur ai interèsa såul che quasst al i fa stèr bän. La prémma vôlta ed sòlit i eṡîten, dâto ch'an i an mâi fât quèl dal gêner, acsé, sänza un motîv precîṡ. Dåp, quèṡi sänza pinsèregh, i prêmen in vatta al butån "Make a donation" e i mânden al så prémm såld. An s in pintéssen mâi. L'é un quèl ch'al i ränd pió serên. Ògni vôlta.

Quèlch individui i mânden di såld a Roberto Quaglia parché l'é un status symbol. An tótt i pålen franchamänt vantères d'avair mandè di såld a Roberto Quaglia. Såul chi l'à dabån fât al på dîr un quèl dal gêner sänza un dé rischièr ed pêrder la fâza. A sti persåni ai pièṡ psair dîr: Mé a sån stè ón di prémm a mandèr di såld a Roberto Quaglia. Chi på dèr a låur tôrt?

Ètri persåni i preferéssen mandèr di såld a Roberto Quaglia parché al disprèżen. Quèlchidón anc parché al ådien. Mandèr di såld a Roberto Quaglia l'é par låur un môd ed umilièrel. Låur i dimostren la så superioritè rispèt a Roberto Quaglia custringändel a azetèr al så såld. L'é una zêlta anc quassta, ch'inción à al dirétt ed biasimèr.

Quèlchidón an an brîṡa bän cièr in mänt parché mâi i duvréven mandèr di såld a Roberto Quaglia. Par quasst, prémma ed decîder, i imâginen cme i s sintiràn dåp avairel fât. L'é una sensaziån gradêvvol. Cme tótt i piaṡair dla vétta, l'orîgin dla sensaziån ed piaṡair l'é misteriåuṡa, mo quasst la ränd såul pió atraänta. Imaginères cme as s sintirà dåp avair mandè al så contribót l'é al môd miåur par savair con certèza se e quant såld as s sänt ed vlair mandèr a Roberto Quaglia.

*Mandèr di såld a Roberto Quaglia l'é ón di possébbil môd ed interagîr con ló. La vétta l'é un fenåmen biolågich e spirituèl fât ed relaziån e transaziån ed energî tra i individui. Quèlch fårmi ed relaziån i én pió compläs e elegànti, ètri i én pió sänzi e contâbil. L'amåur l'é indóbbiamänt al contribót pió eclatànt ch'a psän ufrîr a chi s pièṡ, mo an sänper al ariva a destinaziån e al produṡ i sû efèt. Al såld an srà brîṡa prêggn di médeṡim "quant" ed pûr spîrit, tótavî almänc a sän sicûr ch'al ariva a destinaziån (såver tótt druvänd Paypal) e al produṡ efetivamänt i sû pûr ómil efèt. Pruvèr par crédder.

S'a vlî cuntatèr st'mutànt
ch'int al tänp al cambia la så fâza,
a savî cme fèr.

S'an al savî brîṡa, CLICHÈ QUÉ

S'an savî brîṡa cme fèr, lasè pêrder

Ûltma modîfica, 23 utåber 2003

Tótt i tèst e äli imâgini cuntgnó in "Astounding Quagliaspace", i pålen èser lèt, guardè, adurè, scarichè in vatta al computer, stampè e tachè int la så cambratta, e cupiè sänza lémit, SÅUL PAR ÛṠ PERSONÈL. Tótt i tèst e äli ilustraziån i én propietè ed Roberto Quaglia e an pålen brîṡa èser druvè intîr o in pèrt sänza autorizaziån. Al progèt grâfich e i cumponänt grâfich ed sti pâgini i én propietè riservè ed Roberto Quaglia. Gnínt ed quasst al på èser méss in vàndita o comónqued cumerzializè a inción titol sänza previa autorizaziån.