Contribùti e donasion

QUANTI SCHEI SE PODE MANDAR A ROBERTO QUAGLIA?

No ghe xe na sifra fissa. E no ghe xe un lìmite. Qualche persona la manda soło qualche Euro a Roberto Quaglia, na sifra simbòlica. Pì tìpicamente, chi vol contribuir a la vita de Roberto Quaglia el lo fa con almanco 10 Euro - el costo de na pissa e na minerale. Tante persone contribuisse anca con sifre pì grose. No xe raro che el contribùto el riva anca a 100 Euro e pì. Persone de gran valor le ga contribuì anca con 1000 (mile) Euro. Chi ga tanto pol dar tanto. Anca diesemile Euro o sentomile Euro i saria contribùti gradìi. Dal milion de Euro in su se ciapa un speciale sertificato de autèntica benemerensa.

PARCHÉ NA PERSONA PODE MANDAR SCHEI A ROBERTO QUAGLIA?

Prima de tuto parché Internet el lo permete rendéndola na operasion curta e sénplice. Ghe xe po' varie motivasion che le indùse le persone a mandar schei a Roberto Quaglia. Qualcuni i manda schei a Roberto Quaglia sénplicemente parché questo el ghe par na bona idea. Ghe xe qualcosa, in Roberto Quaglia, che ghe fa vegnir voja de far qualcosa par elo, ma, no savendo esatamente cosa, li indùse a mandarghe un fià de schei, savendo che elo el gradirà.

Altre persone le manda schei a Roberto Quaglia parché le lo ritien un so dirito. El xe un dirito sacrosanto de ogni persona lìbera de sernir cosa far dei so schei. Ste persone le lo sa, e aprezando le ativi de Roberto Quaglia le vol fermamente sostegnirle con un contribùto personal. Le preferisse de gran longa che un fià dei so schei el vaga a Roberto Quaglia invese che ai sòliti parassiti e avoltoi.

Ghe xe persone che le manda schei a Roberto Quaglia sénplicemente parché questo li fa star mèjo. A lori no ghe interesa saver parché ogni tanto i regala schei a Roberto Quaglia. A lori ghe interesa soło che questo li fa star ben. La prima volta de sòlito i esita, dato che no i ga mai fato qualcosa del genere, cussì, sensa un motivo preciso. Po', quasi sensa pensarghe, i struca el boton "Make a donation" e i manda i so primi schei. No i se ne pentisse mai. El xe na roba che li rende pì sereni. Ogni volta.

Qualche indivìduo el manda schei a Roberto Quaglia parché el xe un status symbol. No tuti i pol francamente vantarse de aver mandà schei a Roberto Quaglia. Soło chi lo ga davero fato el pol dir na roba del genere sensa un dì risciar de perder la fàcia. A ste persone ghe piaze poder dir: Mi son stà un dei primi a mandar schei a Roberto Quaglia. Chi ghe pol dar torto?

Altre persone le preferisse mandar schei a Roberto Quaglia parché le lo disprèsa. Qualcuni anca parché le lo òdia. Mandar schei a Roberto Quaglia el xe par lori un modo de umiliarlo. Lori i dimostra la so superiorità rispeto a Roberto Quaglia costrenzéndolo a acetar i so schei. El xe na sielta anca questa, che nissun ga el dirito de biasimar.

Qualcuni no i ga ben ciaro in mente parché mai i dovaria mandar schei a Roberto Quaglia. Par questo, prima de desìder, lori i se imàgina come che i se sentirà dopo averlo fato. El xe na sensasion piasévole. Come tuti i piaseri de la vita, l'orìgine de la sensasion de piaser la xe misteriosa, ma questo la rende soło pì atraente. Imaginarse come che se se sentirà dopo aver mandà el so contribùto el xe el modo mèjo par saver con sertesa se e quanti schei se sente de voler mandar a Roberto Quaglia.

*Mandar schei a Roberto Quaglia el xe uno dei possìbili modi de interagir con elo. La vita la xe un fenòmeno biològico e spirituale fato de relasion e transasion de energia tra i indivìdui. Serte forme de relasion le xe pì conplese e eleganti, altre le xe pì sénplici e contàbili. L'amor el xe indubiamente el contribùto pì eclatante che podemo ofrir a chi ne piaze, ma no senpre el riva a destinasion e el produse i so efeti. I schei no i sarà pregni dei medèsimi "quanti" de puro spìrito, todavia almanco semo sicuri che i riva a destinasion (soratuto doparando Paypal) e i produse davero i so umili efeti. Provar par créder.

Se volè contatar sto mutante
che col tempo el càmbia la so fàcia,
savè come far.

Se no'l savè, CLICHÈ QUA

Se no savè come far, lassè perder

Ùltima mòdifica, 23 otobre 2003

Tuti i testi e le imàgini contegnùi in "Astounding Quagliaspace", i pol èser leti, vardà, adorà, scargà su'l computer, stanpà e picà inte la propia caméra, e copià sensa lìmiti, SOŁO PAR USO PERSONAL. Tuti i testi e le ilustrasion i xe proprietà de Roberto Quaglia e no i pol èser doparà tuti quanti o in parte sensa permesso. El progeto gràfico e le conponenti gràfiche de ste pàgine i xe proprietà reservà de Roberto Quaglia. Gnente de questo el pol èser messo in véndita o comunque comersializà a nissun tìtolo sensa permesso prima.