Te spedissi incoeu la inscì ditta mia ültima fadiga (in realtà l'è tütt'alter che ültima, sota tütt i pont de vista: del mè pont de vista, defatt, la mia ültima fadiga l'è in sto istant el gest de scrìvet sta lettera). Te spedissi el mè ültim liber romen, che me piasaría vegnì a fà conoss in la toa trasmission, o mej, in la trasmission che tì te seet. Come te podaré vedè, el mè ültim liber romen l'è romen in tütt e per tütt. Soratütt i parol de cui l'è tütt pien hinn rigorosament romen. I fras anca, inscì che legend i parol tütt in fila gh'hann anca on òtim senso compiüü tütt romen. Anca el romanz l'è romen. I fras romen, defatt, hinn ordinaa in ona speciala sequenza second còdes internazional adotaa de tütt i paes ocidental o lievement oriental, per cui legèndoi second sta sequenza standard se accede al romanz che i fras costitüissen. Romanz tütt romen, apunt. Poeu ghe n'è la carta, romena anca lee e se vede, tìpicament ricoverta de inciòster tìpicament romen anca lü.
Car Maurizio Costanzo Show, te spedissi inscì el mè ültim liber romen, che el va senza dübi faa conoss in la trasmission che tì te seet. El fatt che el sia on liber romen, aparentement on svantagg, in Italia, el se revela inveci, a ona anàlisi apena pussee atenta, on grandìssim vantagg. Tant per començà l'è esòterich e original. Qual italian giamò el gh'ha in la soa libreria on liber inscì intensament romen, con parol, fras, romanz, carta e inciòster romen? L'è inscì el mè liber romen ona novità assolüta in del nòster paes, süscettìbil inscì de incontrà on grandìssim sücess. El mè liber romen el gh'ha poeu on second vantagg: l'è staa scrivüü de on italian, ovèro de mì. I italian tègnen a apprezzà i alter italian, perché ghe regòrden che hinn italian anca lor, el che, del pont de vista de on normal italian, el appar come ona fortüna e on vantagg. Insomma, el mè liber romen el adescarà i italian anca con on poo de san nazionalism perché, nonostant el sia romen, el mèrit de vess staa scrivüü l'è tütt de on italian come lor.
Poeu ghe n'è el discors prezz, che l'è romen anca lü. Sto mè liber romen el costa domà 2800 lir. Anca essèndoghen dent bon 100.000 parol romen, el sò cost, essend romen, el pö vegnì contegnüü al prezz de düü cafè, 2800 lir. Chi mai el se comprarìa minga on mìtich liber romen al prezz de on cafè italian?
Ma el vantagg principal del mè liber romen l'è che, essend tütt scrivüü in romen, el comprador italian el gh'ha minga la mìnima possibilità de lèngel. Quest l'è quell che farà del mè liber romen el sücess editorial de l'ann. Se còmpren defatt minga i liber per lèngei, come el famos "Pendolo di Foucault" de Umberto Eco el dimostra (nissün de quii che l'hann compraa o ricevüü in regal mai el l'ha legiüü). El mè liber romen, fornend al sò mìser prezz de 2800 lir la garanzia de podè minga vegnì legiüü, el ofr al comprador la garanzia totala de minga sofrì in fütür de nissün senso de colpa per avègh minga legiüü el liber. El capiss la convenienza, car Maurizio Costanzo Show? Comprà on liber de Umberto Eco per lèngel minga el costa pussee de 30.000 lir e ghe n'è l'efett colateral del pussee o men vagh senso de colpa per el fatt che se leng minga. El mè liber romen el ofr el stess servizi a 2800 lir, includend in del prezz on innegàbil esotism e ona azion protettiva contra el logorio di siens de colpa.
Epoeu ghe n'è el vantagg de fà bela figüra con eventüai ospiti romen. A tücc, prima o dopo in la vita, capita de avègh ospiti in cà. In sta època de gran migrazion se se imbatt semper pussee spess in quaic forestee. La pussee part di voeult se tratta de on türista todesch o marochin o senegalés. Se a on ospit todesch ofrii ona birra todesca, ghe farii cert piasè ma el stüparii minga; vivom defatt in del mercaa comün. Se a l'ospit senegalés mostrii orgoglios el voster elefantin de legn negher senegalés no ghe farii cert nissün piasè (se avìssev minga giamò avüü l'elefantin ve l'avaría vendüü lü) e nanca el stüparii; quasi tütt i italian gh'hann oramai in cà on elefantin senegalés. Ma se ve capitass de avègh on ospit romen, ecco che el voster investiment de 2800 lir improvvisament el ve früttarìa l'adizional prestigi de la persòna cosmopòlita e colta a livell internazional. Poeu tra l'alter el romanz contegnüü in del liber l'è assee bell e el voster ospit romen el ve 'l confermarìa, per la vòstra pussee granda sodisfazion de avèghel a sò temp compraa.
El capiss, inscì, car Maurizio Costanzo Show, perché l'è inscì important che tì te t'adòperet a fà conoss el mè liber romen?
La soa giamò notèvol pregevolezza l'è infin resa sublima de on aparent paradòss: el mè liber romen el esist in romen, ma minga in italian, anca avèndol mì regolarment scrivüü in italian. Sto fatt el rend l'oggett che t'hoo adess inviaa pien de significaa ulterior che a mì sfüjen, ma che inscì el faran minga a tì, forier anca de quisit emblemàtich o altra sìmil mercanzia de pùblica ütilità. El paradòss l'è ovviament domà aparent, perché anca essend minga esistent del mè liber romen el corrispondent clone italian, ne esist tuttavia el manoscritt. La natüra püramént aparenta del paradòss l'è d'alter cant risarcida de la esistenza, dedree al esempi del mè liber romen che t'hoo inviaa, de on fenòmen che el me rigoarda assee pussee vast e clamoros de sto sìngol cas. Nissüna di mè oeuvr maggior l'è defatt edida in Italia, ma quasi tütt, tra poch, el saran a l'ester. Alter òtim liber illegìbil, inscì, per i comprador italian de liber, che colezionand in di sò salott i mè oeuvr in esili podaran dàss ona spruzzada de cultüra internazionalista, per la gioia di sò eventüai ospiti forestee, e el rispett e l'invidia de quii italian. .

Roberto Quaglia