è l’Alessandro Testa ca è dintra di mia ca scrivirà li paroli ca siguirannu, pirchì n’àbbili truccu mi cunsìgghia di accèdiri direttamenti ê procèduri di elaburazioni dû sò ciriveddu.
Vi scrivu ntâ mòltiplici visti di l’idolatra ca s’accosta umirmenti ô sò totem, locuplitannu la sò stolta consapevolizza cî illusori vantaggi ca sta súpplica cartacea purtirìa â sò consapevolizza televisivamenti minusabbienti, e puru sutta li spogghi mentitrici dû cumpilaturi mercenariu di centoni illittirati a usu di manichini ossobuchivori impalati ntâ stòlida adurazioni dî sò purzini inamidati; vieppiù mi mentu memoria fotustàtica dû canturi dû pasticciu e dû gorgonzola ca rancidìsci dimènticu ’n stantii cridenzi meneghini, l’inarrivabbili duluranti Carlo Emilio; e menu di tutti mi dichiaru lu vostru únchi servu e spittaturi Alessandro Testa.
Ca la natura dâ improvvisazioni, dâ ludata e vitupirata improvvisazioni ca infarcìsci li dotti sbrodolanti dissirtazioni dî esàngui figghi dû De Sanctis, dî epìguni di nu Getto rinverdutu ntô pàllidu anguicrinitu di Ferrara sia materia ignota ê cchiù, a magghiuri ragiuni ’n nu munnu ca si prostra aduranti ô fiticciu dâ iperspicializzazioni e dâ canuscenza superscientìfica, ca la natura dâ improvvisazioni, Vi dicia, giaccia ntô cchiù completu abbannunu suvirchiata dû straputeri dâ Fòrmula, dû Palinsestu, ’n estrema anàlisi dâ pritisa tutta alfieriana di possèdiri nu significanti pi ogni significatu, invirirìa lu dogma hegelianu dû "tutto ciò che è reale..." e accussì via dicennu; ma ca darreri sta pritisa di duminiu supra l’universu munnu, sta vuluntà di putenza nica nica, cchiù simìli ô "volli, volli, fortissimamente volli" di l’adýlteru fulvu ca no ô infantili stupuri dû miti superomu si cela ’na sustanziali ’ncomprinsioni dâ natura dî cosi è ’na notizia ca ha avutu scarsa circulazioni ntô últimu paru di sèculi, fatta fòrsi eccezzioni pi pochi Untermenschen niri praticanti lu strittu e inagevuli sinteru dû blues.
Assistìmi ora, multiputenti totem ca aspèrgi supra lu pòpulu insipienti li sò catòdichi binidizioni gnòstichi, fa sì ca cû santu ausìliu dâ tò sapienza prucèdenti ’n únicu, ininterruttu effluviu di chidd’Unu lu cui nomu quadrisillabu la mia lingua prufana nun è degna di mintuvari, la mia scienza limitata e piccatrici possa attìngiri a ’na scintilla di chidda luci ca dâ eternità promana dâ única fonti, dû únicu beni, dû únicu vaseddu di ogni canuscenza affinchì la mia lingua e lu miu terminali pòzzanu ardiri di captari pâ Sò magghiuri gloria ’na scintilla di verità di dunari, novellu Prometeo, ê sò figghi ca giàcinu ntâ oscurità. Accussì sia.
A nu certu puntu, dicu ju, cu’ t’arriva? Nu spilunguni cu almenu tri parmi di coddu, dicu ju, unu ca susteni ca chiddu ca si vidi è tutta ’na fandonìa, e cosi dû gèniri.
Chiddu ddà dici ca chiddu ca videmu, santa polenta , nun è mica veru ma è tutta ’na immaginazioni dî occhi, o cosi accussì. Cosi di nun crèdiri, dicu ju.
Ma chi ci trasi chistu câ improvvisazioni, diciràiti vuiautri, mei picciriddi amici? Chi ci trasi la natura dâ realtà cu nu secunnariu procidimentu artìsticu ma chi dicu artìsticu di pantomima, di avanspittacolu, di circu!
Mentri lu figghiu di sti tempi illuminati e prugressivi rimastica ’n purtruna cuncetti ormai convuluti ’n boli di enzimi ca già di tempu hannu esplicatu la sò lenta sebbeni inarristabbili òpira digistiva degradannu ogni cosa ’n ’na opaca pappa maleoduranti ca àutru nun aspetta ca di essiri espulsa pî orifízi ca la natura, matrigna ma sapienti, ha predispostu acconciamenti â bisogna, àutri, menu sidentariu, s’accingi a estràiri dû magma informi di l’inditirminatu, novellu demiurgu, la Splendenti Gemma dû Novu.
Ma chi gemma-splendenti-dû-novu sarrìa, si già fussi canusciuta?
Sàuta accussì â tò perspicaci cuscienza, amicu litturi, comu ogni òpira di vera scuperta sia possibbili sulu attraversu lu nòbbili strumentu dâ improvvisazioni.
Ricetta pi ’na bona improvvisazioni:
1) Ogni vota ca trovi quarchi cosa ca ti pari degnu di essiri tinutu, abbannunalu sùbbitu.
2) Diffida di tuttu chiddu ca arrinesci â prima
3) Diffida di tuttu chiddu ca nun arrinesci â prima
4) Nun c’è giustu
5) Nun c’è sbagghiatu
6) Quannu nun sai comu fari, improvvisa
Si mantinirài la tò carma quannu tutti attornu a tia l’avirannu persa
Si accettirài la riuscita e lu fallimentu dî toi improvvisazioni cû stissu surrisu supra li labbra
Si ’na vota tirminata la tò improvvisazioni nun la tesaurizzirài, scurdannula pi ti minari ’n nu novu travagghiu
Allura, figghiu, sarrài n’improvvisaturi.

Alessandro Testa