Delos 49: Il difìcil ritor dal siôr Sheckley

‹ Indiç dal sît · Home dal museu · repert restaurât

di
Roberto Quaglia

Il difficile ritorno del signor Sheckley

Cheste e je stade la istât di Robert Sheckley. Il grant scritôr al è vignût in Italie, gracie a la iniziative e al impegn di Roberto Quaglia che lu à invidât, curât e puartât ator par un mês intîr in Italie e in Europe. Cui che al à vût ocasion di viodilu al è restât entusiast - viodêso in chest numar i coments di Vittorio Curtoni in Memories of green e di Roberto Genovesi in Interazioni - e o vin decidût di proponius cheste cronache de esperience, un pôc particolâr (no podeve jessi altramentri, jessint scrite di Quaglia) e une vore fassinante (come parsore).

Rivade in Italie



La rivade a Linate

Milan Linate, miercus 21 di lui 1999, oris 14 e 30. A van e a vegnin un grum di avions, ma dome un al è chel impuartant. Al aeropuart o sin lâts in trê: Max Morando, Daniele Vecchi e il sotscrit. A lis oris 15 e alc l'unic avion impuartant di chê dì nus varès di meti tra lis mans l'unic Robert Sheckley dal univiers che o cognossìn. Al è dificil crodilu, ancje se une lungje sequence di events improbabii e à fat deventâ cheste pussibilitât benedetamentri probabile. Agns e agns di corispondence vie email, tentatîfs prime falîts dal Câs, e finalmentri une mirabile geometrie di coincidencis favorevui. E ve duncje il improbabil deventâ inevitabil e nô li a Linate a fremaçâ de nestre miôr emozion. Al davuelç l'avion che o spietìn. Si preparìn al incuintri e pôc dopo o viodìn i passizîrs scori denant di nô. Cui di lôr al sarà Sheckley? No savìn ben ce muse che al à. Te memorie, dome il ricuart di cualchi foto vecje di decenis. Al bastarà a ricognossilu? O osservìn cun atenzion dutis lis musis che nus passin denant. E cussì fasint o deventìn planc planc vitime di chê stesse Deformazion Metaforiche che intun so libri Sheckley al à inventât. O tacìn a alucinâ Sheckley in ogni om cence compagnie di une cierte etât. Adiriture o finìn par lâ daûr di cualchidun, cirint di fânus notâ, sperant che si trasformin tal Sheckley che lôr evidentementri no son. Al passe il timp e cuasi ducj i passizîrs a son passâts par debant tal nestri crivel. La Deformazion Metaforiche e strenç, e ancje un vecjo gjaponês par cualchi moment nus par podê jessi il Nestri. Podopo i passizîrs a finissin, e ancje il timp di Daniele, che al à di tornâ in ufici. O restìn Max e jo, e la uniche robe che o podìn fâ e je spietâ l'avion daspò.
L'avion impuartant si palese jessi chel des 18 e 30. E finalmentri, dut intun colp, Sheckley al è cun nô. Al à intor bermuda e savatis e si puarte daûr dome une grande borse, un sacut, e une gjachete elegante che le ten in man. Par dut il viaç, tal mês daspò, no le metarà nancje une volte.
Dôs oris dopo o sin a Zenue, dulà che Sheckley al è ospit di Maurizio Frizziero (Popi pai amîs), te sô biele cjase denant de plajute di Boccadasse, forsit in assolût il cjanton plui suggestîf di Zenue. Li, denant di une taule imbandide di persut e melon, o passìn une splendide serade a discuti, soredut in merit ae improbabilitât di ce che nus sta capitant. Si rindìn subit cont, Popi e jo, che Sheckley culì nol è, ni al podarès mai jessi. Cun nô culì al è dome Robert, e Robert al è vêr e al esist in cjar e vues e al è culì cun nô, intant che Sheckley al esist tai nestris cjâfs come rapresentazion. Rapresentazion de rapresentazion, al pignolarà daspò Mario. Comuncue un mit, un archetip, une entitât astrate che i nestris sens no podaran cognossi mai, tant che si lu vin imagjinât tal passât. Par praticitât lu clamarai distès Sheckley, tal sighì di chest gno rezont. Ma savêt che in realtât jo o starai pensant a Robert, parcè che al è lui che o ai cognossût.

Joibe 22 di lui e je une zornade di aclimatazion. Al fâs cjalt une vore, al è un jet lag di superâ, o decidìn di no strachâsi. Ce che no nus impedìs di gjoldisi une splendide serade tal locâl di Enrico Reboscio, ristoradôr e estimadôr di Sheckley, che nus ufrìs une largje cjarielade di tipichis specialitâts gastronomichis liguris.



	Ae librarie Fahrenheit 451

Vinars 23 di lui o sin a Piacenza. Nus à invidât a gustâ Vittorio Curtoni, une persone delizjose, in plui dai siei meretis tal cjamp de fantasience taliane. E il gustâ, cusinât di sô femine Lucia, al è decidudementri ae altece des circostancis. Dopo mangjât, Sheckley si concêt un polsut sul divan. Plui tart, Vittorio al declararà che al varès fat picjâ une tarie parsore dal divan cun parsore incidût: Culì al à durmît Robert Sheckley. Ce che nus puartarà daspò ae idee, par un prossim viaç, di preparâ une tarie cun parsore scrit Culì cumò al è Robert Sheckley, di esponi in timp reâl dapardut là che si ferme. Tal daspòmisdì la realtât si intensifiche. A rivin a cjase di Curtoni in pelegrinaç di mieze Italie estimadôrs di Sheckley. Podopo o lin ae librarie Fahrenheit 451 dulà che il Nestri al ven intervistât par une television locâl. Duncje si finìs ducj a mangjâ intune otime tratorie. I Testemonis di Sheckley a son cressûts ancjemò e cumò a son cuarante personis a mangjâ cun lui. Dopo cene si torne in librarie par une presentazion publiche dal autôr. A lis undis di sere si tornìn a meti su la strade di cjase, viers Zenue. E je stade une zornade bielissime, descrite plui in detai e di un altri pont di viste di Vittorio Curtoni in chest stes numar di Delos. Sheckley al è content une vore. Ancje jo. Ancje Vittorio. Se cualchi scontent al è, evidentementri si è fat discretementri di bande.

Sabide 24 di lui e domenie 25 di lui a son zornadis relativementri cuietis. Ma no par chest mancul significativis. Lis Grandis Robis no son par fuarce robis grandis. O zirìn un pôc Zenue e i contors cun Alessandro Testa e altris amîs, ma o sin ducj tipos plui interessâts a lis robis che si disìn che no a lis robis che o fasìn. Ae domenie, a cjase di Popi, cul mâr celest che de barconete nus ricuarde cun discrezion la esistence dal mont, si cjalìn distratamentri ancje il Gran Premi di automobilisim in television, cuscients che un fonts al vâl chel altri pai nestris resonaments.

Lunis 26 di lui o fasìn un zirut in riviere, a Camogli, e cul batel nus scjampe ancje une cjapade a San Fruttuoso di Camogli. Il timp al è simpri biel. E ancje lis nestris cjacaradis. Us podarai mostrâ fotografiis che us convincin che il timp al è biel. Ma par ce che al rivuarde i resonaments, mi vês di crodi su la peraule. O sin simpri contents.

Martars 27 di lui nus tocjin lis Cinque Terre. Sheckley al veve sintût fevelâ ben, duncje o decidìn di visitâlis. O lin in machine fintremai a Manarola. A pît, fasint la famose Vie dal Amôr sot di un soreli che al bruse, o rivìn a Riomaggiore. Di culì un batel nus puarte a Vernazza di dulà che un tren nus torne a la nestre machine a Manarola. A disilu a bastin une pugnade di peraulis, a fâlu al covente une vore di timp e une vore di fadie. Amants de esagerazion, su la strade dal ritor o cjatìn timp e energjis ancje par une visite a Portofino. Cuant che la zornade e finìs, Sheckley al è distrut. Ma lis Cinque Terre lu àn lassât cence peraulis, e no dome par colpe de strachetât.
O decidìn che Miercus 28 di lui e vebi di jessi une zornade di dut polsâ. Al plûf, e cu la ploie la temperature si sbasse, dânus triè e favorint un polsâ miôr. La zornade e je comuncue ravivade di une visite di Natalino Bruzzone, che a cjase di Popi al fâs une splendide interviste pe pagjine culturâl dal Secolo XIX.



	In Mondadori: di çampe Lippi, Laura Serra, Sheckley, Festino, Alessandri, Quaglia

Joibe 29 di lui o lin a Milan. Prime tape: Segrate, Mondadori. Nus ricêf un cordialissim Giuseppe Lippi, curadôr di Urania, e cun sorprese o scuvierzìn che nol è di bessôl: o tornìn a cjatâ Vittorio Curtoni, Laura Serra, Giuseppe Festino, Piergiorgio Nicolazzini, Ferruccio Alessandri, ducj za presints a Piacenza, plui Claudio Asciuti, Domenico Gallo e varis altris. O gustìn te mense di Mondadori, dopo di ce che Sheckley nus ven secuestrât par un zir di intervistis e discussions di afârs. O spietìn cun pazience a lunc intune cjamarute disadorne. Un a un si'n van ducj e jo mi cjati a spietâ plui o mancul di bessôl. Finalmentri i scomparîts a tornin a comparî e si pues lâ in citât. Destinazion: la Librarie dal Zâl, in vie Peschiera 1. Un otim puest, tant che'nd riporti ancje l'indiriz. Altris fans a confluissin li e al è subit un biel cjacaraç, bagnât dal spumant ufiert dai gestôrs. Al fâs la sô comparse ancje Claudio del Maso. Ed è subito sera, cioè ora di cena, anzi: di pizza. Per l'occasione compare anche Luca Masali. Grande pizade coletive condide di cuatri altris cjacaris. O sin ducj contents, e cui che nol fos lu somee. Un pâr di oris di machine par tornâ a Boccadasse e ancje cheste lungje zornade si siere.

Vinars 30 di lui o bandonìn Zenue e Boccadasse. Sheckley mi domande: No tornarìno plui culì? O rispuint jo: No in chest viaç. O ricordarai a lunc la imediade tristece che e à cjapât la sô muse. Tal moment di saludâlu, Popi lu cjale, al ridi e i dîs: Nol è necessari che cumò o disìn alc. Sheckley al fâs segn di sì apene e al ven vie cun me. Popi e Robert si vevin za dit tant tes lungjis gnots passadis a discuti cuant che altris a varessin durmît. O montìn in machine e o partìn par Lucca, dulà che cualchi ore dopo o rivìn. Nus acuei Alessandro Fambrini, che nus ven a cjoli in biciclete e nus fâs strade viers la sô cjase, dulà che o sarìn ospits. Al è un daspòmisdì cuiet, chel che nus spiete. No murìn de voie di fâ ce che i turiscj a fasin cuant che a rivin in cualchi bande. Si polse un pôc, si fâs cun comut un zirut in machine ator des muris de citât, si va ae stazion a cjoli Stefano Carducci in rivade di Treviso. E ae sere si va ducj a mangjâ intune otime tratorie in culine.

Sabide 31 di lui e tache cuntun zirut su lis culinis ator, dulà che si imbatìn intun improbabil quagliodromo, un puest comuncue sinistri dal cuâl istintivamentri mi ven di tignîmi in larghe. O decidìn di cambiâ aiar e si spostìn a Pisa, dulà che o sin cjapâts in consegne di Francesco Ghetti che nus fâs di guide turistiche. Ae sere, o sin ospits a cene di lui, e la cuantitât e la cualitât des puartadis e je tâl di metisi decidudementri in crisi (soredut il sotscrit). In peraulis puaris: mangjât e bevût masse. Ma cemût si faseve a resisti? Intun mût o tal altri o tornìn a cjatâ la strade di cjase e o afrontìn une lungje gnot di sium e digjestion.

Domenie 1 di Avost al è une dì pôc conseade par metisi in autostrade. Ma la logjiche des partencis inteligjentis nus jude. Di cuant che a son deventadis di mode lis partencis inteligjentis, lis dîs tradizionalmentri pies par metisi in marce a son deventadis lis miôr, viodût che nissun al è cussì stupit di metisi in viaç propit in chês dîs li. Duncje no cjatìn trafic su lis autostradis e o rivìn a Treviso cence problemis tal prin daspòmisdì. O aloziìn a cjase di Stefano Carducci. Si polsìn cualchi ore, e in serade o zirìn pe citât fermantsi a cenâ intune altre otime tratorie, dulà che i nestris nobii proponiments di dizun dietetic a naufraghin pe enesime volte.

Lunis 2 di Avost o lin a Vignesie. Al fâs cjalt une vore, al è tant soreli e ancjemò plui turiscj. Sheckley nol viodeve Vignesie di une vincjine di agns. Il puest lu ispire e duncje si met a scrivi. Dapardut, dilunc dut il nestri pelegrinâ, Sheckley nol bandonarà nancje un moment il so taccuin e la sô afezionade pene Montblanc. Ducj i dîs, tantis voltis al dì, lu vin viodût e lu viodarìn tirâ fûr taccuin e pene e tacâ o continuâ a scrivi. Ma a Vignesie al è un moment specjâl. Lu viodìn scrivi cun dedizion plui intense dal solit. Dopo une pizze mediocre o visitìn la librarie di Giampaolo Cossato. A mieç daspòmisdì al è timp di tornâ a Treviso par un pôc di siesta. O vin scuviert che a Sheckley i detais di Vignesie, come dal rest di ducj i puescj, no i interessin plui di tant. Ce che lui al cîr tai puescj dulà che al va e je la atmosfere che a comunichin. La atmosfere e je la component ineffabile dai puescj, l'aspiet plui interessant di ce che ti circonde. Ae sere, nus rive Daniele Vecchi cu la femine Debora, e ducj insiemi si cene otimementri a cjase Carducci. Stefano al tire fûr un repertori di discs di vinîl cun musichis che Sheckley nol sintive di decenis. E al è subit nostalgje, o alc di chê famee di emozions. La serade si disvilupe e si conclût plasevolmentri.

Praghe

Martars 3 di Avost di prin buinore a rivin di Zenue Mario Quaglia, Ada Cortese e Max Morando. Al è cun lôr che si metìn in strade e o bandonìn l'Italie, il grim de machine ponte viers nord. O sin in cinc su la mê machine, o stin strets (soredut chei sentâts daûr, viodût che Max di bessôl al conten ator dai 120 chii di se stes), ma il bagai al è grant e il motôr al fâs il so dovê. O jessìn dal Tarvis e si dirigjìn viers Salzburg, podopo o zirìn a diestre viers Linz, dopo di ce che o cjapìn la statâl viers nord e si tufìn te Republiche Cêche. O rivìn a Praghe viers lis nûf di sere dopo une zornade di viaç, di soreli e di paisaçs gradevolissims. Nus spiete Yaroslav Olsa Jr., zovin diplomatic cêc e ancje un dai massims esperts di fantasience te sô nazion. Al è lui che nus à invidât a Praghe, e al è lui che nus met a disposizion un confortevul apartament dulà che nô o cjapìn aloc. Al è ancjemò timp e energjis par une cenute te tratorie plui dongje. No sai chei altris ma jo o soi distrut. O ai vuidât dut il dì e une gnot di sium profont e je decidudementri benvignude.



	Sheckley e Quaglia a un cafè di Praghe

Miercus 4 di Avost Ce si fâsial la prime dì che si è a Praghe? Si da une cjalade ator. Si va tal budiel dal centri storic a viodi i souvenir che a vendin in ducj i puescj turistics dal mont, si cîr di intraviodi un pôc di Praghe atraviers de spesse coltre di turiscj, e chest al è infatis ce che o fasìn. Par cualchi ore. Ca e là si sente a bevi un cafè o a mangjuçâ alc. O sin plui a nord e finalmentri la temperature e je acetabile. E il timp al è comuncue biel. E cun dut i turiscj Praghe e à une atmosfere uniche. Tal daspòmisdì o spindìn 20 mil liris di taxi par fâ votcent metris par lâ al Ministeri dai Esteris dulà che Yaroslav Olsa nus spiete. Tapât une vore tal so elegant vistît di diplomatic, Yaroslav nus acuei in compagnie di une sô fassinante colege di rare inteligjence, Jana Pechova, che al restarà cun nô pal rest de zornade. Il Ministeri dai Esteris al è in culine, e une lente cjaminade viers val e maride perfetementri lis esigjencis turistichis cu la nestre legjitime pigrizie. Ancje parcè che in fonts de culine si tornìn a cjatâ te esotiche cjase di Yaroslav, plene di oparis di art africanis e ancje soredut di libris di fantasience di dut il mont. Ma no feveli dal mont che o cognossês vô. O feveli di libris di fantasience birmans, etiops, congolês, e cui plui'nd à plui'nd meti. Une cjìcje dopo di chê altre. E nô si bevin parsore. E je la ore dal aperitîf. Tra pôc, il gotha de fantasience cêche nus spietarà intun dai plui esclusîfs ristorantins dal centri. E ve nus pôc dopo infatis li, in chel ambient rafinât che o ai purtrop dismenteât la localizazion, sentâts a une grande taule iluminade dome di cjandelis in spiete di une cene a base di cusine boeme. In plui di Nô, Yaroslav e Jana a son Ondrej Neff, cognossût scritôr cêc, Ivo Zelezny, editôr di SF, Ivan Adamovic, curadôr de riviste Ikarie e varis altris. Il mangjâ al è bon, ma cul timp lu varès dismenteât, parcè che il contest al è plui interessant. O bevin ancje un grum di bon vin. Ae fin de cene si va ducj intune famose birarie dulà che ogni tant al pâr che si fasès viodi il president Havel in persone. O passìn a un pas dal ghet ebraic dulà che in chel istant a stan zirant une sene di un film ambientât un pôc di timp indaûr. O viodìn un grum di nazists, intents a rastrelâ ebreus. Pôc dopo o sin in birarie, dulà che jo mi proponi di no bevi nuie. Al sarès masse. Il gno proponiment però nol ten une pugnade di seconts. E jù bire, propit buine! O sin ducj contents. Une vore contents. Al è un viaç plen di contentecis. Nol è robe di ducj i dîs. Al è un pecjât che ogni volte che si sedi contents podopo ae fin si vebi di lâ a durmî distès. E il dì dopo si scugne tornâ a tacâ di cjâf.

Joibe 5 di Avost O tornìn a tacâ di cjâf fasintsi subit fregâ une telecamare. Nol è il massim par restaurâ la contentece dal dì prime. O cjondolìn pal centri di Praghe te spiete dal apontament daspò. Tal daspòmisdì i fans nus spietin intun dai principâi club di fantasience. Li la acuelte e je une vore calorose, ma dome par Sheckley. Par cualchi ore nissun si vise che insiemi cun Sheckley a son altris trê personis, e nissun nus degne di un salût. Sogjetivamentri, o preferivi i VIP de sere prime. Dopo un pôc, nô talians o tacìn infatis a sintîsi di masse. Ce fasìno li? Dopo un pôc al salte fûr cualchidun che o cognòs e la situazion e miôre un pôc. Yaroslav mi veve visât, metintmi in vuardie su la pocje sociabilitât dai cêcs. Di chê altre bande, si scugne provâ par crodi. La uniche emozion e je osservâ la trance mistiche di un simpatic fan rus denant di Sheckley. O ai raramentri viodût tante emozion tai voi di un scognossût. E un pôc di osmosi emozionâl e je la conseguence logjiche. Di chest daspòmisdì o ricordarai cussì tal futûr dome i voi di chest frut. Ancje parcè che za che o jeri o ai filmât dute la sene. Ae sere si cene cuntun grup di fans.

Ongjarie

Vinars 6 di Avost On the road again. Si partìs par Budapest, cence prasse, a mieze buinore. Il viaç si fâs plui lunc dal dovût par colpe di une inutil deviazion atraviers de Austrie. O rivìn a Budapest viers sere, e o cjatìn subit di durmî. Jessint simpri stât jo a vuidâ, o soi une vore strac. Chest no nus impedìs di lâ a cenâ su un batel sul Danubi, dulà che - ahi nô - o ecedìn. Colpe dal mangjâ masse bon.



A Budapest

Sabide 7 di Avost Dopo gulizion, un biel zir par Budapest, tant par fâsi une idee. Di daspòmisdì si tornìn a meti in marce, direzion sudest. Si gjoldìn i ultins otante chilometris di autostrade. Dopo di ce che a saran dome stradis statâls. Al fâs cjalt une vore, ma la arie condizionade nus salve. O superìn la ultime citât ongjarese, Szeged, e finalmentri o rivìn ae frontiere cu la Romanie. Al è dut intasât, e al covente plui di une ore a passâ. Une altre ore le perdìn virtualmentri par vie dal cambi di fûs orari. Al è il tart daspòmisdì cuant che finalmentri o sfrecin atraviers des desoladis planuris de campagne rumene tal nordovest dal paîs. No covente tant a rivâ a Timisoara, la nestre destinazion di vuê. Al hotel Continental o cjatìn e o apreziìn lis cjamaris che a son stadis prenotadis par nô. Sheckley al è strac e perples. Al declare che l'Italie e jere une altre robe. Ma no si lamente, ni al rimpiant di jessi li. Al è za sere, e al è just il timp di mangjâ alc su la terace-ristorant dal alberc, intant che dongje di nô balarinis no masse vistidis a dan spetacul pe riprese in direte di une tivù locâl. Denant di un bon past e une buine bire, e ancje un biel pôc di scjadenadis balarinis un pôc plui in là, ancje l'umôr di Sheckley si ripiere in presse. Dilunc lis oris e oris passadis in machine tai ultins dîs al à scrit une vore, e chest al baste a rindilu sodisfat. Stâ sentât a scrivi al osserve al è ce che di simpri i capite di fâ, e in machine cun nô al pues ancje cjacarâ e osservâ il paisaç che al cambie.

Romanie



	Sheckley e Cowie

Domenie 8 di Avost Al fâs cjalt une vore a Timisoara. Te hall dal alberc o cjatìn chei che nus àn invidât in Romanie. Jonathan Cowie, sientiat scozês e ancje individui rafinât e amì gradevolissim, nus da il so calorôs benvignût. Al è lui, plui di altris, l'organizadôr dal event a cui o sin vignûts a cjapâ part. Ma a son in tancj a jessi confluîts al Continental a saludânus. Al è Jim Walker, come Jonathan vignût de Anglie. A son i rumens Silviu Genescu, Antuza Genescu e Dorin Davideanu. Dopo i inevitabii convenevui di circostance, si opte par une visite al museu locâl des cjasis di campagne, un parc dulà che a son stadis tornadis a fâ lis tradizionâls cjasis di campagne rumenis. Nol è la fin dal mont, ma al è pûr simpri alc di gnûf, e al è comuncue la ocasion di fâ une cjaminade. Al è un museu dal gjenar une vore plui grant e interessant a Bucarest, ma nô o sin a Timisoara. Che comuncue al è tal insiemi un puest interessant e gradevul. Tal daspòmisdì al è la cerimonie di inaugurazion de convention. Personalmentri o aborìs cualsisei cerimonie di cualsisei gjenar, duncje no pretindarai di convincius che jê e sedi par me font di gjonde. O disìn che mi stufi mancul dal solit. Probabilmentri, chest gjenar di cerimoniis a son un mâl necessari. Ae sere, tipicamentri o cenìn ae rumene. Nol è mâl come cusine, ma al è pôc vari e dopo cualchi gustâ si à za provât dut.



Sheckley e Quaglia sponsorizâts a firmin autograffs

Lunis 9 di Avost o vignìn condûts a viodi un museu. No sin tipos di museus, ni Sheckley ni il sotscrit, duncje ben prest o evadìn, e si rifugjìn di MacDonalds, un puest che nissun dai doi generalmentri al frecuente. Ma culì al fâs un cjalt danât, e MacDonalds al à la arie condizionade. E po nol è obligatori mangjâ. Par chest a esistin lis bevandis. Di li a pôc la troupe di une rêt televisive nazionâl nus ven a intervistâ. Di daspòmisdì, un pôc di triè in alberc. Il hotel Continental al è grant e acuelent, al conte une decine di plans dai cuâi al è un interessant: il secont. Dì dopo dì o deventìn nô ducj infatis sensibii a ce che o tacìn a clamâ il Misteri dal Secont Plan: a ognun di nô, infatis, tal propri saltâ sù e jù cul assensôr al capite dispès di tornâsi a cjatâ in compagnie di splendidis fantatis che dî vistidis al è masse, lis cuâls dutis invariabilmentri a jentrin o a jessin dal assensôr al secont plan. Chestis graziosis a scomparissin podopo cui saial dulà cu la stesse repentinitât cun cui a comparissin. Esplorazions aprofondidis al secont plan no zovin a clarî il misteri. E a nô a restin dome lis nestris ipotesis.



	I gjornâi di Timisoara dal dì dopo

Martars 10 di Avost no mi soi ancjemò ben sveât che mi cjati cun Sheckley, Max, Mario, Ada, Jonathan e ducj chei altris ae librarie BIC-ALL pe presentazion de edizion rumene dal libri di Sheckley Scambio Mentale (Transfer Mental) e dal gno Pane, burro e paradossina (Pâine, unt si paradoxina), ducj i doi editâts di Nemira. Al è ancje un sponsor di mieç, la bire Kaiser, e a Sheckley e a me al tocje meti magliutis rossis cul marc de bire, e soredut nus tocje bevi un grum di bire, l'ideâl a pene sveâts. Al è ancje il vice-sindic di Timisoara, che si produs intun lunc discors in rumen. Cuant che al tocje a me jo o feveli par un pôc a vanvere come ormai mi capite di fâ di un grum di timp, ben savint che cualsisei robe che jo o disi tant cualsisei si le dismentearà in presse, dome che cheste volte mi sbagli. Tai dîs daspò o tornarai a cjatâ infatis cuntun cert racapriz i miei sconclusionâts argoments fedelmentri riportâts in tancj articui su ducj i gjornâi locâi, come se pardabon a significassin alc. Sheckley, plui avodût, al sielç une linie plui sobrie. Al è relativamentri tant public, viodût che tai dîs prime i gjornâi locâi a àn pompât l'avigniment, ilustrant i articui ancje cun imagjins discjariadis a mê insavude dai miei sîts su Internet. Il diretôr marketing de Nemira, Laurentiu Teohar, al à evidentementri lavorât ben. Dopo i discors un tradizionâl assedi pal autograf su lis copiis dai libris no nus disturbe par nuie, e infin ancje chest biel moment si distude. E lis oris generichis a tornin a scori tal cjalt torit di Timisoara e nô o tornìn a rifugjâsi cualchi minût di MacDonalds. A lis cinc dal daspòmisdì o assistìn a une conference di Jonathan Cowie su la eclisse che doman e sarà.

Eclisse



Sheckley al cjale la eclisse

Miercus 11 di Avost al è il dì de eclisse totâl di soreli. E al tache malissim. Il cîl al è dut cuviert e al plûf. Podopo al lasse, ma il cîl nol miôre. Finalmentri al fâs frêt. Sheckley al dîs che un pôc di fresc i è plui grât de eclisse. Comuncue o decît distès di no restâ mâl. Al sarà comuncue interessant viodi il dì deventâ gnot. Intant la eclisse parziâl e tache, cussì almancul e dîs la nestre tabele. Nô no podìn viodi nuie, fûr des robis normâls. Sfrancje che lis nûls planc planc si sglonfin, e a colp cualchidun al intraviôt une parvence di soreli traspirâ dal cîl dispietôs. Al è subit une grande corse a cjapâ i ocjalins di eclisse. Il cîl si vierç ancjemò un pôc e ogni tant il soreli si fâs viodi in plen par cualchi minût. E cussì si vin fat la nestre eclisse parziâl, si disìn. Si svicinìn al moment de totalitât, e il cîl si vierç simpri di plui. Forsit o vin fortune. La incognite meteorologjiche e rint il dut probabilmentri une vore plui emozionant rispiet a come che al sarès stât in condizions climatichis ideâls. O sin tal nestri alberc e o montìn su la terace. Di li si domine dute la citât. Ogni tant al ven jù une curte ramade di aghe, tant par gradî. Sul cuviert, une tivù locâl e interviste Sheckley e me in direte e cu la scuse de eclisse o publicizìn i nestris libris. Al mancje ormai une pugnade di minûts al moment fatâl, e il cîl al è tornât prometent. Une corse jù in cjamare par seguî in television il procedi de eclisse totâl atraviers de Europe. Tivù vie satelit, programs britanics, francês e todescs, i cuâi in secuence a documentin e a comentin la eclisse totâl che e rive e che e va. In maniere inspietade, e je emozionante, cun dut lis cretinadis che i varis telecronistis no rivin a evitâ di dî. Cuant che la eclisse totâl e bandone ancje la Austrie, al è il moment di precipitâsi di gnûf sul cuviert. Al è lote pal assensôr, ma o sin nô a vinci. Il soreli al è ancjemò visibil, atraviers di un sutîl strât di nûls che svelt si môf, ma a'nd è dome une minuscule falce. Lis nûls a fasin di filtri e si pues adiriture cjalâ a voli crut cence problemis. Al orizont, intant, il cîl si è fat neris une vore a ovest. E je la eclisse totâl che e avance. Podopo une brute nûl e finìs dulà che no varès e il soreli al scompar, dut eclissât de nûl un moment prime che de lune. E podopo al è dut intun colp dut scûr, e al reste cussì par un pôc. O viodìn la sgradide nûl movisi, ma no svelte a vonde. La citât e je tal scûr, il cîl parsore di nô al è scûr, ma l'orizont al è luminosissim a 360 grâts. Un panorame mai viodût. Podopo la linie de lûs si svicine, cussì come prime al jere vignût il scûr. O cjali in alt e la nûl si'nd è cuasi lade o sinti un boât di vôs vignî di une altre zone de citât. Là jù la nûl si'nd è za lade e si è par un moment viodude la eclisse totâl. O cjali in bas: ancjemò scûr. O torni a cjalâ in alt: e a colp mi cjape un incecant raç di soreli e par un moment o intraviôt un toc di diamond ring, la imagjin che e segne la fin de eclisse totâl. O cjali in bas e la citât e je iluminade. Si vin pierdût la eclisse totâl par doi o trê seconts o, se o preferîs, par doi o tresinte metris. Ma probabilmentri no varessin vût dutis lis emozions che o vin vût se lis robis a fossin ladis come che o varessin volût che a lassin. Di chel moment in indenant, comuncue, il soreli befard nol à plui cessât di lusî.

Joibe 12 di Avost al è il nestri ultin dì a Timisoara. Tal daspòmisdì Sheckley, Tony Chester e jo o sin impegnâts a cjacarâ intune taule taronde. Ae sere, cene di gale intun ristorant riservât cuasi dut par nô. Al somee un biel puest, si comodìn e par un pôc dut al va ben. Ma tra la prime puartade e la seconde a passin dôs oris di spiete, sinceramentri masse par no inervosîsi. Dopo cene a son i rituâi convenevui che a compagnin i postums di dutis lis cenis di gale, e Sheckley astutamentri si ritire in alberc. Lu seguìn dopo no tant ancje nô. Doman al sarà une zornade dure.



Ogni istant al è bon par butâ jù cualchi apont

Vinars 13 di Avost e je une zornade dure. A lis vot e mieze de buinore o vin cjariât dut e ducj in machine e si partìs, viers il sudest dal paîs. No son praticamentri autostradis in Romanie, e lis stradis statâls, pûr di resint tornadis a asfaltâ, no son un scherç, specialmentri se si à di viaçâ par sietcent chilometris di file. Ancje parcè che atraviersant il paîs si è su la stesse rote di dut il trafic comerciâl de nazion e no dome: ce che al significhe colonis di TIR rumens, bulgars, turcs, ma ancje talians e todescs. Il dut condît di trebiatricis che di cuant in cuant a saltin fûr di daûr di une curve ocupant une corsie e mieze, miârs di cjaruts di contadins tirâts di cjavai, carovanis di zingars che si spostin ancje lôr coi lôr cjaruts e cjavai, trops di pioris che ogni tant a taein la strade cun indiference, vacjis di bessolis e no di bessolis e cjans bandonâts suicidis. A intervai regolârs, infatis, i ôrs des stradis de Romanie a son costelâts di cadavars di cjans che a àn atraviersât la strade tal moment sbaliât. A son milions di cjans bandonâts, in Romanie, che a aumentin cence fin, e di ce che mi è stât spiegât la comunitât europeane e à intimât i rumens di no copâju par no violâ i lôr derits animalescs, o alc dal gjenar. No sai se al è vêr ma al sarès tipic, e intant i cjans bandonâts a aumentin, a formin vêrs e propris trops che ogni tant secont cualchidun si mangjin ancje cualchi frut. E intant jo o vuidi. O'nd ai par dute la zornade. Diviersamentri de vuide in autostrade, culì no tu puedis distrâti un moment. Vuai a jevâ i voi de strade! Agns indaûr, cuant che o soi vignût di chestis bandis insiemi cun Silvio Sosio e Luigi Pachì, par cirî di lenî il lôr shock pes stradis rumenis (a chê ete a jerin une vore mancul asfaltadis di cumò) ur ai dit che lis stradis in Romanie a son une metafore de vite: no tu sâs mai ce che al vignarà tra un moment, e cuant che mancul tu ti lu spietis tu ti imbatis in cualchi imprevist. O jentrìn tai Carpazi e o afrontìn il traviersament de Transilvanie intun clime lugubar e fassinant. Il timp al è brut, lis nûls a son bassis e al tache a plovi a scjafoiât. Si ralegrìn pe atmosfere congrue, ma la ligrie e dure pôc. La strade e costee un flum e ae nestre diestre a son dome pareds rocjosis. Dai cuâi, in virtût de ploie, nol è dome aghe chê che e ven jù. Simpri plui dispès si imbatìn intune frane che e ostruìs part de nestre cjarezade. Al è incoragjant. Fintremai che la strade no je dut intun colp blocade di une frane in at propit in chel intant denant di nô. Lis machinis a son dutis li fermis a spietâ. La strade no je ancjemò dal dut blocade, ma claps e claputs a rodolin atraviers de strade rindint il transit pôc atraent. Ogni tant, cualchi machine e tente il azart e e passe, cirint di dribblâ i claps za su la strade e chei, plui periculôs, in rivade. Mi puarti su la corsie di sorpàs e mi svicini. Mi fermi. Provìno a passâ o spietìno ancjemò? Tra pôc al podarès jessi masse tart, la strade e podarès ostruîsi dal dut. In chel moment un grant clap al sfrece velocissim atraviers de strade denant di nô. E je une roulette russe. Par fortune, la frane in at e je cumò perfetementri visibil in dut il so disvilup. E sta vignint jù di dut pal scoscjês pendì ae nestre diestre, ma si lu viôt ben, e par plui a son claputs piçui. Ce che al vûl dî che cuntun pôc di acurtece si pues passâ cence masse riscjos, in sintonie coi timps de frane cussì di evitâ i rârs claps grancj. O premi il pedâl sul aceleradôr impiant il turbo dal motôr e de adrenaline. Intant che o passi atraviers de frane une rode e fâs sglizâ un clap cuintri il telâr inferiôr de machine e il fuart rumôr dal impat no nus ralegre. Un moment dopo o soi sfrecant a velocitât inaudide tra lis machinis che di chê altre bande de frane a sostin in spiete, e cualchidun providenzialmentri mal fâs notâ. Cuant che il turbo de adrenaline si met in mot, al è il câs che un si dismentei di distudâlu. No cence fadie lu distudi e o ralenti. Mi sinti un pôc in colpe cun Sheckley par vêlu puartât fin culì e alore i dîs: Almancul nol è un viaç noiôs. Sheckley al rispuint cun arie convinte: No, nol è noiôs. Tra ducj al somee il mancul preocupât. Si torne a meti subit a scrivi. O sbirci sul so taccuin e o lei We stopped at one point and watched a flow of small pubbles trickle out of a hole in the mountainside and onto the road. It was like the Earth was bleeding. Par lui i avigniments a son soredut il spont par vê alc di scrivi. I Carpazi a stan cuasi par finî. Al continue a diluviâ. Sheckley al continue a scrivi. I robi une altre pugnade di frasis: The flooding grew worse as we continued. A deserted car park had become a lake, empty except for one white plasticchair floating in it. Occasionally we passed a peasant, standing at the side of the road, huddled under a plastic raincoat, waiting for God knows what. But for the most part we encountered no one. Cuant che o crodìn di vê superât il piês, si imbatìn intun ingorc. Al è un avalament, su la strade, che si è jemplât di aghe. I camions a transitin, ma une machine che e prove a fâ compagn si inabisse e e reste li. Di culì no si passe. Par fortune al è une strade alternative, ma o vin di tornâ indaûr cualchi chilometri. O fâs inversion e ripercorint in sens contrari la strade a pene fate, mi imbat ben prest intun grant clap tal mieç de strade. Pôc prime chel nol jere. Al è vignût jù pôc dopo al nestri prin passaç di li e pôc prime dal nestri secont. O sin fortunâts o comuncue no sin sfortunâts. Mieze ore dopo o vin superât cence dam i Carpazi e al è di gnûf planure, ce che pardabon no nus displâs ancje se la atmosfere no je interessante compagn. O rivìn a Bucarest viers lis vot di sere, ma no je cheste la nestre destinazion di vuê. O valutìn comuncue se fermâsi o no, duncje ae unanimitât si decît di sighî. A calin lis tenebris, e dome alore mi ricuardi parcè che no ai mai volût viaçâ atraviers de Romanie di gnot. Chei altris lu scuvierzin pe prime volte. Tal scûr, lis lûs sbarlumantis de colone di TIR su la corsie oposte ti acein, ce che nol è propit il massim in Romanie, dulà che lis stradis a riservin sorpresis su sorpresis, dulà che i cjaruts tirâts dai cjavai no àn lûs daûr e dulà che i ocasionâi pedons a cjaminin cuasi tal mieç de strade confidant forsit che lis machinis ju evitin, o plui probabilmentri no ponintsi par nuie il probleme. E je la part mancul divertente dal viaç. O rivìn a Cernavoda tra lis dîs e lis undis di sere. Li al è une centrâl nucleâr, ma no podìn lamentâsi masse. Le vin costruide nô talians (o miôr, nô zenoês) insiemi cui canadês. O vignìn fats alozâ tai amplis e lussuôs apartaments un timp edificâts pal personâl ocidentâl de centrâl. O sin stracs, ma ancje a vonde contents. Par cuindis oris o sin restâts in cjarezade, cence fin superant machinis, TIR e cjaruts vuardant di no fracassâsi frontalmentri cuintri i TIR che su la corsie di sorpàs ti tornis a cjatâ ogni moment denant, e o sin sorevivûts.



	Su la barcje par Atlatikron

Sabide 14 di Avost e je une zornade nulose. A trentecinc chilometris di Cernavoda al è une isulute sul Danubi clamade Atlantykron, dongje dal borc di Capidava. Al è li che nô o lin. Un puest salvadi e fûr dal mont abituâl dulà che ogni an i rumens a organizin une setemane di manifestazions atinentis ae fantasience. Un piçul batel nus tragjete là jù. Almancul, o cîr di incoragjâ Sheckley, culì nissun ti puartarà a fâ un zir turistic. Sheckley al rispuint: Cheste e je une buine gnove. O sin però in erôr. A pene sbarcâts su la isulute, Sorin Repanovici, l'organizadôr de manifestazion, nus acuei e nus condûs a fâ un zir turistic pe isulute, mostrantnus lis tendis e i lôr ocupants. Podopo si bêf e si mangje alc sul puint dal batel ormezât ae isule, duncje al seguìs un incuintri-dibatit coi presints de isule. Tal daspòmisdì, Sheckley al preferìs tornâ tal so apartamentin a Cernavoda parcè che al vûl scrivi un cont e par chest i covente solitudin. Ae sere lu varà za ultimât e di chest al sarà une vore content.

Domenie 15 di Avost o fasìn ritor a Bucarest. Al è il prin pas in direzion di cjase. A Bucarest o vin a disposizion un pâr di apartaments tai cuâi alozâ. O lin a gustâ di Sydney, un pub australian une vore in dulà che si mangje ancje robe messicane. E al è propit li, sentât di Sydney denant di un bon plat esotic, che Sheckley al aferme che la Romanie i tache a plasê, e che al podarès imagjinâsi di vivi li. Tal daspòmisdì, Sheckley al vûl continuâ a scrivi. I lassi a disposizion il gno laptop e nô altris si'n lin a fâ doi zirs. Ae sere al varà scrit un altri cont.



Ae TV rumene intervistâts dal ministri

Lunis 16 di Avost e je une zornade une vore intense, tacade cuntun biel taramot. Il sisme che al à distrut la Turchie si è fat sintî ancje culì. Max e Ada, i unics di nô sveâts a chê ore, a testemonein che dut al à balât par un biel pôc, intant che i lampadaris a cjondolavin decidudementri di ca e di là. Jo o durmivi e no mi soi visât di nuie. In buinore o sin invidâts ae television rumene di Alexandru Mironov, ex ministri dal sport e de zoventût e ancje espert di fantasience e conduttôr di une trasmission televisive di fantasience su la prime rêt nazionâl, il cuâl al realize une otime trasmission imperniade su di nô. Sheckley al è une vore content, e jo no soi di mancul. E je stade une biele trasmission, cun domandis e discors inteligjents e fûr di ogni consuete banalitât. A gustâ si rifugjìn ancjemò di Sydney. E tal daspòmisdì al è in bal une seconde partecipazion a une trasmission televisive. Cheste volte o sin ospits tal salot di Mihaela Muraru Mandrea. Di sere o sin invezit invidâts a cene di Florin Munteanu, brilantissim sientiat rumen e gno grandissim amì. E je une grande biele serade, cualsisei descrizion de cuâl e sarès limitative. Sheckley al è entusiast. What a fantastico man! al comentarà daspò, ripensant a Florin.



	In zir par Bucarest

Martars 17 di Avost o lin di Nemira, la nestre cjase editore. O sin ben acuelts di Valentin Nicolau, l'editôr, e Vlad Popescu, il so vice. Nuie discors di circostance. Invezit, un biel pôc di timp insiemi a cjacarâ fûr dai solits rituâi. Al è ancje il timp par un salt te redazion di Anticipatia, la plui longjeve riviste di SF rumene. Podopo il solit spuntin di Sydney. Tal daspòmisdì, Sheckley si ritire di gnûf a scrivi. Si va ducj a durmî prest. Doman al sarà une zornade dure.

Ritor

Miercus 18 di Avost si torne a partî par l'Italie. A lis cinc e mieze de buinore. Svee a lis cuatri e mieze. Al è il sisteme miôr par risparmiâsi cualchi ore di trafic intens e sbrevâ la durade dal viaç. Si viace infatis svelts e cence masse problemis. Partint cussì prest, o anticipìn i grancj flus di trafic e tal prin daspòmisdì o sin za ae frontiere di Arad. A mieç daspòmisdì o rivìn a Budapest, dulà che o intindìn fermâsi. Cjatât in presse un aloc par Sheckley, o impleìn cualchi ore a sisteme ancje nô altris. Budapest e je a stope, ma ae fin o cjatìn alc. Al è il moment dal viaç dulà che jo o soi plui strac. O ai simpri e dome vuidât jo di bessôl, e la fadie si è lade acumulant. Dî che o soi distrut al è un diminutîf. O tornìn a cenâ sul batel dulà che si veve mangjât ae lade, e che o vevin cussì tant gradît. Al è passât un mês di cuant che Sheckley al è cun nô, e cumò lui al mangje in medie il dopli rispiet a cuant che al jere rivât. Cheste sere al mangje plui dal cuadruplo. Al disarà pôc dopo: O ricordarai cheste cene a lunc. Ancje nô.

Joibe 19 di Avost al è il dì dal ritor in Italie. O traviersìn la Austrie, dulà che in autostrade nus jes ancje une biele multe par ecès di velocitât, e viers sere o rivìn al aeropuart di Vignesie, dulà che a colp no si cjate plui il bilet di ritor di Sheckley. Al è une orute di suspense, podopo il bilet al salte fûr. O cjatìn une dongje locande e o risolvìn cussì ancje il probleme di cheste ultime gnot. Par festezâ il ritor in Italie si papìn un pâr di otimis pizzis a cjâf.

Vinars 20 di Avost Sheckley al cjape l'avion che atraviers Londre e Seattle lu tornarà a Portland, Oregon, dulà che la femine Gail lu spiete. Su la strade dal ritor a Zenue al è par un pôc silenzi in machine. E al è Max che a un cert pont al dîs: Nol è plui. Al ribat Mario: Nol è mai stât. Al tocje a me: Al è stât, al è stât, no jere une alucinazion. E se lu jere si trate comuncue di une alucinazion miôr des altris. In realtât forsit no ai dit propit cussì. Ma a cui i impuartino i detais, cumò che Sheckley nol è plui in cheste storie?

Fûr dal timp al è ancjemò il timp par une considerazion finâl: ce che o vês let fin cumò e je la mere cronologjie di ce che al è sucedût. Nuie di pardabon significatîf al è racolt in ce che culì al è scrit. Ce che pardabon al impuarte nol pues vignî contât cussì. Probabilmentri, nol pues vignî contât par nuie. Al pues vignî dome ricordât, di cui che lu à vivût. E forsit, nancje chest al è vêr. Ce che pardabon al impuarte al pues dome jessi vivût intant che si lu vîf. Dut il rest a son dome diafanis rapresentazions. Opûr, se o preferîs, rapresentazions di rapresentazions. Vâl a dî alc che cu la realtât al finìs par vê ben pôc a ce fâ. Contentìnsi e contentaitsi. L'impuartant al è ecuivocâ il mancul pussibil.

Un plui complet album fotografic dal viaç al è disponibil clicant culì. (http://www.fantascienza.com/quaglia/sheckley/1999/)